ບັນດາປະເທດເຂົ້າຮ່ວມກອງປະຊຸມ

ວັນທີ 12 ເມສາ, ສະພາຄວາມໝັ້ນຄົງ ສປຊ ໄດ້ຈັດກອງປະຊຸມທາງອອນລາຍ ກ່ຽວກັບສະພາບການເຂດ ບັນດາໜອງໃຫຍ່ ຢູ່ ອາບຟຼິກກາ. ທ່ານ ດັ້ງດິ່ງກຸ໊ຍ ເອກອັກຄະລັດຖະທູດ ຫົວໜ້າຄະນະຜູ້ຕາງໜ້າ ຫວຽດນາມ ປະຈຳ ສປຊ ເປັນປະທານກອງປະຊຸມໃນຖານະເປັນປະທານໝູນວຽນ ສປຊ ເດືອນ ເມສາ 2021. ກ່າວຄຳເຫັນທີ່ກອງປະຊຸມ, ທ່ານເອກອັກຄະລັດຖະທູດ ໄດ້ຊົມເຊີຍຄວາມມານະພະຍາຍາມໃນການເພີ່ມທະວີຄວາມສາມັກຄີ ແລະ ການຮ່ວມມືຂອງບັນດາປະເທດໃນພາກພື້ນ ບັນດາໜອງໃຫຍ່, ເຖິງຢ່າງໃດກໍ່ຕາມທ່ານກໍ່ສະແດງຄວາມວິຕົກກັງວົນລວມຂອງ ສປຊ ກ່ຽວກັບການຂາດສະຖຽນລະພາບທີ່ເກີດຂຶ້ນ ແລະ ສະພາບການມະນຸດສະທຳປະສົບກັບຄວາມຫຍຸ້ງຍາກ. ທ່ານເອກອັກຄະລັດຖະທູດ ດັ້ງດິ່ງກຸ໊ຍ ໄດ້ເນັ້ນໜັກ 3 ຈຸດສຸມຫຼັກ ເພື່ອແນໃສ່ຮັບປະກັນສັນຕິພາບ ແລະ ພັດທະນາແບບຍືນຍົງໃຫ້ແກ່ພາກພື້ນ, ລວມມີ: ສືບຕໍ່ຍູ້ແຮງການຮ່ວມມືໃນພາກພື້ນ, ຊຸກຍູ້ການແກ້ໄຂສາຍເຫດຕົ້ນຂອງ ການປະທະກັນ ແລະ ເພີ່ມທະວີການໜູນຊ່ວຍຂອງປະຊາຄົມສາກົນ. ທ່ານເອກອັກຄະລັດຖະທູດ ຢັ້ງຢືນວ່າ ຫວຽດນາມ ສະໜັບສະໜູນ ຍຸດທະສາດຂອງ ສປຊ ເພື່ອແນໃສ່ໜູນຊ່ວຍຄວາມໝັ້ນຄົງ ຢູ່ພາກພື້ນ, ຊົມເຊີຍການສ້າງວິວັດການທີ່ເໝາະສົມກັບໂຄງການດຳເນີນງານ ປີ 2030 ກ່ຽວກັບ ການພັດທະນາແບບຍືນຍົງ.