ກອງປະຊຸມທາງອອນລາຍເປີດເຜີຍ ກ່ຽວກັບສະພາບການຢູ່ຕາເວັນອອກກາງ

ວັນທີ 22 ເມສາ, ສະພາຄວາມໝັ້ນຄົງ ສປຊ ໄດ້ຈັດກອງປະຊຸມທາງອອນລາຍເປີດເຜີຍ ກ່ຽວກັບສະພາບການຢູ່ຕາເວັນອອກກາງ, ລວມມີບັນຫາ ປາແລັດສະຕິນ. ກ່າວຄຳເຫັນທີ່ກອງປະຊຸມ, ທ່ານ ເອກອັກຄະລັດຖະທູດ ດັ່ງດິ່ງກຸ໊ຍ, ຫົວໜ້າຄະນະຜູ້ຕາງໜ້າຫວຽດນາມປະຈຳ ສປຊ ໄດ້ຢັ້ງຢືນວ່າ ຫວຽດນາມ ສະໜັບສະໜູນຢ່າງແຮງຕໍ່ທຸກໆຄວາມມານະພະຍາຍາມ ແລະ ຂໍ້ລິເລີ່ມທີ່ອາດຈະຊ່ວຍຊຸກຍູ້ວິວັດຂະບວນການສ້າງສັນຕິພາບຢູ່ຕາເວັນອອກກາງ, ຮຽກຮ້ອງໃຫ້ກຸ່ມ 5 ປະເທດ ຢູ່ ຕາເວັນອອກກາງ ກໍຄືບັນດາປະເທດ ໃນພາກພື້ນ ເພີ່ມທະວີຄວາມມານະພະຍາຍາມ ເພື່ອສ້າງຄວາມສະດວກໃຫ້ແກ່ການເຊື່ອມຕໍ່ເຈລະຈາ. ທ່ານເອກອັກຄະລັດຖະທູດ ໄດ້ຮຽກຮ້ອງໃຫ້ທຸກໆຝ່າຍ ປະຕິບັດບັນດາມາດຕະການສ້າງຄວາມໄວ້ເນື້ອເຊື່ອໃຈ ແລະ ອົດກັ້ນບັນດາການກະທຳແບບພຽງລຳພັງຝ່າຍດຽວ ທີ່ອາດຈະກໍ່ຜົນສະທ້ອນຢ່າງຫຍໍ້ທໍ້ຕໍ່ແງ່ຫວັງການເຈລະຈາ. ທ່ານເອກອັກຄະລັດຖະທູດ ໄດ້ຢ້ຳຄືນຫຼັກໝັ້ນທີ່ຢຶດໝັ້ນຂອງ ຫວຽດນາມ ໃນການສະໜັບສະໜູນວິທີການແກ້ໄຂສອງລັດ, ໃນນັ້ນລວມມີການສ້າງລັດ ປາແລັດສະຕິນ ດ້ວຍນະຄອນຫຼວງແມ່ນ Jerusalem ຕາເວັນອອກ ແລະ ມີເສັ້ນຊາຍແດນທີ່ໄດ້ຮັບການຮັບຮອງເອົາຈາກສາກົນ ບົນພື້ນຖານແມ່ນບັນດາເສັ້ນຊາຍແດນກ່ອນປີ 1967, ຊຶ່ງສອດຄ່ອງກັບກົດໝາຍສາກົນ, ກົດບັດ ສປຊ ແລະ ບັນດາມະຕິທີ່ກ່ຽວຂ້ອງ ຂອງ ສປຊ.