( vovworld ) – ຍາມ​ໃດ ຫວຽດນາມ ​ກໍ່​ກຳນົດຮັບປະກັນ​ຄວາມ​ໝັ້ນຄົງປອດ​ໄພ​ນີວ​ເຄຼຍ ​ແມ່ນ​ການ​ໃຫ້​ບຸລິມະສິດ​ອັນ​ດັບ 1 ​ໃນ​ວິວັດ​ການ​ພັດທະນາ, ນຳ​ໃຊ້​ພະລັງງານ​ນີວ​ເຄຼຍ, ພ້ອມ​ທັງ​ສະໜັບສະໜູນ​ສິດ​ຂອງ​ບັນດາ​ປະ​ເທດ​ໄດ້​ນຳ​ໃຊ້​ພະລັງງານ​ເພື່ອ​ຈຸດປະສົງ​ສັນຕິພາບ, ກໍ​ຄື​ບັນດາ​ຄວາມ​ມານະ​ພະຍາຍາມ​ຫຼຸດຜ່ອນ ​ແລະ ບໍ່​ແຜ່​ຂະຫຍາຍ​ອາວຸດ​ນີວ​ເຄຼຍ. ທ່ານ Luong Thanh Nghi ​ໂຄສົກ​ກະຊວງ​ການ​ຕ່າງປະ​ເທດ​ຫວຽດນາມ ​ໄດ້​ຢືນຢັນ​ຄື​ດັ່ງກ່າວ ທີ່​ການ​ປະຊຸມຂ່າວ​ປະຈຳ​​​ເດືອນ ຈັດ​ຂຶ້ນ​ໃນ​ຕອນ​ບ່າຍ​ວັນ​ທີ 22/3 ຢູ່​ຮ່າ​ໂນ້ຍ, ​ໃນ​ໂອກາດ​ທ່ານ​ນາຍົກລັດຖະມົນຕີຫວຽດນາມ Nguyen Tan Dung ກະກຽມ​ເຂົ້າຮ່ວມກອງ​ປະຊຸມ​ສຸດ​ຍອດ​ຄວາມໝັ້ນຄົງ​ດ້ານ​ນີວ​ເຄຼຍ ຊື່​ງຈະ​ດຳ​ເນີນ​ໄປ​ໃນ​ວັນ​ທີ 26 ຫາ​ວັນ​ທີ 30/3 ທີ່​ຈະ​ມາ​ເຖິງ​ຢູ່​ສ​າທາ​ລະນະ​ລັດ​ເກົາຫຼີ. ທ່ານ Luong Thanh Nghi ຊີ້​ແຈ້ງວ່າ: “​ໂດຍ​ແມ່ນ​ສະມາຊິກ​ທີ່​ຕັ້ງໜ້າ ​ແລະ ມີ​ຄວາມ​ຮັບຜິດຊອບ​ຂອງ​ປະຊາ​ຄົມ​ໂລກ, ຫວຽດນາມ​ ເຂົ້າຮ່ວມກອງ​ປະຊຸມ​ສຸດ​ຍອດ​​ຄວາມໝັ້ນຄົງ​ດ້ານນີວ​ເຄຼຍຄັ້ງທີ 2 ຢູ່​ສ​າທາ​ລະນະ​ລັດ​ເກົາຫຼີ ຄັ້ງນີ້ ​ເພື່ອ​ແນ່​ໃສ່​ຢັ້ງຢືນ​ນະ​ໂຍບາຍ​ສະ​ເໝີ​ຕົ້ນສະ​ເໝີ​ປາຍ​ຂອງ​ຫວຽດນາມ ​ໃນ​ການ​ນຳ​ໃຊ້​ພະລັງງານ​ນີວ​ເຄຼຍ ​ເພື່ອ​ຈຸດໝາຍ​ສັນຕິພາບ ​ແລະ ຮັບປະກັນ​ຄວາມ​ສະຫງົບ​ປອດ​ໄພ​ນີວ​ເຄຼຍ. ຫວຽດນາມ​ ຖື​ເປັນ​ສຳຄັນ ​ແລະ ພ້ອມ​ແລ້ວ​ທີ່​ຈະ​ເປີດ​ກ້ວາງ​ການ​ຮ່ວມ​ມື​ກັບ​ສາກົນ​ໃນ​ຂົງ​ເຂດ​ນີ້. ທີ່​ກອງ​ປະຊຸມ, ຫວຽດນາມ ກໍ​ຈະ​ຍົກ​ອອກ​ບັນດາ​ຄວາ​ມານະ​ພະຍາຍາມ ​ແລະ ມາດ​ຕະການ ຊື່​ງຫວຽດນາມ ​ໄດ້​ປະຕິບັດ​ໃນ​ໄລຍະ​ທີ່​ຜ່ານ​ມາ ​ເພື່ອ​ແນ່​ໃສ່​ຮັບປະກັນ​ຄວາມ​ປອດ​ໄພ​ນີວ​ເຄຼຍ​ໃນ​ລະດັບ​ສູງ​ສຸດ, ພ້ອມ​ທັງ​ຈະ​ພ້ອມ​ກັບປະ​ເທດ​ຕ່າງໆ ມີ​ບັນດາ​ມາດ​ຕະການ​ເພີ່ມ​ທະວີ​ການ​ຮ່ວມ​ມືກັບ​ສາກົນ​ໃນ​ຂົງ​ເຂດຄວາມ​ໝັ້ນຄົງປອດ​ໄພ​ນີວ​ເຄຼຍ​​, ປະກອບສ່ວນ​ປັບປຸງ​ສັນຕິພາບ, ການ​ຮ່ວມ​ມື, ການ​ພັດທະນາ​ໃນ​ພາກ​ພື້ນ ​ແລະ ​ໃນ​ໂລກ“