(vovworld) – “ ຫວຽດນາມ​ ແມ່ນໜຶ່ງ​ໃນ​ບັນດາ​ຄູ່​ຮ່ວມ​ມື​ດ້ານ​ການ​ຄ້າ​ທີ່​ສຳຄັນ​ຂອງ ອາ​ຟຣິກາ​ໃຕ້ ປະຈຸ​ບັນນີ້ ”,​ ນັ້ນ​ແມ່ນ​ຄຳ​ຢືນຢັນ​ຂອງ​ທ່ານນາງ Kgomotso Ruth Magau, ​ເອກ​ອັກຄະ​ລັດຖະທູດ ສ.ອາ​ຟຣິກາ​ໃຕ້ ປະຈຳ​ ຫວຽດນາມ ຢູ່​ພິທີ​ສະ​ເຫຼີມສະຫຼອງ 20 ປີ​ແຫ່ງ​ວັນອິດ​ສະລະພາບ​ຂອງ ອາ​ຟຣິກາ​ໃຕ້​ ​(27/4) ​ຊຶ່ງ​ໄດ້​ດຳ​ເນີນ​ໃນ​ຕອນ​ຄຳ່​ວັນ​ທີ 23/4 ຢູ່ ຮ່າ​ໂນ້ຍ. ຕາມ​ທ່ານນາງເອກ​ອັກຄະ​ລັດຖະທູດ Kgomotso Ruth Magau ​ແລ້ວ, ປະຈຸ​ບັນ​ນີ້, ຫວຽດນາມ ​ແລະ ອາ​ຟຣິກາ​ໃຕ້ ມານະ​ພະຍາຍາມ​ປັບປຸງ ​ແລະ ​ເພີ່ມ​ທະວີ​ນຳ້​ໃຈ​ມິດ​ຕະພາບລະຫວ່າງ​ປະຊາຊົນ​ສອງ​ປະ​ເທດ​ຢ່າງ​ບໍ່​ຢຸດ​ຢັ້ງ, ພ້ອມກັນ​ນັ້ນກໍ່ຊອກ​ຫາ​ບັນດາ​ໂອກາດ ​ແລະ ຄວາມ​ສາມາດ​ບົມຊ້ອນ​ຮ່ວ​ມມື​ສອງ​ຝ່າຍ​ໃນ​ບັນດາ​ຂົງ​ເຂດ, ພິ​ເສດ​ແມ່ນ​ການ​ຄ້າ ​ແລະ ອຸດສາຫະກຳ.

     ທ່ານນາງເອກ​ອັກຄະ​ລັດຖະທູດ Kgomotso Ruth Magau ກໍ່​ໃຫ້​ຮູ້​ວ່າ​ພິທີສະ​ເຫຼີມສະຫຼອງ 20 ປີ​ແຫ່ງ​ວັນອິດ​ສະລະພາບ​ຂອງ​ ອາ​ຟຣິກາ​ໃຕ້ ​ ແມ່ນ​ໂອກາດ​ເພື່ອ​ໃຫ້​ປະຊາຊົນ ອາ​ຟຣິກາ​ໃຕ້ ຫວນ​ຄືນ​ວິວັດ​ການ​ຕໍ່ສູ້​ເພື​່ອພາລະກິດ​ປົດ​ປ່ອຍ, ສ້າງສາ ​ແລະ ພັດທະນາ​ປະ​ເທດ​ຊາດ. ປະຈຸ​ບັນນີ້, ອາ​ຟຣິກາ​ໃຕ້ພວມ​ມຸ່ງ​ໄປ​ເຖີງການ​ສ້າງ​ສັງຄົມ​ທີ່​ສາມັກຄີກວ່າ, ປະຊາຊົນທຸກ​ຄົນ​ມີ​ຊີ​ວິດດີກ​ວ່າ.