(vovworld) – ວັນທີ 12/08, ຢູ່ຮ່າໂນ້ຍ, ທ່ານຮອງນາຍົກລັດຖະມົນຕີ, ລັດຖະມົນຕີການຕ່າງປະເທດ ຟ້າມບິງມິງ ໄດ້ມີການເຈລະຈາກັບທ່ານນາງ Catherine Ashton, ຮອງປະທານຄະນະກຳມະການເອີລົບ (EC), ຜູ້ຕາງໜ້າຂັ້ນສູງຂອງສະຫະພາບເອີລົບ (EU) ກ່ຽວກັບນະໂຍບາຍການຕ່າງປະເທດ ແລະ ຄວາມສະຫງົບ.
ທີ່ການເຈລະຈາ, ທ່ານຮອງນາຍົກລັດຖະມົນຕີ, ລັດຖະມົນຕີການຕ່າງປະເທດ ຟ້າມບິງມິງ ຂອບໃຈຄະນະກຳມະການເອີລົບ ທີ່ໄດ້ໃຫ້ຄຳໝັ້ນສັນຍາຊ່ວຍເຫຼືອລ້າໃຫ້ແກ່ຫວຽດນາມ ໄລຍະ 2014 – 2020 ຂຶ້ນເຖິງ 400 ລ້ານເອີໂລ. 2 ຝ່າຍໄດ້ເຫັນດີ ເພີ່ມທະວີການພົບປະແລກປ່ຽນຄະນະຜູ້ແທນ; ເພີ່ມທະວີການທາບທາມຄວາມເຫັນ ແລະ ສົມທົບກັນທີ່ບັນດາເວທີປາໄສພາກພື້ນ ແລະ ສາກົນ; ສ້າງເງື່ອນໄຂສະດວກໃຫ້ບັນດາວິສາຫະກິດຫວຽດນາມ ແລະ EU ລົງທຶນ, ດຳເນີນທຸລະກິດໄລຍະຍາວຢູ່ຕະຫຼາດຂອງກັນ. ຄຽງຂ້າງນັ້ນ, ຫວຽດນາມ ແລະ EU ເຫັນດີເພີ່ມທະວີການຮ່ວມມືໃນຂົງເຂດການສຶກສາ, ເຕັກໂນໂລຊີ, ສິ່ງແວດລ້ອມ, ຮັບມືກັບການປ່ຽນແປງຂອງດິນຟ້າອາກາດ, ປ້ອງກັນຊາດ, ປ້ອງກັນຄວາມສະຫງົບ. ເນື່ອງໃນໂອກາດນີ້, ທ່ານຮອງນາຍົກລັດຖະມົນຕີ, ລັດຖະມົນຕີການຕ່າງປະເທດ ຟ້າມບິງມິງ ສະເໜີໃຫ້ EU ອະນຸມັດຜ່ານສັນຍາແມ່ຄູ່ຮ່ວມມື ແລະ ຮ່ວມມືຢ່າງຮອບດ້ານ ແລະ ຕັ້ງໜ້າຊຸກຍູ້ການຮ່ວມມືຮອບດ້ານເພື່ອສິ້ນສຸດການເຈລະຈາສັນຍາການຄ້າເສລີ (FTA) ຫວຽດນາມ - EU ໃຫ້ຖືກຕາມກຳນົດເວລາ.
ຕາມທ່ານນາງ Catherine Ashton ແລ້ວ, ການພົວພັນລະຫວ່າງຫວຽດນາມ - EU ສືບຕໍ່ໄດ້ຮັບການເພີ່ມທະວີໃນຫຼາຍຂົງເຂດ ໃນໄລຍະຫວ່າງແລ້ວນີ້. ປະຈຸບັນ EU ແມ່ນຕະຫຼາດສົ່ງອອກອັນດັບໜຶ່ງຂອງຫວຽດນາມ. ທ່ານນາງ Catherine Ashton ຢືນຢັນວ່າ EU ໃຫ້ຄຳໝັ້ນສັນຍາ ສືບຕໍ່ໜູນຊ່ວຍຫວຽດນາມ ພັດທະນາ.
“ສັນຍາການຄ້າເສລີລະຫວ່າງຫວຽດນາມ ແລະ EU ຈະແມ່ນກາລະໂອກາດສຳລັບບັນດາວິສາຫະກິດຫວຽດນາມ, ສ້າງບັນດາເງື່ອນໄຂຕະຫຼາດສະດວກສະບາຍ ເພື່ອໃຫ້ສິນຄ້າສົ່ງອອກປະເພດຕ່າງໆຂອງຫວຽດນາມສຳພັດກັບ EU ຢ່າງງ່າຍດາຍ. ບັນດາການເຈລະຈາພວມດຳເນີນໄປດີທີ່ສຸດ ແລະ ຂ້າພເຈົ້າເຊື່ອໝັ້ນວ່າ ບັນດາການເຈລະຈາຈະນຳມາເຊິ່ງໝາກຜົນອັນດີງາມ, ແລະຈະສຳເລັດສັນຍາດັ່ງກ່າວຕາມກຳນົດເວລາໃນທ້າຍປີ 2014 .“
ສອງຝ່າຍກໍ່ພ້ອມກັນແລກປ່ຽນບັນດາບັນຫາຮ່ວມມືຫຼາຍຝ່າຍ, ໃນນັ້ນມີບັນຫາປ້ອງກັນຄວາມສະຫງົບ, ຄວາມປອດໄພຢູ່ທະເລຕາເວັນອອກ. EU ປາດຖະໜາວ່າ ບັນດາຝ່າຍທີ່ກ່ຽວຂ້ອງຊອກຫາວິທີການແກ້ໄຂໂດຍສັນຕິ ຜ່ານການເຈລະຈາ ແລະ ຮ່ວມມື, ເຄົາລົບກົດໝາຍສາກົນ, ພິເສດແມ່ນສົນທິສັນຍາສະຫະປະຊາຊາດກ່ຽວກັບກົດໝາຍວ່າດ້ວຍທະເລປີ 1982. ທ່ານນາງຮອງປະທານ EC ກໍ່ຕີລາຄາສູງບົດບາດຂອງຫວຽດນາມ ໃນອາຊຽນ, ຫວັງວ່າຫວຽດນາມຈະຕັ້ງໜ້າເຂົ້າຮ່ວມບັນດາການເຄື່ອນໄຫວສາກົນ, ໂດຍລະອຽດແມ່ນເຂົ້າຮ່ວມກຳລັງຮັກສາສັນຕິພາບສປຊ.