ທີ່ກອງປະຊຸມສຳມະນາ (ພາບ: VGP)

        ກອງປະຊຸມສຳມະນາສາກົນກ່ຽວກັບ “ການອົບພະຍົບ ແລະ ສຸຂະພາບສຳລັບຊາວອົບພະຍົບໃນ ອາຊຽນ” ຈັດຂຶ້ນໃນຕອນເຊົ້າວັນທີ 26 ມິຖຸນາ, ຢູ່ ຮ່າໂນ້ຍ. ກອງປະຊຸມໄດ້ດຶງດູດການນຳ, ນັກຊ່ຽວຊານ ແລະ ນັກຮຽນຮູ້ຢູ່ພາຍໃນ ແລະ ນອກຂະແໜງສາທາລະນະສຸກກວ່າ 160 ທ່ານ ທີ່ມາຈາກບັນດາປະເທດສະມາຊິກ ອາຊຽນ ເຂົ້າຮ່ວມແບບທາງໄກ ແລະ ເຊິ່ງໜ້າ. ກອງປະຊຸມສຳມະນາໂດຍກະຊວງສາທາລະນະສຸກ ຫວຽດນາມ ສົມທົບກັບຄະນະເລຂາ ອາຊຽນ ຈັດຂຶ້ນ, ດ້ວຍການໜູນຊ່ວຍຂອງອົງການຈັດຕັ້ງສາກົນເພື່ອການເຄື່ອນຍ້າຍຖິ່ນຖານ (IOM) ແລະ ອົງການອະນາໄມໂລກ (WHO).

        ກ່າວຄຳເຫັນຢູ່ທີ່ນີ້, ທ່ານນາງຮອງລັດຖະມົນຕີກະຊວງສາທາລະນະສຸກ ຫວຽດນາມ ຫງວຽນທິລຽນເຮືອງ ເນັ້ນໜັກວ່າ, ກອງປະຊຸມສຳມະນານີ້ແມ່ນກາລະໂອກາດທີ່ດີໃຫ້ແກ່ບັນດາປະເທດສະມາຊິກ ອາຊຽນ ພ້ອມກັນສັງເກດສະພາບການຕົວຈິງ ແລະ ທ່າອ່ຽງອົບພະຍົບໃນພາກພື້ນ ແລະ ໃນໂລກ, ກໍ່ຄືຜົນກະທົບຂອງມັນຕໍ່ການພັດທະນາເສດຖະກິດ - ສັງຄົມ. ຫວຽດນາມ ແລະ IOM ສະໜັບສະໜູນການເພີ່ມທະວີການຮ່ວມມືໃນພາກພື້ນ ເພື່ອຍົກສູງສຸຂະພາບໃຫ້ແກ່ຊາວອົບພະຍົບ.

        ສ່ວນທ່ານນາງ Park Mihyung, ຫົວໜ້າຄະນະຜູ້ຕາງໜ້າ IOM ປະຈຳ ຫວຽດນາມ, ໄດ້ຊົມເຊີຍການຮ່ວມມືລະຫວ່າງ IOM ແລະ ກະຊວງສາທາລະນະສຸກ. ຕາມທ່ານນາງ Park Mihyung ແລ້ວ, ໃນໂລກທີ່ຂະຫຍັນຂັນເຄື່ອນ ພ້ອມກັບຄວາມຕ້ອງການໄປມາທີ່ນັບມື້ນັບສູງຂອງມະນຸດ, ການຮ່ວມມື ແລະ ການພົວພັນຄູ່ຮ່ວມມືຢູ່ພາກພື້ນແມ່ນບັນດາປັດໄຈສຳຄັນ ເພື່ອຍົກສູງສຸຂະພາບ, ການດຳລົງຊີວິດໃຫ້ແກ່ຊາວອົບພະຍົບ.