ຫວຽດນາມ-ການາດາເພີ່ມທະວີການຮ່ວມມືຢ່າງມີປະສິດທິຜົນ,ແທດຈິງແລະໝັ້ນຄົງ
ການພົບປະສົນທະນາ “ພົບປະການາດາ”
(ພາບ: TTXVN)
(vovworld) - ວັນທີ 16/01, ຢູ່ຮ່າໂນ້ຍ, ກະຊວງການຕ່າງປະເທດ ໄດ້ສົມທົບກັບສະຖານທູດການາດາ ປະຈຳຫວຽດນາມ, ຄະນະກຳມະການປະຊາຊົນນະຄອນຮ່າໂນ້ຍ ຈັດການພົບປະສົນທະນາ “ພົບປະການາດາ” ດ້ວຍການເຂົ້າຮ່ວມຂອງຜູ້ແທນ 200 ຄົນທີ່ມາຈາກບັນດາກະຊວງ, ຂະແໜງການສູນກາງ ແລະ ທ້ອງຖິ່ນຕ່າງໆໃນທົ່ວປະເທດ, ຜູ້ຕາງໜ້າປະຊາຄົມວິສາຫະກິດບັນດາພື້ນຖານເສດຖະກິດ APEC, ບັນດາວິສາຫະກິດການາດາ ແລະ ບັນດາອົງການບໍ່ຂຶ້ນກັບລັດຖະບານການາດາ ພວມເຄື່ອນໄຫວຢູ່ຫວຽດນາມ.
ກ່າວຄຳເຫັນທີ່ການພົບປະສົນທະນາ, ທ່ານຮອງລັດຖະມົນຕີການຕ່າງປະເທດ ຮ່າກິມຫງອກ ໃຫ້ຮູ້ວ່າ, ຫວຽດນາມ ຖືເປັນສຳຄັນການເພີ່ມທະວີການພົວພັນມິດຕະພາບ, ການຮ່ວມມືກັບການາດາ. 2 ຝ່າຍໄດ້ວາງຄາດໝາຍໃນໄລຍະ 10 ມາເຖິງຈະບັນລຸວົງເງິນການຄ້າ 2 ສົ້ນ 10 ຕື້ USD. ຫວຽດນາມ ແມ່ນຄູ່ຄ້າໃຫຍ່ສຸດຂອງການາດາ ໃນອາຊຽນ. ກ່ຽວກັບການລົງທຶນ, ການາດາ ຢືນອັນດັບທີ 14/112 ປະເທດ ແລະ ເຂດແຄ້ວນລົງທຶນເຂົ້າຫວຽດນາມ. ທ່ານຮອງລັດຖະມົນຕີການຕ່າງປະເທດ ຮ່າກິມຫງອກ ເນັ້ນໜັກວ່າ, ຫວຽດນາມ ແມ່ນປະເທດເຈົ້າພາບຈັດຕັ້ງ APEC 2017 ແລະ ແມ່ນປະທານກອງປະຊຸມສຸດຍອດ APEC. ຫວຽດນາມ ຕັດສິນໃຈຈັດຕັ້ງປີ APEC 2017 ສຳເລັດຜົນ, ປະກອບສ່ວນຊຸກຍູ້ທ່າອ່ຽງສັນຕິພາບ, ສະຖຽນລະພາບ, ການຮ່ວມມື, ການພັດທະນາຂອງພາກພື້ນ ແລະ ໃນໂລກ.
ສ່ວນຜູ້ຕາງໜ້າບັນດາອົງການບໍ່ຂຶ້ນກັບລັດຖະບານການາດາ ພວມເຄື່ອນໄຫວໃນບັນດາຂົງເຂດໜູນຊ່ວຍການພັດທະນາ, ບຳລຸງສ້າງ, ລົບລ້າງຄວາມອຶດຫິວຫຼຸດຜ່ອນຄວາມທຸກຍາກ ໄດ້ຮັບຂໍ້ມູນຂ່າວຈາກທ້ອງຖິ່ນຕ່າງໆກ່ຽວກັບບັນດາໂຄງການ, ຄວາມຕ້ອງການຮ່ວມມື ເພື່ອແນໃສ່ປະກອບສ່ວນເຂົ້າໃນພາລະກິດພັດທະນາເສດຖະກິດ, ສັງຄົມ ຢູ່ທ້ອງຖິ່ນຕ່າງໆໃນໄລຍະຈະມາເຖິງ.