(VOVWORLD) -ການພົບປະສຸດຍອດລະຫວ່າງ ການນຳ ສປປ ເກົາຫລີ ແລະ ສເກົາຫລີ ດຳເນີນຢູ່ ພຽງຢາງເມື່ອວັນທີ 19 ກັນຍາໄດ້ສິ້ນສຸດຢ່າງຈົບງາມ ໄດ້ເປີດບັນດາກາລະໂອກາດຮ່ວມມື ທີ່ບໍ່ເຄີຍມີມາກ່ອນລະຫວ່າງ ສອງພາກເກົາຫລີ.
ເມື່ອແບ່ງປັນ ທັດສະນະຂອງຫວຽດນາມ ກ່ຽວກັບໝາກຜົນການພົບປະຄັ້ງນີ້, ທີ່ການປະຊຸມຂ່າວນັດສາມັນໃນວັນທີ 20 ກັນຍາ, ຢູ່ ຮ່າໂນ້ຍ, ທ່ານນາງ ເລທິທູຮັ່ງ ໂຄສົກກະຊວງການຕ່າງປະເທດຫວຽດນາມ ໃຫ້ຮູ້ວ່າ:
“ຫວຽດນາມ ຊົມເຊີຍໝາກຜົນການພົບປະຄັ້ງສຸດຍອດລະຫວ່າງສອງພາກເກົາຫລີ ແລະ ເລື່ອງສອງຝ່າຍລົງນາມໃນຖະແຫລງການຮ່ວມພຽງຢາງ, ສະຫນັບສະຫນູນບັນດາຝ່າຍກ່ຽວຂ້ອງຮັກສາການເຈລະຈາ, ພົບປະຂັ້ນສູງ, ມີການກະທຳທີ່ມີລັກສະນະສ້າງສັນ, ແທດຈິງ, ເພື່ອແນໃສ່ປະຕິບັດການປອດນິວເຄຼຍໃນແຫລມເກົາຫລີ, ຊຸກຍູ້ການເຈລະຈາ, ການຮ່ວມມື, ຮັກສາສັນຕິພາບ, ສະຖຽນລະພາບຢູ່ພາກພື້ນ ແລະ ໃນໂລກ.”
ທີ່ການປະຊຸມຂ່າວ, ເມື່ອຕອບຄຳຖາມຂອງນັກຂ່າວກ່ຽວຂ້ອງເຖິງບັນດາການເຄື່ອນໄຫວບົນທະເລຂອງບັນດາກຳປັ່ນຮົບ ອັງກິດ ກໍຄື ຂອງຍີ່ປຸ່ນ ຢູ່ ເຂດທະເລຕາເວັນອອກໃນໄລຍະມໍ່ໆມານີ້, ໂຄສົກກະຊວງການຕ່າງປະເທດຫວຽດນາມ ທ່ານນາງ ເລທິທູຮັ່ງ ໄດ້ຢືນຢັນທັດສະນະສະເຫມີຕົ້ນສະເຫມີປາຍຂອງຫວຽດນາມກ່ຽວກັບອະທິປະໄຕ, ອຳນາດອະທິປະໄຕຢູ່ສອງໝູ່ເກາະຮ່ວາງຊາ ແລະ ເຈື່ອງຊາ. ທ່ານນາງ ເລທິທູຮັ່ງ ພ້ອມທັງຮຽກຮ້ອງບັນດາປະເທດຈົ່ງເຄົາລົບ ແລະ ປະຕິບັດຕາມຂໍ້ກຳນົດຂອງກົດໝາຍສາກົນເມື່ອເຄື່ອນໄຫວຢູ່ເຂດທະເລ ກໍຄືຢູ່ມະຫາສະໝຸດ ເວົ້າລວມ.