(vovworld) – ຕອນຄ່ຳວັນທີ 13/11, ທ່ານນາຍົກລັດຖະມົນຕີ ຫງວຽນເຕີນຢູ້ງ ພ້ອມກັບຄະນະຜູ້ແທນ ຫວຽດນາມ ໄດ້ເດີນທາງອອກຈາກນະຄອນຫຼວງ Nay Pyi Taw, ມຽນມາ, ສິ້ນສຸດການເຂົ້າຮ່ວມກອງປະຊຸມສຸດຍອດ ອາຊຽນ ຄັ້ງທີ 25 ແລະ ບັນດາກອງປະຊຸມສຸດຍອດລະຫວ່າງ ອາຊຽນ ກັບບັນດາຄູ່ຮ່ວມມື.
ເມື່ອຕອບຄຳຖາມຂອງສື່ມວນຊົນກ່ຽວກັບການເຂົ້າຮ່ວມ ແລະ ປະກອບສ່ວນຂອງ ຫວຽດນາມ ເຂົ້າໃນຜົນສຳເລັດຂອງກອງປະຊຸມຄັ້ງຕ່າງໆ, ທ່ານຮອງນາຍົກລັດຖະມົນຕີ, ລັດຖະມົນຕີວ່າການກະຊວງການຕ່າງປະເທດ ຫວຽດນາມ ຟ້າມບິ່ງມິງ ຢັ້ງຢືນດ້ວຍທິດນຳ “ຕັ້ງໜ້າ, ເປັນເຈົ້າການ ແລະ ມີຄວາມຮັບຜິດຊອບ”, ຫວຽດນາມ ສືບຕໍ່ຍົກສູງຄວາມສາມັກຄີ ແລະ ເປັນເອກະພາບອາຊຽນ. ຫວຽດນາມ ກໍ່ມີຂໍ້ສະເໜີສຳຄັນຫຼາຍຢ່າງ ໃນການກຳນົດບັນດາປັດໄຈຕົ້ນຕໍຂອງວິໄສທັດປະຊາຄົມ ອາຊຽນ ໃນປີ 2015, ເປັນພື້ນຖານເພື່ອສືບຕໍ່ສ້າງ, ຫັນບັນດາການກຳນົດທິດພັດທະນາຂອງ ອາຊຽນ ໄລຍະ 2016 – 2025 ເປັນລະອຽດ. ຫວຽດນາມ ກໍ່ສະເໜີຍູ້ແຮງການຮ່ວມມືລະຫວ່າງ ອາຊຽນ ກັບບັນດາຄູ່ຮ່ວມມືໃນການສະກັດກັ້ນ ແລະ ແກ້ໄຂການທ້າທາຍທີ່ພວມວາງອອກຄື: ຄວາມສະຫງົບ, ຄວາມປອດໃນການເດີນທະເລ, ການປ່ຽນແປງຂອງດິນຟ້າອາກາດ… ຢ່າງມີປະສິດທິຜົນ.
ກ່ຽວກັບສະພາບການພາກພື້ນ, ຫວຽດນາມ ພ້ອມກັບບັນດາປະເທດຢັ້ງຢືນຄວາມມຸ່ງມາດປາດຖະໜາລວມຂອງທຸກໆປະເທດພາຍໃນ ແລະ ນອກພາກພື້ນ ແມ່ນຮັບປະກັນສະພາບແວດລ້ອມສັນຕິພາບ, ສະຖຽນລະພາບ ແລະ ການຮ່ວມມືໃນພາກພື້ນ, ໃນນັ້ນມີບັນຫາສັນຕິພາບ, ສະຖຽນລະພາບ, ຄວາມປອດໄພ, ຄວາມເສລີໃນການເດີນທະເລ ແລະ ການບິນຢູ່ທະເລຕາເວັນອອກ. ບັນດາຝ່າຍກ່ຽວຂ້ອງຕ້ອງເຄົາລົບກົດໝາຍສາກົນ, ສົນທິສັນຍາ ສປຊ ກ່ຽວກັບກົດໝາຍວ່າດ້ວຍທະເລປີ 1982 ຢ່າງເຂັ້ມງວດ, ແກ້ໄຂຄວາມຂັດແຍ້ງກັນດ້ວຍສັນຕິວິທີ, ບໍ່ເປີດກ້ວາງ ຫຼື ເຮັດໃຫ້ສະພາບການມີຄວາມເຄັ່ງຕຶງສັບສົນຂຶ້ນຕື່ມ, ປະຕິບັດຖະແຫຼງການກ່ຽວກັບການປະພືດຂອງຝ່າຍຕ່າງໆຢູ່ທະເລຕາເວັນອອກຢ່າງຄົບຖ້ວນ ແລະ ມີປະສິດທິຜົນ ແລະ ບັນລຸໄດ້ປະມວນຂໍ້ກຳນົດກ່ຽວກັບການປະພຶດຢູ່ທະເລຕາເວັນອອກ ໂດຍໄວ. ວິທີສຳພັດຂອງ ຫຽດນາມ ໃນບັນຫານີ້ຢູ່ບັນດາກອງປະຊຸມກ່ຽວຂ້ອງສະແດງລັກສະນະຕັ້ງໜ້າ, ສ້າງສາ ແລະ ມີຄວາມຮັບຜິດຊອບ, ໄດ້ຮັບຄວາມເຫັນດີເຫັນພ້ອມ ແລະ ຕອບສະໜອງຈາກປະເທດຕ່າງໆ.