(vovworld) -ຕອນບ່າຍວັນທີ 5/6 ຢູ່ສຳນັກງານສະພາລັດຖະມົນຕີ ຢູ່ນະຄອນຫລວງ Sofia, ທ່ານນາຍົກລັດຖະມົນຕີ ຫງວຽນເຕີນຢູງ ໄດ້ເຈລະຈາກັບທ່ານນາຍົກລັດຖະມົນຕີ ບຸນກາຣີ Boico Borisov. ນາຍົກລັດຖະມົນຕີທັງສອງທ່ານ ໄດ້ຢືນຢັນ:ສອງປະເທດສືບຕໍ່ເພີ່ມທະວີການຮ່ວມມືໃນທຸກຂົງເຂດເພື່ອຕັ້ງຫນ້າເຮັດໃຫ້ການພົວພັນຫວຽດນາມ - ບຸນກາຣີ ກາຍເປັນການພົວພັນຄູ່ຮ່ວມມືຍຸດທະສາດ. ທ່ານນາຍົກລັດຖະມົນຕີ ຫງວຽນເຕີນຢູງ ຢືນຢັນ: ຫວຽດນາມ ຊົມເຊີຍ ແລະ ໃຫ້ຄຳໝັ້ນສັນຍາສ້າງເງື່ອນໄຂສະດວກໃຫ້ແກ່ບັນດາວິສາຫະກິດ ບຸນກາຣີ ລົງທຶນຢູ່ຫວຽດນາມ.
ກ່າວຄຳເຫັນທີ່ການປະຊຸມຂ່າວຫລັງການເຈລະຈາ, ທ່ານນາຍົກລັດຖະມົນຕີ ບຸນກາຣີ Boico Borisov ຢືນຢັນ: ບຸນກາຣີ ສະຫນັບສະຫນູນ ຫວຽດນາມເພີ່ມທະວີການພົວພັນກັບ ສະຫະພາບເອີລົບ (EU) ແລະ ຈະຊຸກຍູ້ EU ສຳເລັດການໃຫ້ສັດຕະຍາບັນສັນຍາແມ່ ຫວຽດນາມ -EU ກ່ຽວກັບການຮ່ວມມື ແລະ ຄູ່ຮ່ວມມືຮອບດ້ານ. ທ່ານນາຍົກລັດຖະມົນຕີ ຫງວຽນເຕີນຢູງ ແລະ ທ່ານນາຍົກລັດຖະມົນຕີ Boico Borisov ກໍໄດ້ແລກປ່ຽນບາງບັນຫາສາກົນ ແລະ ພາກພື້ນ ທີ່ຕ່າງຝ່າຍຕ່າງມີຄວາມສົນໃຈ. ທ່ານນາຍົກລັດຖະມົນຕີ ຫງວຽນເຕີນຢູງ ເນັ້ນຫນັກວ່າ:
“ຂ້າພະເຈົ້າ ແລະ ທ່ານນາຍົກລັດຖະມົນຕີ Boico Borisov ໄດ້ແລກປ່ຽນບາງບັນຫາສາກົນ ແລະ ພາກພື້ນ, ເປັນຕົ້ນເນັ້ນຫນັກເຖິງຄວາມສຳຄັນຂອງການປົກປັກຮັກສາສັນຕິພາບ, ຊຸກຍູ້ການຮ່ວມມື ແລະ ພັດທະນາໃນໂລກ. ກ່ຽວກັບບັນຫາທະເລຕາເວັນອອກ, ພວກຂ້າພະເຈົ້າເຫັນດີໂດຍຖືວ່າ: ບັນດາຝ່າຍກ່ຽວຂ້ອງຄວນປະຕິບັດກົດໝາຍສາກົນ ແລະ ບັນດາຂໍ້ຕົກລົງຂອງພາກພື້ນຢ່າງເຂັ້ມງວດ.”