ທ່ານ Inacio Arruda ແລະ ທ່ານ ເຈິນວັນຮັ່ງ
(ພາບ: Phương Hoa/TTXVN)
(vovworld) ຕອນບ່າຍວັນທີ 24/11, ທີ່ສຳນັກງານສະພາແຫ່ງຊາດ, ທ່ານຫົວໜ້າກຳມາທິການການຕ່າງປະເທດສະພາແຫ່ງຊາດຫວຽດນາມ ເຈິນວັນຮັ່ງ ໄດ້ໃຫ້ການຕ້ອນຮັບຄະນະຜູ້ແທນກຸ່ມສະມາຊິກສະພາແຫ່ງຊາດມິດຕະພາບ ບຣາຊິນ-ຫວຽດນາມ ໂດຍທ່ານນາງ Jo Maraes, ປະທານກຸ່ມສະມາຊິກສະພາແຫ່ງຊາດມິດຕະພາບ ບຣາຊິນ-ຫວຽດນາມ ເປັນຫົວໜ້າຄະນະ, ພວມຢ້ຽມຢາມ ແລະ ເຮັດວຽກຢູ່ຫວຽດນາມ. ທ່ານຫົວໜ້າກຳມາທິການການຕ່າງປະເທດສະພາແຫ່ງຊາດຫວຽດນາມ ເຈິນວັນຮັ່ງ ເນັ້ນໜັກວ່າ: ຫວຽດນາມ ຍາມໃດກໍ່ຕັ້ງໝັ້ນປະຕິບັດແນວທາງການຕ່າງປະເທດເອກະລາດ, ເປັນເຈົ້າຕົນເອງ, ຫັນເປັນຫຼາຍຮູບຫຼາຍແບບ ແລະ ຫຼາຍຝ່າຍ, ເປັນເພື່ອນມິດກັບບັນດາປະເທດເພື່ອສັນຕິພາບ, ການຮ່ວມມື, ການພັດທະນາ ແລະ ເປັນສະມາຊິກທີ່ໄວ້ເນື້ອເຊື່ອໃຈ, ມີຄວາມຮັບຜິດຊອບຂອງປະຊາຄົມສາກົນ. ຫວຽດນາມ ຖືເປັນສຳຄັນ ແລະ ປາດຖະໜາຢາກເພີ່ມທະວີການພົວພັນມິດຕະພາບ ແລະ ການຮ່ວມມືຮອບດ້ານກັບ ບຣາຊິນ, ຊົມເຊີຍ ແລະ ພ້ອມແລ້ວທີ່ຈະສ້າງເງື່ອນໄຂສະດວກ ເພື່ອໃຫ້ບັນດາວິສາຫະກິດ ບຣາຊິນ ລົງທຶນ ແລະ ຮ່ວມມືດຳເນີນທຸລະກິດຢູ່ຫວຽດນາມ ໃນທຸກຂົງເຂດເຊິ່ງ ບຣາຊິນ ມີທ່າແຮງ. ທ່ານຫົວໜ້າກຳມາທິການການຕ່າງປະເທດສະພາແຫ່ງຊາດຫວຽດນາມ ເຈິນວັນຮັ່ງ ປາດຖະໜາວ່າ: 2 ຝ່າຍເພີ່ມທະວີການແລກປ່ຽນຄະນະຜູ້ແທນທຸກຂັ້ນ, ພິເສດແມ່ນບັນດາຄະນະຜູ້ແທນຂັ້ນສູງ ແລະ ຄະນະສະມາຊິກສະພາແຫ່ງຊາດ 2 ປະເທດ ເພື່ອແລກປ່ຽນວຽກງານວິຊາສະເພາະຂອງລັດຖະສະພາ; ກຸ່ມສະມາຊິກສະພາແຫ່ງຊາດມິດຕະພາບ ບຣາຊິນ-ຫວຽດນາມ ໜູນຊ່ວຍຊຸກຍູ້ລັດຖະບານ ບຣາຊິນ ຮັບຮູ້ກົນໄກເສດຖະກິດຕະຫຼາດຢູ່ຫວຽດນາມ ໂດຍໄວ.