ກອງປະຊຸມCOP20
ພາບ:vietnamplus.vn
|
(vovworld)- ຕອນເຊົ້າວັນທີ 17/12, ຢູ່ ຮ່າໂນ້ຍ, ກະຊວງຊັບພະຍາກອນ ແລະ ສິ່ງແວດລ້ອມຫວຽດນາມ ໄດ້ຈັດການປະຊຸມຂ່າວກ່ຽວກັບໝາກຜົນກອງປະຊຸມບັນດາຝ່າຍເຂົ້າຮ່ວມສົນທິສັນຍາແມ່ຂອງສປຊ ກ່ຽວກັບການປ່ຽນແປງຂອງດິນຟ້າອາກາດ ແລະ ບັນດາເນື້ອໃນອື່ນຢູ່ COP 20 ດຳເນີນໄປຢູ່ນະຄອນຫລວງ Lima, ປະເທດ Peru ແຕ່ວັນທີ 1-12/12. ຄະນະຜູ້ແທນຫວຽດນາມ ໄດ້ເຂົ້າຮ່ວມຢ່າງເປັນເຈົ້າການ, ຕັ້ງຫນ້າໃນການສ້າງຂໍ້ຕົກລົງປີ 2015 ກ່ຽວກັບການຮັບມືກັບການປ່ຽນແປງຂອງດິນຟ້າອາກາດ ແລະ ບັນດາເນື້ອໃນອື່ນທີ່ COP 20. ທ່ານ ຟ້າມວັນເຕີນ, ຮອງຫົວຫນ້າກົມອຸຕຸນິຍົມ ອຸທົກກະສາດ ແລະ ການປ່ຽນແປງຂອງດິນຟ້າອາກາດ, ຮອງຫົວຫນ້າຄະນະເຈລະຈາຂອງຫວຽດນາມ ກ່ຽວກັບການປ່ຽນແປງຂອງດິນຟ້າອາກາດ ໃຫ້ຮູ້ວ່າ:
“ຫວຽດນາມເຂົ້າຮ່ວມທຸກການປຶກສາຫາລືສຳຄັນຂອງກອງປະຊຸມ. ບັນດາການປະກອບສ່ວນຂອງຫວຽດນາມ ໃສ່ຮ່າງເອກະສານກອງປະຊຸມລ້ວນແຕ່ໄດ້ຮັບການຮັບຮູ້ຈາກສາກົນ. ຫວຽດນາມ ມີບົດປາໄສສຳຄັນກ່ຽວຂ້ອງເຖິງບັນດາຄວາມມານະພະຍາຍາມຂອງຫວຽດນາມໃນການຮັບມືກັບການປ່ຽນແປງຂອງດິນຟ້າອາກາດ ແລະ ຮຽກຮ້ອງປະຊາຄົມໂລກຮ່ວມແຮງຮ່ວມໃຈຮັບມືກັບການປ່ຽນແປງຂອງດິນຟ້າອາກາດທົ່ວໂລກ.”