ຫວຽດນາມພ້ອມແລ້ວທີ່ ຈະສົ່ງພົນລະເມືອງຢູ່ ລີບີກັບເມືອປະເທດ
(ພາບ: http://vov.vn)
(vovworld)- ຕອນຄ່ຳວັນທີ 3/8, ສະຖານທູດຫວຽດນາມ ປະຈຳອີຢີບ ໃຫ້ຮູ້ວ່າ, ໃນເວລາ 16 ໂມງຂອງວັນທີ 4/8, ຄົນງານຫວຽດນາມ 28 ຄົນພວມເຮັດວຽກຢູ່ລີບີ ໄປຮອດດ່ານ Salloum ເພື່ອເຂົ້າອີຢີບ. ຈຳນວນກຳມະກອນດັ່ງກ່າວໄປເຮັດວຽກຢູ່ລີບີຕາມສັນຍາກັບບັນດາຄູ່ຮ່ວມມືຕ່າງປະເທດຢູ່ທີ່ນີ້. ບັນດາກຳມະກອນເດີນທາງດ້ວຍທາງບົກຈາກ Benghazi ຊື່ງແມ່ນ 1 ໃນ 2 ສະຖານທີ່ເກີດການສູ້ຮົບຢ່າງໜັກໜ່ວງຢູ່ລີບີ ແລະ ຫ່າງຈາກດ່ານ Salloum ໄປຕາມທິດຕາເວັນອອກ ປະມານ 600 ກມ. ຕອນເຊົ້າວັນທີ 4/8, ຄະນະປະຕິບັດງານພິເສດຄະນະ 1 ຂອງສະຖານທູດພ້ອມກັບບັນດາພະນັກງານໄດ້ເດີນທາງໄປຍັງດ່ານ Salloum ເພື່ອຕ້ອນຮັບບັນດາກຳມະກອນດັ່ງກ່າວ. ພາຍຫຼັງເຮັດສຳເລັດລະບຽບການເຂົ້າອີຢີບ ໃຫ້ແກ່ບັນດາກຳມະການໄດ້, ຄະນະປະຕິບັດງານໄດ້ສົ່ງບັນດາກຳມະກອນກັບເມືອກາຍໂຣ ດ້ວຍທາງບົກ. ທ່ານເອກອັກຄະລັດຖະທູດດ່າວແທງຈູງ ໃຫ້ຮູ້ວ່າ:
“ສະພາບການຢູ່ລີບີປະຈຸບັນມີຄວາມເຄັ່ງຕຶງທີ່ສຸດ. ຫຼາຍປະເທດໄດ້ສົ່ງພົນລະເມືອງກັບເມືອປະເທດແລ້ວ. ສະຖານທູດຫວຽດນາມ ປະຈຳອີຢີບ ຍາມໃດກໍ່ປະຕິບັດແຜນນະໂຍບາຍຂອງພັກ, ລັດຖະບານ ແລະ ກະຊວງການຕ່າງປະເທດກ່ຽວກັບວຽກງານໜູນຊ່ວຍການສົ່ງພົນລະເມືອງຫວຽດນາມ ຈາກລີບີ ກັບເມືອປະເທດຜ່ານອີຢີບ ຢ່າງຖືກຕ້ອງ. ພວກຂ້າພະເຈົ້າໄດ້ກະກຽມທຸກເງື່ອນໄຂດ້ານວັດຖຸຢ່າງຄົບຖ້ວນໃຫ້ແກ່ບັນດາຄົນງານຫວຽດນາມ ຢູ່ກາຍໂຣ ແລະ ຫຼັງຈາກນັ້ນຈະສົ່ງເຂົາເຈົ້າກັບເມືອຫວຽດນາມດ້ວຍຍົນ“.
ຕາມແຜນການ, ວັນທີ 5/8, ບໍລິສັດ Huyndai Amco ຂອງສ.ເກົາຫຼີ ຈະຈັດຖ້ຽວບິນທຳອິດໃນແຜນການສົ່ງກຳມະກອນຫວຽດນາມ 682 ຄົນຈາກລີບີ ໄປອີຢີບ ແລ້ວກັບເມືອຫວຽດນາມ.
ມີປີ້ຍົນໃຫ້ແກ່ບັນດາຄົນງານຫວຽດນາມຈາກລີບີກັບເມືອປະເທດ
ດັ່ງທີ່ພວກເຮົາໄດ້ໃຫ້ຂ່າວໄປແລ້ວ, ວັນທີ 4/8, ຄົນງານຫວຽດນາມ 25 ຄົນພວມເຮັດວຽກຢູ່ລີບີ ໄດ້ເດີນທາງຈາກ Benghazi ໄປຍັງດ່ານ Salloum ເພື່ອເຂົ້າອີຢີບ. ລົດຂອງບັນດາຄົນງານມາຮອດ Salloum ໃນເວລາ 16 ໂມງຕາມເວລາທ້ອງຖິ່ນ. ຄະນະປະຕິບັດງານຂອງສະຖານທູດຫວຽດນາມ ປະຈຳອີຢີບ ໄດ້ຢູ່ດ່ານດັ່ງກ່າວເພື່ອຕ້ອນຮັບບັນດາຄົນງານເຂົ້າເມືອງອີຢີບ. ປະຈຸບັນ, ປີ້ຍົນເມືອຫວຽດນາມ ໃຫ້ແກ່ຄົນງານເຂົ້າເມືອງອີຢີບທັງໝົດກໍ່ມີຢູ່ແລ້ວ. ໃນຕອນບ່າຍຂອງວັນທີ 5/8, ບັນດາຄົນງານຂຶ້ນກັບບໍລິສັດ Simco ແມ່ນ້ຳດ່າ ຈະບິນກັບເມືອຫວຽດນາມ. ຈຳນວນຍັງເຫຼືອຂຶ້ນກັບບໍລິສັດ Vinaconexmex ຈະບິນຫຼັງຈາກນັ້ນມື້ໜຶ່ງ ຄືໃນວັນທີ 6/8./.