ຫວຽດນາມສືບຕໍ່ປັບປຸງສະພາບແວດລ້ອມແຫ່ງການລົງທຶນດຳເນີນທຸລະກິດ
ທ່ານ ມາຍຕ໋ຽນຢຸງ, ລັດຖະມົນຕີ, ຫົວໜ້າຫ້ອງວ່າການສຳນັກງານ
ນາຍົກລັດຖະມົນຕີ, ໂຄສົກຂອງລັດຖະບານ
(vovworld) - ຕາມການຈັດອັນດັບຂອງທະນາຄານໂລກປີ 2016 ກ່ຽວກັບສະພາບແວດລ້ອມແຫ່ງການດຳເນີນທຸລະກິດແລ້ວ, ຫວຽດນາມຖືກຈັດອັນດັບ 82/190 ປະເທດ, ເລື່ອນຂຶ້ນ 9 ຂັ້ນກ່ຽວກັບດັດຊະນີສະພາບແວດລ້ອມແຫ່ງການດຳເນີນທຸລະກິດ. ໝາກຜົນດັ່ງກ່າວສະແດງໃຫ້ເຫັນບັນດາຄວາມມານະພະຍາຍາມຂອງລັດຖະບານ, ບັນດາກະຊວງ, ຂະແໜງການ ແລະ ທ້ອງຖີ່ນກ່ຽວກັບການປັບປຸງສະພາບແວດລ້ອມແຫ່ງການດຳເນີນທຸລະກິດໄດ້ນຳມາເຊິ່ງຜົນງານທີ່ໜ້າຮັບຮູ້. ທ່ານ ມາຍຕ໋ຽນຢຸງ, ລັດຖະມົນຕີ, ຫົວໜ້າຫ້ອງວ່າການສຳນັກງານນາຍົກລັດຖະມົນຕີ, ໂຄສົກຂອງລັດຖະບານ, ໃຫ້ຮູ້ວ່າ, ລັດຖະບານໄດ້ ແລະ ພວມຕັ້ງໜ້າປັບປຸງ ສະພາບແວດລ້ອມແຫ່ງການດຳເນີນທຸລະກິດ, ຍົກສູງກຳລັງແກ່ງແຍ້ງແຫ່ງຊາດ ດ້ວຍຫຼາຍມາດຕະການຄົບຊຸດ ແລະ ລະອຽດ. ນອກນັ້ນ, ລັດຖະບານ, ນາຍົກລັດຖະມົນຕີ ແລະ ບັນດາກະຊວງ, ຂະແໜງການທ້ອງຖີ່ນກໍ່ໄດ້ເອົາໃຈໃສ່ຊີ້ນຳການຈັດຕັ້ງປະຕິບັດ, ນຳເອົານະໂຍບາຍ, ກົດໝາຍເຂົ້າສູ່ຊີວິດ.
ແລະ ກໍ່ຕາມ ທ່ານ ມາຍຕ໋ຽນຢຸງ, ລັດຖະມົນຕີ, ຫົວໜ້າຫ້ອງວ່າການສຳນັກງານນາຍົກລັດຖະມົນຕີ ແລ້ວ, ປີ 2017 ລັດຖະບານຈະສືບຕໍ່ປັບປຸງລະບອບລະບຽບການເພື່ອສ້າງຄວາມສະດວກໃຫ້ບັນດາວິສາຫະກິດ ແລະ ປະຊາຊົນ, ໂດຍລະອຽດແມ່ນປັບປຸງ, ຍື່ນສະເໜີຕໍ່ສະພາແຫ່ງຊາດໂຄງການກົດໝາຍປັບປຸງ, ເພີ່ມເຕີມບາງມາດຕາຂອງກົດໝາຍຕ່າງໆທີ່ກ່ຽວຂ້ອງເຖິງການລົງທຶນ, ດຳເນີນທຸລະກິດ. ປັບປຸງຮ່າງມະຕິຂອງລັດຖະບານກ່ຽວກັບໜ້າທີ່, ມາດຕະການຕົ້ນຕໍເພື່ອປັບປຸງສະພາບແວດລ້ອມແຫ່ງການດຳເນີນທຸລະກິດ, ຍົກສູງຄວາມສາມາດແກ່ງແຍ້ງແຫ່ງຊາດປີ 2017.