ທ່ານ​ນາ​ຍົກ​ລັດ​ຖະ​ມົນ​ຕີ ຫງວຽນ​ເຕີນ​ຢູງ ໄດ້​ມີ​ບົດ​ກ່າວ​ປາ​ໄສ​ທີ່ກອງ​ປະ​ຊຸມ COP 21

(vovworld)-  ​ຕອນ​ເຊົ້າ​ວັນ​ທີ 1/12, ຕາມ​ເວ​ລາ ຫວຽດ​ນາມ ຢູ່ ສູນກອງ​ປະ​ຊຸມ Bourget ນະ​ຄອນ​ຫລວງ ປາ​ຣີ ປະ​ເທດ ຝ​ລັ່ງ, ທ່ານ​ນາ​ຍົກ​ລັດ​ຖະ​ມົນ​ຕີ ຫງວຽນ​ເຕີນ​ຢູງ ໄດ້​ມີ​ບົດ​ກ່າວ​ປາ​ໄສ​ທີ່ກອງ​ປະ​ຊຸມ COP 21 ໂດຍ​ຢືນ​ຢັນ​ວ່າ: ຄຳ​ໝັ້ນ​ສັນ​ຍາ​ດ້ານ​ການ​ເມືອງ​ຢ່າງ​ແຮງ​ຂອງ ລັດ​ຖະ​ບານ ຫວຽດ​ນາມ ແມ່ນ​ສືບ​ຕໍ່​ພ້ອມ​ກັບ​ປະ​ຊາ​ຄົມ​ໂລກ ຮ່ວມ​ແຮງ​ຮ່ວມ​ໃຈ​ມາ​ນະ​ພະ​ຍາ​ຍາມ​ຮ​ັບ​ມື​ກັບ​ການ​ປ່ຽນ​ແປງ​ຂອງ​ດິນ​ຟ້າ​ອາ​ກາດ, ຫວຽດ​ນາມ ສືບ​ຕໍ່ ຕັ້ງ​ຫນ້າ​ຜັນ​ຂະ​ຫຍາຍ​ຍຸດ​ທະ​ສາດ, ໂຄງ​ການ, ແຜນ​ການ ກ່ຽວ​ກັບ​ການ​ຮັບ​ມື​ກັບ​ການ​ປ່ຽນ​ແປງ​ຂອງ​ດິນ​ຟ້າ​ອາ​ກາດ​ໃນ​ຫລາຍ​ຂົງ​ເຂດ ດ້ວຍ​ບັນ​ດາ​ມາດ​ຕະ​ການ​ແທດ​ຈິງ. ຫວຽດ​ນາມ ຈະ​ປະ​ກອບ 1 ລ້ານ USD ເຂົ້າ​ກອງ​ທຶນ​ອາ​ກາດ ໄລ​ຍະ 2016-2010.

ສຳ​ລັບ​ໄລ​ຍະ​ຫລັງ​ປີ 2020, ທ່ານ​ນາ​ຍົກ​ລັດ​ຖະ​ມົນ​ຕີ ຫງວຽນ​ເຕີນ​ຢູງ ຊີ້​ແຈ້ງວ່າ: ເຖິງວ່າ​ແມ່ນ​ປະ​ເທດ​ພວມ​ພັດ​ທະ​ນາ ແລະ ຍັງ​ປະ​ສົບ​ກັບ​ຄວາມ​ຫຍຸ້ງ​ຍາກ​ຫລາຍ​ຢ່າງ, ຖືກ​ຜົນ​ກະ​ທົບ​ຢ່າງ​ແຮງ​ຈາກ​ການ​ປ່ຽນ​ແປງ​ຂອງ​ດິນ​ຟ້າ​ອາ​ກາດ, ຫວຽດ​ນາມ ມີ​ຄຳ​ໝັ້ນ​ສັນ​ຍາ​ຫລຸດ​ຜ່ອນ 8% ປະ​ລິ​ມານ​ການ​ປ່ອຍ​ອາຍ​ພິດ​ເຮືອນ​ແກ້ວ​ໃນ​ປີ 2030 ແລະ 25% ຖ້າ​ໄດ້​ຮັບ​ການ​ຫນູນ​ຊ່ວຍ​ຢ່າງ​ມີ​ປະ​ສິດ​ທິ​ຜົນ​ຈາກ​ປ​ະ​ຊາ​ຄົມ​ສາ​ກົນ. ທ່ານນ​າ​ຍົກ​ລັດ​ຖະ​ມົນ​ຕີ ຫງວຽນ​ເຕີ​ນ​ຢູງ ເນັ້ນ​ຫນັກ​ວ່າ:

        “ສະ​ມັດ​ຊາ​ໃຫຍ່ ສ​ປ​ຊ ໄດ້​ຮັບ​ຮອງ​ເອົາ​ໂຄງ​ການ​ດຳ​ເນີນ​ງານ 2030 ເພື່ອ​ການ​ພັດ​ທະ​ນາ​ແບບ​ຍືນ​ຍົງ. ເພື່ອ​ຜັນ​ຂະ​ຫຍາຍ​ໂຄງ​ການນີ້​ສຳ​ເລັດ​ຜົນ ຮຽກ​ຮ້ອງ​ພວກ​ເຮົາ​ຕ້ອງ​ມີ​ຄວາມ​ຕັດ​ສິນ​ໃຈ​ດ້ານ​ການ​ເມືອງ​ຢ່າງ​ແຮງ ແລະ ການ​ຮ່ວມ​ມື​ຢ່າງ​ແຫ​ນ້ນ​ແຟ້ນ​ໃນ​ການ​ປະ​ຕິ​ບັດ​ຂໍ້​ຕົກ​ລົງ​ກ່ຽວ​ກັບ​ອາ​ກາດ​ທົ່ວ​ໂລກ​ຫລັງ​ປີ 2020 ຢ່າງ​ເຂັ້ມ​ງວດ, ຄົບ​ຖ້ວນ ແລະ ມີ​ປະ​ສິດ​ທິ​ຜົນ.”