ການຕ້ອນຮັບໃນວັນທີ 27/4
(vovworld) - ວັນທີ 27/4, ທີ່ການຕ້ອນຮັບທ່ານ ເປິ໋ງຈິງຄວາ, ເລຂາຄະນະພັກເຂດປົກຄອງດ້ວຍຕົນເອງຊົນເຜົ່າຈວາງ, ແຂວງກວາງສີ, ຈີນ, ທີ່ພວມຢ້ຽມຢາມ ຫວຽດນາມ, ທ່ານ ຫງວຽນຊວນຟຸກ, ນາຍົກລັດຖະມົນຕີ ຫວຽດນາມ ເນັ້ນໜັກວ່າ, ກວາງສີ ແມ່ນທ້ອງຖິ່ນທີ່ມີສາຍພົວພັນມິດຕະພາບທີ່ເປັນມູນເຊື້ອກັບ ຫວຽດນາມ, ທັງມີບົດບາດສຳຄັນທີ່ສຸດໃນການປັບປຸງ ແລະ ພັດທະນາການພົວພັນຖານບ້ານໃກ້ເຮືອນຄຽງມິດຕະພາບ, ການຮ່ວມມືຮອບດ້ານລະຫວ່າງສອງປະເທດ, ດັ່ງນັ້ນສອງຝ່າຍຄວນສືບຕໍ່ສົມທົບກັນຢ່າງແໜ້ນແຟ້ນ, ກະກຽມບັນດາການເຄື່ອນໄຫວແລກປ່ຽນຄະນະຜູ້ແທນໃນປີນີ້ໃຫ້ດີ; ພ້ອມທັງເປີດກ້ວາງການຮ່ວມມືຢ່າງແທດຈິງໃນບັນດາຂົງເຂດການຄ້າ, ການລົງທຶນ ແລະ ການເຊື່ອມຕໍ່ໂຄງລ່າງຄົມມະນາຄົມ. ທ່ານນາຍົກລັດຖະມົນຕີຫວັງວ່າ, ອຳນາດການປົກຄອງແຂວງ ກວາງສີ ສົ່ງເສີມບັນດາວິສາຫະກິດນຳເຂົ້າຜະລິດຕະພັນກະເສດ, ເຄື່ອງປ່າຂອງດົງ, ສິນໃນນຳ້ຂອງຫວຽດນາມ, ປະກອບສ່ວນຊຸກຍູ້ການຮ່ວມມືດ້ານການຄ້າ ຫວຽດນາມ - ຈີນໃຫ້ພັດທະນາຢ່າງສົມດຸນ, ໝັ້ນຄົງ, ເຮັດໃຫ້ການເຄື່ອນໄຫວພົບປະແລກປ່ຽນປະຊາຊົນລະຫວ່າງສອງປະເທດເລິກເຊິ່ງກວ່າອີກ. ທ່ານນາຍົກລັດຖະມົນຕີກໍ່ສະເໜີສອງຝ່າຍເພີ່ມທະວີການຮ່ວມມືຄຸ້ມຄອງເຂດຊາຍແດນ, ປະຕິບັດສັນຍາຮ່ວມມືປົກປັກຮັກສາ ແລະ ຂຸດຄົ້ນຊັບພະຍາກອນດ້ານການທ່ອງທ່ຽວຢູ່ເຂດນຳ້ຕົກຕາດ ບ້ານຢົກ, ສັນຍາກ່ຽວກັບເຮືອ, ຊຸກຍູ້ການຮ່ວມມືທາງດ້ານເສດຖະກິດ - ການຄ້າ ແລະ ການທ່ອງທ່ຽວຢູ່ເຂດຊາຍແດນ; ພ້ອມກັນກໍ່ສ້າງເສັ້ນຊາຍແດນສັນຕິພາບ, ສະຖຽນລະພາບ, ຮ່ວມມື ແລະ ພັດທະນາ.
ໃນວັນດຽວກັນທ່ານນາຍົກລັດຖະມົນຕີ ຫງວຽນຊວນຟຸກ ກໍ່ມີການຕ້ອນຮັບທ່ານ ເຈິ໋ນໝິນອໍ, ເລຂາຄະນະພັກແຂວງ ໄກວເຈົາ, ແຫ່ງປະເທດຈີນ. ທ່ານນາຍົກລັດຖະມົນຕີຊົມເຊີຍການຍູ້ແຮງການຮ່ວມມືທາງດ້ານເສດຖະກິດ - ການຄ້າ ແລະ ການລົງທຶນລະຫວ່າງ ໄກວເຈົາ ແລະ ບັນດາທ້ອງຖີ່ນຂອງຫວຽດນາມ… ທ່ານນາຍົກລັດຖະມົນຕີສະເໜີແຂວງ ໄກວເຈົາສົ່ງເສີມແລະຊຸກຍູ້ບັນດາວິສາຫະກິດທີ່ມີກຳລັງຄວາມສາມາດຂອງແຂວງລົງທຶນເຂົ້າ ຫວຽດນາມ ກໍ່ຄືບັນດາວິສາຫະກິດ ຫວຽດນາມລົງທຶນເຂົ້າແຂວງ ໄກວເຈົາ. ສ່ວນທ່ານ ເຈິ໋ນໝິນອໍ ກໍ່ຢືນຢັນວ່າ, ການເຄື່ອນໄຫວຮ່ວມມືດ້ານການສຶກສາກັບ ຫວຽດນາມ ແມ່ນບຸລິມະສິດຂອງ ໄກວເຈົາ, ດັ່ງນັ້ນ, ໄກວເຈົາ ຈະສືບຕໍ່ສະຫງວນທຶນສຶກສາ ແລະ ສ້າງເງື່ອນໄຂສະດວກໃຫ້ນັກສຶກສາ ຫວຽດນາມ ໃນການຮຳ່ຮຽນ ແລະ ດຳລົງຊີວິດຢູ່ແຂວງນີ້.