(vovworld) –  ​ ​ ​​ໃນ​ຂອບ​ເຂດ​ການ​ຢ້ຽມຢາມ ​ແລະ ​ເຮັດ​ວຽກ​ຢູ່​ສິງກະ​ໂປ​ແຕ່​ວັນ​ທີ 04-06/01, ທ່ານ​ປະທານ​ສານ​ປະຊາຊົນ​ສູງ​ສຸດ​ຫວຽດນາມ ​ເຈືອງ​ຮ່ວາ​ບິງ ​ໄດ້​ມີ​ການ​ພົບ​ປະ​ກັບ​ທ່ານ​ປະທານສານ ສິງກະ​ໂປ Sundaresh Menon. 2 ຝ່າຍ​ເຫັນ​ດີ​ສືບ​ຕໍ່​ເພີ່ມ​ທະວີ​ການ​ພົວພັນ​ຮ່ວມ​ມື 2 ຝ່າຍ​ລະຫວ່າງ​ລະບົບ​ສານ ຫວຽດນາມ ​ແລະ ສິງກະ​ໂປ ​ເພື່ອ​ສົມ​ກັບສາຍ​ພົວພັນ​ຮ່ວມ​ມື, ມິດຕະພາບ​ລະຫວ່າງ 2 ​ປະ​ເທດ. ປະທານ​ສານທັງ​ 2 ທ່ານ ​ໄດ້​ຕົກລົງ​ຈະ​​ລົງ​ນາມ​ໃນ​ບົດ​ບັນທຶກ​ຊ່ວຍ​ຈຳ​​ການ​ຮ່ວມ​ມື 2 ຝ່າຍ ລະຫວ່າງ 2 ສານ​ສູງ​ສຸດ​ໂດຍ​ໄວ, ສ້າງ​ພື້ນຖານ​ໝັ້ນ​ຄົງ​ໃຫ້ການ​ເຄື່ອນ​ໄຫວ​ຮ່ວມ​ມື​ຕ່າງໆຄື: ​ແລກປ່ຽນ​ບັນດາ​ຄະນະ​ຜູ້​ແທນ​ຂັ້ນ​ສູງ ​ແລະ ຂັ້ນ​ຊ່ຽວຊານ, ບຳລຸງ​ສ້າງ​ຜູ້​ພິພາກສາ ​ແລະ ພະນັກງານ​ສານ, ​ເພີ່ມ​ທະວີ​ການນຳ​ໃຊ້​ເຕັກ​ໂນ​ໂລ​ຊີ ຂໍ້​ມູນ​ຂ່າວສານ​ໃນ​ການ​ເຄື່ອນ​ໄຫວ​ຂອງ​ສານ, ຈັດ​ຕັ້ງ​ບັນດາ​ກອງ​ປະຊຸມ ​ແລະ ກອງ​ປະຊຸມ​ສຳ​ມະ​ນາສາ​ກົນ​ລວມ​ໃນ​ບັນດາ​ຂົງ​ເຂດ​ເຊິ່ງຕ່າງ​ຝ່າຍ​ຕ່າງ​ມີ​ຄວາມ​ສົນ​ໃຈ. 2 ຝ່າຍ​​ເຫັນ​ດີຈະບົ່ງ​ຕົວຂອດ​ຕິດ​ຕໍ່​ສື່ສານ, ສ້າງ​ກຸ່ມ​ຜູ້​ພິພາກສາ​​ສົມທົບກັນ​ຄົ້ນ​ຄ້ວາ​ບັນ​ດາຂົງ​ເຂດ ​ແລະ ການ​ເຄື່ອນ​ໄຫວ​ຮ່ວມ​ມື, ຍົກ​ອອກ​ຂໍ້​ສະ​ເໜີ​ໂດຍ​ໄວ ​ເພື່ອ​​ໃຫ້ ປະທານ​ສານ 2 ທ່ານ​ຮັບຮອງ​ເອົາ​ໃນ​ການ​ພົບ​ປະ​ຢູ່​ນອກ​ກອງ​ປະຊຸມ​ປະທານສານ​ບັນດາ​ປະ​ເທດ​ສະມາຊິກ​ອາ​ຊຽນຈະ​ມາ​ເຖິງ.

         ​ເລື່ອງ​ເພີ່ມ​ທະວີ​ການ​ພົວພັນ​ຮ່ວມ​ມື​ກັບ​ສານ​ສູງ​ສຸດ​ສິງກະ​ໂປ ມີ​ຄວາມ​ໝາຍ​ເພີ່ມ​ທະວີ​ນ້ຳ​ໃຈ​ສາມັກຄີ​ພາຍ​ໃນ​ກຸ່ມອາ​ຊຽນ ຕາມ​ທິດ​ກໍ່ສ້າງປະຊາ​ຄົມ​ເສດຖະກິດ ອາ​ຊຽນ, ປະກອບສ່ວນ​ຢ່າງ​ຕັ້ງໜ້າ​ເຂົ້າ​ໃນ​ການ​ປັບປຸງ​ລະບົບ​ສານ​ຫວຽດນາມ​ ຕາມ​​ເນື້ອ​ໃນ​ຈິດໃຈ​ລັດຖະທຳ​ມະນູນ​ປີ 2013 ​ແລະ ກົດໝາຍ​ວ່າ​ດ້ວຍ​ການ​ສານ​ປະຊາຊົນ​ປີ 2014.