(vovworld) - ເພື່ອກະກຽມໃຫ້ກອງປະຊຸມສະໄໝສາມັນເທື່ອທີ 7 ສະພາແຫ່ງຊາດຫວຽດນາມຊຸດທີ 13, ວັນທີ 26/04, ທ່ານນາງ ຮ່າທິຄ໋ຽດ, ຫົວໜ້າຄະນະຂົນຂວາຍປະຊາຊົນສູນກາງ, ພ້ອມກັບບັນດາສະມາຊິກສະພາແຫ່ງຊາດຊຸດທີ 13 ແຂວງຮ່າຢາງ ໄດ້ມີການພົບປະກັບຜູ້ມີສິດເລືອກຕັ້ງຕາແສງ ຫຼາກນົງ ແລະ ສູນກາງເມືອງບັ໋ກເມ. ທີ່ການພົບປະ, ບັນດາຜູ້ມີສິດເລື່ອກຕັ້ງສະແດງຄວາມເຊື່ອໝັ້ນຕໍ່ການຊີ້ນຳ, ນຳພາຂອງພັກ, ລັດ, ສະພາແຫ່ງຊາດ ເຊິ່ງໄດ້ມີບັນດາການປ່ຽນໃໝ່ທີ່ສຳຄັນ ເພື່ອຍົກສູງຄຸນນະພາບການເຄື່ອນໄຫວດ້ານກົດໝາຍ, ຕິດຕາມກວດກາສູງສຸດ ແລະ ຕັດສິນໃຈບັນດາບັນຫາໃຫຍ່ຂອງຊາດ. ພ້ອມກັນນັ້ນ, ບັນດາຜູ້ມີສິດເລືອກຕັ້ງກໍ່ສະເໜີບາງບັນຫາທີ່ກ່ຽວຂ້ອງເຖິງການຮັບປະກັນຊີວິດສັງຄົມ, ນະໂຍບາຍລົງທຶນຂອງພັກ, ລັດ ສຳລັບຊີວິດການເປັນຢູ່ຂອງປະຊາຊົນ... ທີ່ການພົບປະ, ທ່ານນາງຮ່າທິຄ໋ຽດ ສະເໜີໃຫ້ທ້ອງຖິ່ນ ກວດກາຄືນ, ແກ້ໄຂບັນດາຂໍ້ສະເໜີ, ຄວາມປາດຖະໜາອັນຊອບທຳຂອງຜູ້ມີສິດເລືອກຕັ້ງຢ່າງສົມເຫດສົມຜົນ. ທ່ານນາງຮ່າທິຄ໋ຽດ ຢືນຢັນວ່າ: ດ້ວຍໜ້າທີ່ຮັບຜິດຊອບຂອງຕົນ, ຄະນະສະມາຊິກສະພາແຫ່ງຊາດຊຸດທີ 13 ແຂວງຮ່າຢາງ ຈະຄົ້ນຄວ້າ, ລວບລວມຄຳເຫັນ, ຂ້ໍສະເໜີຂອງຜູ້ມີສິດເລືອກຕັ້ງຢ່າງຄົບຖ້ວນ ເພື່ອສົ່ງເຖິງບັນດາກະຊວງ, ຂະແໜງການທີ່ກ່ຽວຂ້ອງເພື່ອແກ້ໄຂໃນໄລຍະຈະມາເຖິງ.