ຫາງສຽງສາກົນກ່າວປະນາມຢ່າງຮຸນແຮງການກະທຳຂອງຈີນ ຢູ່ທະເລຕາເວັນອອກ
(ພາບປະກອບ)
(vovworld) – ຫາງສຽງສາກົນສືບຕໍ່ສະແດງຄວາມວິຕົກກັງວົນກ່ຽວກັບການຜັນແປພວມປິນຂັ້ນໄດຢູ່ທະເລຕາເວັນອອກ, ລະອຽດແມ່ນ ຈີນ ໄດ້ປະກາດແຜນທີ່, ໃນນັ້ນໄດ້ນຳບັນດາບໍລິເວນທະເລ, ໝູ່ເກາະເກືອບທັງໝົດຢູ່ທະເລຕາເວັນອອກເຂົ້າອັນທີ່ເອີ້ນວ່າ “ອະທິປະໄຕ” ເຊິ່ງປັກກິງ ໄດ້ທວງເອົາກຳມະສິດ, ລ່ວງລ້ຳອະທິປະໄຕ, ສິດອະທິປະໄຕ, ສິດອຳນາດສານຂອງບັນດາປະເທດຢູ່ແຄມທະເລຕາເວັນອອກຢ່າງຮ້າຍແຮງ.
ຖະແຫຼງການຂອງກະຊວງການຕ່າງປະເທດ ຟີລິບປີນ ໃນວັນທີ 26/06, ເນັ້ນໜັກວ່າ ແຜ່ນທີ່ໃໝ່ມີ ເສັ້ນ 10 ຕອນຂອງຈີນ ຢູ່ທະເລຕາເວັນອອກແມ່ນ “ຄວາມມັກໃຫຍ່ໄພສູງແຜ່ກ້ວາງທີ່ໄຮ້ເຫດຜົນ”, ໄປຝືນກັບກົດໝາຍສາກົນ ແລະ ລະເມີດສົນທິສັນຍາສະຫະປະຊາຊາດກ່ຽວກັບກົດໝາຍວ່າດ້ວຍທະເລປີ 1982 ເຊິ່ງຈີນ ແມ່ນຝ່າຍເຂົ້າຮ່ວມ. ໜັງສືພິມລາຍວັນ Inquirer ຂອງຟີລິບປີນ ກໍ່ໄດ້ຄັດຄຳເວົ້າຂອງຜູ້ຊ່ຽວຊານໃຫ້ຂໍ້ສັງເກດວ່າ ນີ້ແມ່ນການກະທຳເກາະຜິດໃໝ່ຂອງຈີນ, ສືບຕໍ່ບັນດາການກະທຳເປີດກວ້າງ, ກໍ່ສ້າງຢ່າງຜິດກົດໝາຍຢູ່ບັນດາເກາະຫີນຂຶ້ນກັບໝູ່ເກາະເຈື່ອງຊາ ຂອງຫວຽດນາມ, ເພື່ອແນໃສ່ຮັບໃຊ້ກົນອຸບາຍຢືດຄອງທະເລຕາເວັນອອກ.
ວັນທີ 26/06, ເວັບໄຊຂອງ ວິທະຍຸກະຈາຍສຽງອາເມລິກາ (VOA) ກໍ່ໄດ້ມີບົດກ່ຽວກັບບັນຫາທະເລຕາເວັນອອກ, ຖືວ່າ ບັນດາຄວາມເຄັ່ງຕຶງຢູ່ທະເລຕາເວັນອອກ ຍັງບໍ່ທັນມີສັນຍານຈະຫຼຸດລົງ. ຜູ້ຊ່ວຍວຽກລັດຖະມົນຕີການຕ່າງປະເທດອາເມລິກາ ຮັບຜິດຊອບພາກພື້ນອາຊີຕາເວັນອອກ Daniel Russe ໄດ້ກ່າວຕຳໜີຕິຕຽນບັນດາການກະທຳຫວ່າງມໍ່ໆມານີ້ຂອງຈີນ ຢູ່ທະເລຮວາຕຸງ ແລະ ທະເລຕາເວັນອອກ, ເນັ້ນໜັກວ່າ ນີ້ແມ່ນການກະທຳບໍ່ຖືເປັນສຳຄັນບັນດາມາດຕະການທາງດ້ານການທູດ ແລະ ສັນຕິພາບໃນການແກ້ໄຂບັນດາຄວາມບໍ່ລົງລອຍກັນ ແລະ ການຂັດແຍ້ງ.
ປະຊາຄົມໂລກສືບຕໍ່ກ່າວປະນາມຢ່າງຮຸນແຮງການກະທຳທີ່ໄຮ້ເຫດຜົນຂອງຈີນ. ໃນການຕອບສຳພາດກັບໜັງສືພິມລາຍວັນ La Croix, ຜູ້ຊ່ຽວສານຝລັ່ງ Valeria Niquet, ຫົວໜ້າຮັບຜິດຊອບພາກສ່ວນອາຊີ ຂອງສະຫະສະມາຄົມຄົ້ນຄວ້າຍຸດທະສາດ FRS ຖືວ່າ, ຈີນພວມນຳໃຊ້ກົນອຸບາຍມັກໃຫຍ່ ໄພສູງມີກຳມະສິດຢ່າງສົມບູນສຳລັບທະເລຕາເວັນອອກ ແລະ ທະເລຮວາຕຸງ ເພື່ອປົກປິດສະພາບຂາດສະຖຽນລະພາບພາຍໃນປະເທດ.