ພາບປະກອບ
(vovworld) - ວັນທີ 18/11, ຢູ່ຮ່າໂນ້ຍ, ກົມສົ່ງເສີມການຄ້າ (ກະຊວງອຸດສາຫະກຳ ແລະ ການຄ້າ) ໄດ້ສົບທົບກັບສະຖານທູດອາເມລິກາ ປະຈຳ ຮ່າໂນ້ຍຈັດຕັ້ງກອງປະຊຸມສຳມະນາ “ການຄ້າຫວຽດນາມ-ອາເມລິກາ ກ່ອນທີ່ຈະດຳເນີນສັນຍາ TPP: ແງ່ຫວັງ ແລະ ສິ່ງທ້າທາຍ”. ຕາມຕົວເລກສະຖິຕິຂອງກົມສົ່ງເສີມການຄ້າ-ກະຊວງອຸດສາຫະກຳ ແລະ ການຄ້າແລ້ວ, ມາຮອດປະຈຸບັນ, ອາເມລິກາມີໂຄງການລົງທຶນເຂົ້າຫວຽດນາມ 107 ໂຄງການ, ດ້ວຍເງິນລົງທຶນກ່ວາ 20 ຕື້ USD. ປີ 2013, ວົງເງິນຂາເຂົ້າຂາອອກ ລະຫວ່າງ 2 ປະເທດບັນລຸເກືອບ 28 ຕື້ USD. ໄລ່ຮອດເດືອນ 10 ຜ່ານມາ, ຫວຽດນາມສົ່ງອອກເກີນດູນຍັງອາເມລິກາບັນລຸເກືອບ 19 ຕື້ USD. ໃນນັ້ນ, ຕຳ່ແຜ່ນຕັດຫຍິບນຳໜ້າກ່ຽວກັບວົງເງິນການຄ້າ, ຖັດມາແມ່ນເກີບ, ເຄື່ອງເຟີນີເຈີ ແລະ ເຄື່ອງປະດັບປະດາ, ເຄື່ອງກົນຈັກ, ເຄື່ອງເອເລກໂຕນິກ… ບັນດາຕົວເລກນີ້ສະແດງໃຫ້ເຫັນຄວາມສາມາດບົ່ມຊ້ອນໃນການຮ່ວມມືລະຫວ່າງ 2 ປະເທດຍັງຫຼາຍຢູ່, ພິເສດເມື່ອສັນຍາຄູ່ຮ່ວມມືເສດຖະກິດຂ້າມປາຊີຟິກ ໄດ້ຮັບການລົງນາມໃນເດືອນ 12 ຈະມາເຖິງ. ລະດັບພາສີອາກອນຈະຫຼຸດລົງ 0%, ສິນຄ້າຫຼາຍຢ່າງມີທ່າໄດ້ປຽບໃນການແກ່ງແຍ້ງດີກ່ວາ. ຕາມທ່ານຫງວຽນຮົ່ງເຢືອງ, ຮອງຫົວໜ້າກົມກົມຕະຫຼາດທະວີບອາເມລິກາ, ກະຊວງອຸດສາຫະກຳ ແລະ ການຄ້າ ແລ້ວ, ຄຽງຂ້າງບັນດາບຸລິມະສິດທີ່ໄດ້ຊົມໃຊ້ເມື່ອເຂົ້າຮ່ວມສັນຍາຄູ່ຮ່ວມມືເສດຖະກິດຂ້າມປາຊີຟິກ ວິສາຫະກິດຫວຽດນາມ ກໍ່ຈະປະສົບກັບຮົ້ວກີດຂວາງ ດ້ານການຄ້າຫຼາຍຢ່າງ ເມື່ອສົ່ງອອກສິນຄ້າໄປຍັງຕະຫຼາດອາເມລິກາ. ສະນັ້ນ, ວິສາຫະກິດຄວນເປັນເຈົ້າການລົງທຶນໃຫ້ເຕັກໂລໂນຊີຜະລິດ, ຕອບສະໜອງຄວາມຮຽກຮ້ອງຕ້ອງການຮັບປະກັນສິ່ງແວດລ້ອມ ແລະ ນຳໃຊ້ແຮງງານ.