ອັດກອງປະຊຸມກຸ່ມບັນດາທີ່ປຶກສາ AIPA Caucus ຄັ້ງທີ 5
(ພາບ: vietnamplus.vn)
(vovworld)- ພາຍຫລັງດຳເນີນການເຮັດວຽກເປັນເວລາ 2 ມື້, ກອງປະຊຸມຄັ້ງທີ 5 ກຸ່ມທີ່ປຶກສາສະມັດຊາລັດຖະສະພາລະຫວ່າງຊາດອາຊຽນ (AIPA Caucus) ໄດ້ອັດລົງໃນຕອນບ່າຍວັນທີ 13/5 ຢູ່ນະຄອນດ່າລາດ ແຂວງເລີມດົ່ງ. ກອງປະຊຸມໄດ້ລາຍງານໝາກຜົນແຫ່ງການຜັນຂະຫຍາຍການປະຕິບັດມະຕິຂອງກອງປະຊຸມໃຫ່ຍ AIPA ຄັ້ງທີ 33 ແລະ ປຶກສາຫາລື 2 ຫົວເລື່ອງຄື: ການເຕີບໂຕຂຽວ ແລະ ຫລຸດຜ່ອນຄວາມທຸກຍາກເພື່ອການພັດທະນາແບບຍືນຍົງ. ບັນດາຜູ້ແທນໄດ້ເນັ້ນຫນັກເຖິງການຮ່ວມມືຢ່າງແໜ້ນແຟ້ນ, ແບ່ງປັນຂໍ້ມູນຂ່າວສານລະຫວ່າງບັນດາປະເທດ ແລະ ພາກພື້ນເພື່ອແລກປ່ຽນບົດຮຽນໃນວຽກງານນິຕິບັນຍັດ ແລະ ການສ້າງລະບົບກົດໝາຍແຕ່ລະປະເທດ. ກ່າວຄຳເຫັນທີ່ກອງປະຊຸມ, ທ່ານເລເລືອງມິງ ເລຂາທິການໃຫ່ຍອາຊຽນ ຖືວ່າ:
“ຄວາມມຸ້ງຫວັງລວມຂອງພວກເຮົາ ນັ້ນແມ່ນປັບປຸງຄຸນນະພາບຊີວິດໃຫ້ປະຊາຄົມທີ່ມີພົນລະເມືອງກ່ວາ 600 ລ້ານຄົນ. ໃນນັ້ນ, ຕ້ອງຮັບປະກັນການຮັກສາລະບົບຊີວະພາບ ແລະ ສິ່ງດັ່ງກ່າວຮຽກຮ້ອງໃຫ້ມີຄວາມມານະພະຍາຍາມຮ່ວມມືຂອງທຸກຝ່າຍທີ່ກ່ຽວຂ້ອງ. ກອງປະຊຸມຄັ້ງນີ້ຈະປະກອບສ່ວນເຂົ້າໃນການເພີ່ມທະວີຂັ້ນຕອນນິຕິບັນຍັດ ແລະ ບັນດານະໂຍບາຍ, ຂໍ້ລິເລີ່ມໃນພາກພື້ນກ່ວາອີກ ແລະ ແບ່ງປັນບົດຮຽນກ່ຽວກັບການລົບລ້າງຄວາມອຶດຫິວ ຫລຸດຜ່ອນຄວາມທຸກຍາກ ແລະ ການປົກປັກຮັກສາສິ່ງແວດລ້ອມ“.
ທີ່ກອງປະຊຸມ, ບັນດາຜູ້ແທນໄດ້ພິຈາລະນາ ແລະ ຮັບຮອງເອົາບົດລາຍງານສະບັບສຸດທ້າຍຂອງກອງປະຊຸມກຸ່ມທີ່ປຶກສາ AIPA ຄັ້ງທີ 5. ກ່າວຄຳເຫັນອັດກອງປະຊຸມ, ທ່ານເຈີ່ນວັນຮັ່ງ, ປະທານກຳມາທິການການຕ່າງປະເທດ ສະພາແຫ່ງຊາດຫວຽດນາມ, ປະທານກອງປະຊຸມກຸ່ມທີ່ປຶກສາ AIPA ຄັ້ງທີ 5 ຢືນຢັນວ່າ: ບັນດາຂໍ້ສະເໜີຈະແມ່ນພື້ນຖານສຳຄັນເພື່ອລາຍງານຕໍ່ກອງປະຊຸມໃຫ່ຍ AIPA ຄັ້ງທີ 34 ຈະມາເຖິງ:
“ການເຂົ້າຮ່ວມ ແລະ ປະກອບຄຳເຫັນຢ່າງຕັ້ງໜ້າຂອງບັນດາປະເທດສະມາຊິກເຂົ້າຮ່ວມກອງປະຊຸມຄັ້ງນີ້ ໄດ້ສະແດງໃຫ້ເຫັນຄວາມເອົາໃຈໃສ່ລວມຂອງບັນດາປະເທດ AIPA ກ່ຽວກັບບັນຫາຫລຸດຜ່ອນຄວາມທຸກຍາກແບບຍືນຍົງ ແລະ ການເຕີບໂຕຂຽວ. ຂໍ້ສະເໜີຂອງບັນດາຜູ້ແທນທີ່ກອງປະຊຸມຈະແມ່ນພື້ນຖານສຳຄັນເພື່ອລາຍງານຕໍ່ກອງປະຊຸມໃຫ່ຍ AIPA ຄັ້ງທີ 34 ຢູ່ບຣູໄນ ເພື່ອສ້າງ ແລະ ຮັບຮອງເອົາມະຕິສະບັບຕ່າງໆ ແລະ ສະເໜີໃຫ້ບັນດາລັດຖະສະພາສະມາຊິກ ເພີ່ມທະວີວຽກງານນິຕິບັນຍັດເພື່ອແນໃສ່ພັດທະນາແບບຍືນຍົງໃນໄລຍະຈະມາເຖິງ. ປະກອບສ່ວນສ້າງປະຊາຄົມອາຊຽນ ສຳເລັດ, ມຸ້ງໄປສູ່ຈຸດໝາຍສັນຕິພາບ, ການຮ່ວມມື, ພັດທະນາເພື່ອປະຊາຊົນປະເທດຕ່າງໆໃນພາກພື້ນ“.