ປະຊາຊົນແຫ່ຂະບວນປະທ້ວງຄັດຄ້ານແຜນການປະຕິຮູບຕຸລາການ (ພາບ:Hazem Bader/AFP)

ວັນທີ 27 ມີນາ, ທ່ານນາຍົກລັດຖະມົນຕີ ອິດສະຣາແອນ Benjamin Netanyahu ມີບົດກ່າວປາໄສຕໍ່ປະຊາຊົນປະເທດນີ້, ໃນນັ້ນທ່ານໄດ້ປະກາດໂຈະການຊຸກຍູ້ແຜນການປະຕິຮູບຕຸລາການທີ່ໄດ້ກໍ່ໃຫ້ເກີດຄວາມຖົກຖຽງກັນໃນກ່ວາ 10 ອາທິດຜ່ານມາຢ່າງເປັນທາງການ.

        ຕາມທ່ານ Netanyahu ແລ້ວ, ເລື່ອງໂຈະແຜນການປະຕິຮູບຕຸລາການແມ່ນຈຳເປັນເພື່ອສືບຕໍ່ໂອ້ລົມສົນທະນາຢ່າງກ້ວາງຂວາງໃນໝູ່ປະຊາຊົນ ແລະ ຫຼີກລ້ຽງໄພເກີດສົງຄາມກາງເມືອງຢູ່ປະເທດນີ້. ທ່ານ Netanyahu ກໍ່ໃຫ້ຮູ້ວ່າ ສຳພັນທະມິດໃນສະຫະພັນກຳອຳນາດ “ເກືອບທັງໝົດ” ໄດ້ສະໜັບສະໜູນການກະທຳນີ້.

        ກ່ອນໜ້ານັ້ນ, ທ່ານ Netanyahu ກໍ່ໄດ້ເຊັນຂໍ້ຕົກລົງກັບທ່ານລັດຖະມົນຕີປ້ອງກັນຄວາມສະຫງົບແຫ່ງຊາດ Itamar Ben – Gvir ແລະ ທ່ານປະທານພັກ Otzma Yehudit ກ່ຽວກັບເລື່ອງໂຈະແຜນການປະຕິຮູບຕຸລາການ. ທ່ານນາຍົກລັດຖະມົນຕີ Netanyahu ກໍ່ຕ້ອງໃຫ້ຄຳໝັ້ນສັນຍາຈະນຳແຜນການດັ່ງກ່າວມາລົງປະຊາມະຕິໃນກອງປະຊຸມຄັ້ງຕໍ່ໄປຂອງ Knesset, ຄາດວ່າຈັດຂຶ້ນໃນຕົ້ນລະດູຮ້ອນປີນີ້.

        ແລະ ກໍ່ໃນວັນທີ 27 ມີນາ, ລັດຖະບານສະຫະພັນຂອງທ່ານນາຍົກລັດຖະມົນຕີ ອິດສະຣາແອນ Benjamin Netanyahu ໄດ້ຜ່ານການປ່ອນບັດບໍ່ໄວ້ວາງໃຈ 2 ຄັ້ງແມ່ນໂດຍຝ່າຍຄ້ານຍື່ນສະເໜີທີ່ສະພາແຫ່ງຊາດ ເຊິ່ງກ່ຽວຂ້ອງເຖິງແຜນການປະຕິຮູບຕຸລາການ. ການປ່ອນບັດຈັດຂຶ້ນໃນສະພາບການທີ່ມີປະຊາຊົນກ່ວາ 6 ແສນຄົນໄດ້ເຂົ້າຮ່ວມການແຫ່ຂະບວນປະທ້ວງໃນທົ່ວປະເທດເມື່ອວັນທີ 26 ແລະ ຮຸ່ງເຊົ້າວັນທີ 27 ມີນາ, ພາຍຫຼັງ ທ່ານນາຍົກລັດຖະມົນຕີ Netanyahu ປົດຕຳແໜ່ງທ່ານລັດຖະມົນຕີກະຊວງປ້ອງກັນປະເທດ Yoav Gallant, ສະມາຊິກຂັ້ນສູງໃນພັກ Likud ຂອງທ່ານນາຍົກລັດຖະມົນຕີ Netanyahu ແລະ ແມ່ນເຈົ້າໜ້າທີ່ຂັ້ນສູງສຸດໃນລັດຖະບານຄັດຄ້ານແຜນການປະຕິຮູບຕຸລາການ.