ທ່ານ Nasser Kanaani, ໂຄສົກກະຊວງການຕ່າງປະເທດ ອີຣານ (ພາບ: Tehrantimes)

ວັນທີ 17 ສິງຫາ, ທ່ານ Nasser Kanaani, ໂຄສົກກະຊວງການຕ່າງປະເທດ ອີຣານ ໄດ້ປະກາດວ່າ: ປະເທດນີ້ໄດ້ກຽມພ້ອມແລກປ່ຽນນັກໂທດກັບ ອາເມລິກາ. ແທນທີ່ນັ້ນ, ອາເມລິກາ ຕ້ອງປ່ອຍຕົວເປັນອິດສະຫຼະໃຫ້ແກ່ບັນດາພົນລະເມືອງ ອີຣານ ທີ່ຖືກຈຳຄຸກໂດຍບໍ່ມີເງື່ອນໄຂໃດໆ. ອຳນາດການປົກຄອງ ເຕເຮຣານ ພວມຊຸກຍູ້ເພື່ອໃຫ້ຊາວ ອີຣານ 10 ຄົນທີ່ຖືກຈັບຕົວຢູ່ ອາເມລິກາ ໄດ້ປ່ອຍຕົວເປັນອິດສະຫຼະ. ໃນຂະນະນັ້ນ, ວັນທີ 16 ສິງຫາ, ທ່ານລັດຖະມົນຕີການຕ່າງປະເທດ ອາເມລິກາ Antony Blinken ມີບົດຂຽນໃນສື່ສັງຄົມ Twitter ໂດຍເນັ້ນໜັກວ່າ: ວໍຊິງຕັນ ຕັດສິນໃຈທວງເອົາອິດສະຫຼະໃຫ້ແກ່ຊາວ ອາເມລິກາ ທຸກຄົນທີ່ຖືກຈັບຕົວຢູ່ ອີຣານ.

        ການກະທຳດັ່ງກ່າວໄດ້ດຳເນີນໄປໃນສະພາບການທີ່ບັນດາຝ່າຍພວມຊອກຫາວິທີຟື້ນຟູຂໍ້ຕົກລົງນິວເຄຼຍ ທີ່ລົງນາມລະຫວ່າງອີຣານ ແລະ ບັນດາປະເທດ ມະຫາອຳນາດເມື່ອປີ 2015, ພາຍຫຼັງທີ່ ອາເມລິກາ ຖອນຕົວອອກຈາກຂໍ້ຕົກລົງໃນປີ 2018 ແລະ ໄດ້ຈັດວາງການລົງໂທດ ຕາເຮຣານ ຄືນໃໝ່. ຮອບເຈລະຈາຄັ້ງທີ 8 ກ່ຽວກັບການຟື້ນຟູຂໍ້ຕົກລົງໄດ້ເຊື່ອມຕໍ່ຄືນໃໝ່ຢູ່ ວຽນນາ (ປະເທດ ໂອຕຣິດ) ໃນວັນທີ 4 ສິງຫາ ຜ່ານມາ, ເຊິ່ງເປັນຄັ້ງທຳອິດ ນັບແຕ່ເດືອນ ມີນາ ປີນີ້. ວັນທີ 8 ສິງຫາ, ສະຫະພາບເອີລົບ (EU) ໄດ້ຍົກອອກຮ່າງເອກະສານສະບັບສຸດທ້າຍ ແລະ ພວມລໍຄອຍຄຳຕັດສິນຂອງບັນດາຝ່າຍທີ່ກ່ຽວຂ້ອງ. ວັນທີ 16 ສິງຫາ, ອີຣານ ໄດ້ຮັບຮູ້ການມອບເອກະສານຕອບຄືນກ່ຽວກັບຮ່າງຂໍ້ຕົກລົງນີ້ ແລະ EU ພວມຄົ້ນຄ້ວາຄຳຕອບຂອງ ອີຣານ ຢູ່.