ຕອນເຊົ້າວັນທີ 30 ມັງກອນ ຕາມເວລາ ອາເມລິກາ (ກົງກັບຕອນຄໍ່າວັນທີ 30 ມັງກອນ - ຕາມເວລາຫວຽດນາມ), ບັນດາເຈົ້າໜ້າທີ່ ອາເມລິກາ ແລະ ຈີນ ໄດ້ດໍາເນີນການເຈລະຈາດ້ານການຄ້າຂັ້ນສູງຮອບໃໝ່ ຢູ່ນະຄອນຫຼວງ ວໍຊິງຕັນ ເພື່ອແນໃສ່ແກ້ໄຂບັນດາຄວາມບໍ່ລົງລອຍກັນ ແລະ ຄວາມແຕກຕ່າງກັນທີ່ກ່ຽວຂ້ອງເຖິງສໍາລັບບັນດານະໂຍບາຍຊັບສິນທາງປັນຍາ ແລະ ການຖ່າຍທອດເຕັກໂນໂລຢີ ຂອງ ປັກກິ່ງ. ການເຈລະຈາຮອບໃໝ່ລະຫວ່າງບັນດາຄະນະປະຕິບັດງານຂອງ ອາເມລິກາ ໂດຍ ທ່ານ Robert Lighthizer ຜູ້ ຕາງໜ້າດ້ານການຄ້ານໍາໜ້າ ແລະ ຄະນະປະຕິບັດງານຂອງຈີນ ໂດຍທ່ານ ຮອງນາຍົກລັດຖະມົນຕີຈີນ ຫຼຽວເຄືອ ເປັນຫົວໜ້າຄະນະ ເຊິ່ງຄາດວ່າຈະດໍາເນີນເປັນເວລາ 02 ວັນ.

        ນີ້ແມ່ນການເຈລະຈາຂັ້ນສູງສຸດ ລະຫວ່າງສອງຝ່າຍຢູ່ທໍານຽບຂາວ ນັບແຕ່ເມື່ອທ່ານປະທານາທິບໍດີ ອາເມລິກາ Donald Trump ແລະ ທ່ານປະທານປະເທດຈີນ ສີຈີ້ນຜິງ ໄດ້ເຫັນດີ “ຢຸດຕິສົງຄາມການຄ້າ” ເປັນເວລາ 90 ວັນ ເມື່ອເດືອນທັນວາ ປີ 2018 ເພື່ອດໍາເນີນການເຈລະຈາ ດ້ານການຄ້າແນໃສ່ຢຸດຕິຄວາມເຄັ່ງຕຶງທີ່ແກ່ຍາວມາເປັນເວລາຫຼາຍເດືອນຜ່ານມາ. ເຖິງຢ່າງໃດກໍຕາມ, ຄວາມຮຽກຮ້ອງຕ້ອງການຂອງ ອາເມລິກາ ສໍາລັບ ຈີນ ໃນການປະຕິບັດການປະຕິຮູບໂຄງປະກອບເສດຖະກິດ ພວມສ້າງຄວາມຫຍຸ້ງຍາກໃຫ້ສອງປະເທດມະຫາອໍານາດ ເສດຖະກິດແຖວໜ້າໃນໂລກ ໃນເລື່ອງບັນລຸໄດ້ຂໍ້ຕົກລົງກ່ອນຈຸດເວລາ ອາເມລິກາ ຂຶ້ນອັດຕາພາສີໃນວັນທີ 02 ມີນາ ຈະມາເຖິງ. ປັດຈຸບັນ, ບັນດານັກຊ່ຽວຊານດ້ານການຄ້າ ໃຫ້ຂໍ້ສັງເກດວ່າ ສັນຍານທີ່ສະແດງໃຫ້ເຫັນວ່າ ບັນດາເຈົ້າໜ້າທີ່ ຈີນ ພ້ອມແລ້ວທີ່ຈະຕອບສະໜອງບັນດາຄວາມຮຽກຮ້ອງຕ້ອງການພື້ນຖານຂອງ ອາເມລິກາ ກ່ຽວກັບການປົກປ້ອງສິດຊັບສິນທາງປັນຍາ, ກໍຄື ຢຸດຕິບັນດານະໂຍບາຍ ເຊິ່ງ ວໍຊິງຕັນ ຖືວ່າ ແມ່ນເພື່ອບັງຄັບໃຫ້ບັນດາບໍລິສັດຂອງປະເທດນີ້ ຖ່າຍທອດເຕັກໂນໂລຢີໃຫ້ບັນດາຄູ່ຮ່ວມມືຂອງຈີນນັ້ນແມ່ນມີໜ້ອຍທີ່ສຸດ.