ໃນສື່ສັງຄົມ ອອນລາຍ Twitter, ວັນທີ 04 ທັນວາ, ທ່ານປະທານາທິບໍດີ ອາເມລິກາ Donald Trump ພວມຊັງຊາຕໍ່ການແກ່ຍາວ “ຂໍ້ຕົກລົງຢຸດຕິສົງຄາມການຄ້າ” ເຊິ່ງທ່ານ ແລະ ທ່ານປະທານປະເທດ ຈີນ ສີຈີີ້ນຜິງ ໄດ້ເຫັນດີນໍາກັນໃນທ້າຍອາທິດຜ່ານມາ ທີ່ການພົບປະຢູ່ນອກກອງປະຊຸມສຸດຍອດ G20.

        ວັນທີ 01 ທັນວາ, ທ່ານປະທານາທິບໍດີ ອາເມລິກາ Donald Trump ແລະ ທ່ານປະທານປະເທດ ຈີນ ສີຈີ້ນຜິງ ໄດ້ເຫັນດີຍົກເລີກການຈັດວາງອັດຕາພາສີເພີ່ມເຕີມ ໃນຂະນະທີ່ສອງປະເທດ ຈະດໍາເນີນບັນດາການເຈລະຈາ ເພື່ອແນໃສ່ບັນລຸໄດ້ຂໍ້ຕົກລົງການຄ້າພາຍໃນ 90 ວັນ. ຕາມນັ້ນແລ້ວ, ອາເມລິກາ ຍົກເລີກການເພີ່ມອັດຕາພາສີ ແຕ່ 10% ໃນປັດຈຸບັນ ຂຶ້ນເປັນ 25% ສໍາລັບສິນຄ້າຮັບເໝົານໍາເຂົ້າຈາກຈີນ ທີ່ມີມູນຄ່າ 200 ຕື້ USD. ກົງກັນຂ້າມ, ຈີນໄດ້ເຫັນດີຊື້ສິນຄ້າຜະລິດຕະພັນກະເສດ, ພະລັງງານ ແລະ ບັນດາຜະລິດຕະພັນອື່ນໆ ຂອງ ອາເມລິກາ ເປັນປະລິມານຫຼາຍ ເພື່ອແນໃສ່ຫຼຸດຜ່ອນການຂາດດຸນການຄ້າສອງຝ່າຍ, ພ້ອມທັງຈະພິຈາລະນາການອະນຸມັດຜ່ານຂໍ້ຕົກລົງຊື້ຄືນບໍລິສັດ NXP ຂອງນັກຜະລິດ chip ອາເມລິກາ Qualcomm. ໄປຄຽງຄູ່ກັນນັ້ນ, ປັກກິ່ງ ກໍເຫັນດີຫຼຸດຜ່ອນ ແລະ ຍົກເລີກການຈັດວາງອັດຕາພາສີສໍາລັບປະເພດສິນຄ້າລົດໂອໂຕ ທີ່ ຈີນ ນໍາເຂົ້າຈາກ ອາເມລິກາ ລົງຕໍ່າກວ່າລະດັບ 40% ໃນປັດຈຸບັນ.

        ເຖິງຢ່າງໃດກໍຕາມ, ຖ້າຫາກພາຍໃນ 90 ວັນ, ວົງການເຈົ້າໜ້າທີ່ສອງປະເທດບໍ່ບັນລຸໄດ້ຂໍ້ຕົກລົງກ່ຽວກັບບັນດາບັນຫາການຄ້າ ຄືການຖ່າຍທອດເຕັກໂນໂລຢີ, ຊັບສິນທາງປັນຍາ, ຮົ້ວກີດຂວາງຍົກເວັ້ນພາສີອາກອນ, ການລັກເອົາເຕັກໂນໂລຢີ ແລະ ກະສິກໍາ, ສອງຝ່າຍເຫັນດີ ໃຫ້ ອາເມລິກາ ເພີ່ມອັດຕາພາສີ ແຕ່ 10% ຂຶ້ນເຖິງລະດັບ 25%.