ທ່ານລັດຖະມົນຕີການຕ່າງປະເທດ ອາເມລີກາ Anthony Blinken

ໃນການເຈລະຈາທາງ ໂທລະສັບ, ທ່ານລັດຖະມົນຕີການຕ່າງປະເທດ ອາເມລີກາ Anthony Blinken ໄດ້ວາງອອກບາງບຸລິມະສິດທີ່ສຳຄັນຂອງອຳນາດການປົກຄອງໃໝ່ຂອງ ປະທານາທິບໍດີ ໂຈໄບດັນ, ໃນນັ້ນ ມີການຢຸດຕິການສູ້ຮົບຢູ່ ເຢແມນ. ສອງຝ່າຍຍັງປຶກສາຫາລື ກ່ຽວກັບຄວາມມານະພະຍາຍາມ ຕ້ານກໍ່ການຮ້າຍ ແລະ ການຮ່ວມມື ແນໃສ່ສະກັດກັ້ນບັນດາການປຸກໂຈມຕີຕ້ານ ຊາອຸດິ ອາຣັບເບຍ. ໃນຂະນະນັ້ນ ສຳນັກຂ່າວສານ ຊາອຸດິ ອາຣັບເບຍ SPA ໄດ້ໃຫ້ຂ່າວວ່າ ນີ້ແມ່ນການປຶກສາຫາລືຄັ້ງທຳອິດ ລະຫວ່າງລັດຖະມົນຕີການຕ່າງປະເທດອາເມລິກາ Anthony Blinken ແລະ ລັດຖະມົນຕີການຕ່າງປະເທດ ຊາອຸດິ ອາຣັບເບຍ Faisal bin Farhan Al Saud.  ທ່ານລັດຖະມົນຕີການຕ່າງປະເທດ ຊາອຸດິ ອາຣັບເບຍ ໄດ້ອວຍພອນທ່ານລັດຖະມົນການຕ່າງປະເທດ ອາເມລິກາ ໄດ້ຮັບການແຕ່ງຕັ້ງເປັນລັດຖະມົນຕີ ການຕ່າງປະເທດ ເມື່ອອາທິດແລ້ວນີ້ ພ້ອມທັງຢືນຢັນວ່າ ຊາອຸດິ ອາຣັບເບຍ ມີຄວາມຫວັງຢາກຮ່ວມມືກັບອາເມລິກາ ແນໃສ່ຮັບມືກັບບັນດາສິ່ງທ້າທາຍຮ່ວມ ແລະ ຮັກສາສະຖຽນລະພາບໃນພາກພື້ນ.