(vovworld) –  ວັນ​ທີ 29/5, ອາ​ເມ​ລິ​ກາ ​ໄດ້​ອອກສຽງ​ກ່າວ​ເຕືອນ ຈີນ ຫຼີກ​ລ້ຽງການ​ກໍ່​ຄວາມ​ເຄັ່ງ​ຕຶງ​ໃນ​ເຂດ​ນ່ານຟ້າ​ສາກົນ ພາຍຫຼັງ​ທີ່ ຍີ່ປຸ່ນ ກ່າ​ວຫາ​ວ່າ: ປັກ​ກິ່ງ ມີ​ “ບັນດາ​ການ​ກະທຳ​ອັນຕະລາຍ” ​ໃນ​ບັນດາ​ເຂດ​ຂັດ​ແຍ້​ງຢູ່​ທະ​ເລ​ຕາ​ເວັນ​ອອກ. ​ໃນ​ຖະ​ແຫຼ​ງການສະບັບໜຶ່ງ, ​ໂຄສົກ​ກະຊວງ​ການ​ຕ່າງປະ​ເທດ ອ​າ​ເມ​ລິ​ກາ ທ່ານນາງ Jen Psaki ຢືນຢັນ​ວ່າ: ວໍ​ຊິງ​ຕັນ ບໍ່​ຮັບ​ຮອງເຂດ​ປ້ອງ​ກັນ​ອາກາດ (ADIZ) ໃນພາກພື້ນນີ້, ໂດຍ ຈີນ ສ້າງຕັ້ງພຽງລຳພັງຝ່າຍດຽວໃນທ້າຍເດືອນ 11/2013, ພ້ອມທັງກະຕຸກຊຸກຍູ້ ປັງກິ່ງ ປະລະແຜນການຜັນຂະຫຍາຍ ADIZ ຢ່າງວ່ອງໄວ. ທ່ານນາງ Jen Psaki ຢືນຢັນຄືນໃໝ່ວ່າ: ຈີນ ຕ້ອງຮ່ວມມືກັບປະເທດອື່ນໆໃນພາກພື້ນ ເພື່ອແນໃສ່ສ້າງຕັ້ງບັນດາມາດຕະການສ້າງຄວາມໄວ້ເນື້ອເຊື່ອໃຈ, ໃນນັ້ນລວມມີ ບັນດາ ຊ່ອງຂໍ້ມູນຂ່າວສານດ່ວນ ເພື່ອຫລຸດຜ່ອນຄວາມອັນຕະລາຍ ແລະ ຫລຸດຜ່ອນຄວາມເຄັ່ງຕຶງ. ກໍ່ໃນຖະແຫຼງການຂອງກະຊວງການຕ່າງປະເທດ ອາເມລິກາ ແລ້ວ, ທ່ານນາງ Jen Psaki  ເນັ້ນໜັກວ່າ: ບໍ່ວ່າຄວາມມານະພະ ຍາຍາມໃດໆເພື່ອແນໃສ່ສະກັດກັ້ນການຈໍລະຈອນຢ່າງເສລີໃນເຂດນ່ານຟ້າສາກົນລ້ວນແຕ່ກໍ່ໃຫ້ເກີດຄວາມເຄັ່ງຕຶງໃນພາກພື້ນ, ພາໄປເຖິງບັນດາເຫດການເປັນ ໜ້າເສຍດາຍ. ທ່ານນາງ ຮຽກຮ້ອງໃຫ້ບັນດາຝ່າຍກ່ຽວຂ້ອງພ້ອມກັນເຄົາລົບ ແລະ ປົກປັກຮັກສາຄວາມສະຫງົບທາງອາກາດໃນພາກພື້ນນີ້.