(vovworld) - ໂດຍສືບຕໍ່ການຢ້ຽມຢາມສັນຖະວະໄມຕີ ບຸນກາລີ ຢ່າງເປັນທາງການ, ວັນທີ 3/9, ທ່ານຮອງນາຍົກລັດຖະມົນຕີ Nguyen Thien Nhan ໄດ້ມີການເຈລະຈາກັບທ່ານຮອງນາຍົກລັດຖະມົນຕີ ທັງເປັນລັດຖະມົນຕີການເງິນບຸນກາລີ Simeon Diankov. ທີ່ການເຈລະຈາ, ທ່ານຮອງນາຍົກລັດຖະມົນຕີ Nguyen Thien Nhan ໄດ້ຖືວ່າ ເລື່ອງສອງຝ່າຍຫາກໍຈັດຕັ້ງສະໄໝປະຊຸມຄັ້ງທີ 22 ຄະນະກຳມະການລະຫວ່າງລັດຖະບານຫວຽດນາມ - ບຸນກາລີ (6/2012) ສຳເລັດຜົນນັ້ນແມ່ນພື້ນຖານທີ່ສະດວກເພື່ອໃຫ້ສອງຝ່າຍສືບຕໍ່ຮ່ວມມືໃນທຸກຂົງເຂດຢ່າງຮອບດ້ານ. ຈາກນັ້ນ, ບັນດາກະຊວງ, ຂະແໜງການຂອງສອງປະເທດຄວນຕັ້ງໜ້າສົມທົບກັນຜັນຂະຫຍາຍໝາກຜົນກອງປະຊຸມເພື່ອມີບັນດາລາຍການ, ໂຄງການຮ່ວມມືຢ່າງລະອຽດ, ແທດຈິງ ເພື່ອຜົນປະໂຫຍດຂອງສອງປະເທດຢ່າງມີປະສິດທິຜົນ. ທ່ານຮອງນາຍົກລັດຖະມົນຕີ ທັງເປັນລັດຖະມົນຕີການເງິນບຸນກາລີ Simeon Diankov ກໍຢືນຢັນວ່າ ດ້ວຍມູນເຊື້ອມິດຕະພາບອັນດີງາມລະຫວ່າງຫວຽດນາມ - ບຸກາລີ, ແນ່ນອນວ່າບັນດາການພົວພັນດ້ານເສດຖະກິດຈະສືບຕໍ່ໄດ້ຮັບການພັດທະນາບົນພື້ນຖານບັນດາວິສາຫະກິດຂະໜາດໃຫຍ່ຂອງບຸນກາລີ ພວມມີຄວາມສົນໃຈເຖິງຕະຫຼາດຫວຽດນາມ. ທ່ານຮອງນາຍົກລັດຖະມົນຕີ Simeon Diankov ໄດ້ເຫັນດີຕໍ່ບັນດາຂໍ້ສະເໜີກ່ຽວກັບການຮ່ວມມືດ້ານສຶກສາ, ວັດທະນະທຳ, ສິລະປະລະຫວ່າງບັນດາກະຊວງ, ຂະແໜງການຂອງສອງປະເທດ, ເຊິ່ງຈະປະຕິບັດໃນໄລຍະຈະມາເຖິງ.
ແລະກໍໃນວັນດຽວກັນ, ທ່ານຮອງນາຍົກລັດຖະມົນຕີ Nguyen Thien Nhan ໄດ້ມີການພົບປະກັບທ່ານລັດຖະມົນຕີການຕ່າງປະເທດ Nicolai Mladenov, ໄປຢ້ຽມຢາມໂຮງງານພະລິດຢາສັກຂອງບໍລິສັດການຢາ SOFARMA, ຢ້ຽມຢາມສູນສັງລວມກ່ຽວກັບ Wellrods ຂອງມະຫາວິທະຍາໄລສັງລວມ Sofia.