ໃນຂອບເຂດການຢ້ຽມຢາມ, ຕອນບ່າຍວັນທີ 25 ພຶດສະພາ (ຕາມເວລາທ້ອງຖິ່ນ), ຢູ່ສຳນັກງານສະພາແຫ່ງຊາດ ປັອກຕຸຍການ, ທ່ານ ຟ້າມ ບິ່ງມິງ ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ຫວຽດນາມ ໄດ້ພົບປະແລກປ່ຽນຄວາມເຫັນກັບ ທ່ານ Eduardo Ferro Rodrigues ປະທານສະພາແຫ່ງຊາດ ປັອກຕຸຍການ. ນະທີ່ນີ້, ທ່ານ ຟ້າມບິ່ງມິງ ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ຫວຽດນາມ ຕີລາຄາສູງບົດບາດຂອງ ປັອກຕຸຍການ ໃນສະຫະພາບເອີຣົບ (EU) ກໍ່ຄືໃນວຽກງານເຂົ້າຮ່ວມແກ້ໄຂບັນດາບັນຫາລວມຂອງປະຊາຄົມສາກົນ; ສະເໜີໃຫ້ສອງປະເທດສືບຕໍ່ສະໜັບສະໜູນເຊິ່ງກັນ ແລະ ກັນຢູ່ບັນດາເວທີປາໄສຫຼາຍຝ່າຍ. ຮອງນາຍົກລັດຖະມົນຕີ ຫວຽດນາມ ສະເໜີໃຫ້ ສະພາແຫ່ງຊາດ ປັອກຕຸຍການ ສະໜັບສະໜູນ ແລະ ສົ່ງເສີມ ວິສາຫະກິດ ປັອກຕຸຍການ ເພີ່ມທະວີການຮ່ວມມືດຳເນີນທຸລະກິດ ແລະ ລົງທຶນ ຢູ່ ຫວຽດນາມ; ຢືນຢັນວ່າ ຫວຽດນາມ ໄດ້ສ້າງເງື່ອນໄຂສະດວກ ໃຫ້ແກ່ການເຄື່ອນໄຫວຂອງວິສາຫະກິດຕ່າງປະເທດຢູ່ຫວຽດນາມ ເລື້ອຍໆ.

        ສ່ວນ, ທ່ານ Eduardo Ferro Rodrigues ປະທານສະພາແຫ່ງຊາດ ປັອກຕຸຍການ ຕີລາຄາສູງບົດບາດ ແລະ ທີ່ຕັ້ງ ຂອງຫວຽດນາມຢູ່ໃນພາກພື້ນອາຊີຕາເວັນອອກສ່ຽງໃຕ້ ແລະ ຢັ້ງຢືນວ່າ ສະພາແຫ່ງຊາດ ປັອກຕຸຍການ ສະໜັບສະໜູນວຽກງານພັດທະນາການພົວພັນຮ່ວມມືຫຼາຍດ້ານກັບ ຫວຽດນາມ, ພິເສດແມ່ນການຮ່ວມມືດ້ານເສດຖະກິດ, ການຄ້າ ແລະ ວັດທະນະທຳ - ການທ່ອງທ່ຽວ. ປະທານສະພາແຫ່ງຊາດ ໃຫ້ຮູ້ວ່າ ສະພາແຫ່ງຊາດ ປັອກຕຸຍການ ພ້ອມແລ້ວທີ່ຈະຮ່ວມມື, ແບ່ງປັນບົດຮຽນໃນການເຄື່ອນໄຫວ ນິຕິບັນຍັດ ແລະ ຕິດຕາມກວດກາ ກັບສະພາແຫ່ງຊາດຫວຽດນາມ, ສະໜັບສະໜູນເລື່ອງລົງນາມ ແລະ ເຊັນອະນຸມັດ ສັນຍາການຄ້າເສລີ ຫວຽດນາມ - ເອີຣົບ ໂດຍໄວ.