ວັນທີ 15 ພະຈິກ, ຢູ່ສຳນັກງານລັດຖະບານ, ທ່ານຮອງນາຍົກລັດຖະມົນຕີຫວຽດນາມ ຈິ້ງດິ່ງຢຸງ ໄດ້ໃຫ້ການຕ້ອນຮັບທ່ານ Scott Kicker, ຜູ້ອຳນວຍການໃຫຍ່ບໍລິສັດ Gen X Energy (ອາເມລິກາ). ນີ້ແມ່ນວິສາຫະກິດພວມຊອກຮູ້ກາລະໂອກາດລົງທຶນໃນໂຄງການໄຟຟ້າອາຍແກັດ LNG ດ້ວຍຍອດເງິນລົງທຶນທັງໝົດຫຼາຍກວ່າ 6 ຕື້ USD.

        ທີ່ການຕ້ອນຮັບ, ທ່ານຮອງນາຍົກລັດຖະມົນຕີ ຈິ້ງດິ່ງຢຸງ ຊີ້ແຈ້ງວ່າ, ໃນໄລຍະຜ່ານມາ, ການພົວພັນຄູ່ຮ່ວມມືຮອບດ້ານລະຫວ່າງຫວຽດນາມ - ອາເມລິກາ ສືບຕໍ່ໄດ້ຮັບການພັດທະນາຢ່າງແທດຈິງ ແລະ ມີປະສິດທິຜົນໃນທັງ 3 ຂົງເຂດ 2 ຝ່າຍ, ພາກພື້ນ ແລະ ທົ່ວໂລກ. ໃນຂົງເຂດພະລັງງານ, ປະຈຸບັນ 2 ປະເທດໄດ້ລົງນາມໃນບົດບັນທຶກຊ່ວຍຈຳຮ່ວມມື, ພ້ອມທັງມີບັນດາກົນໄກຮ່ວມມື, ເຈລະຈາເພື່ອເພີ່ມທະວີການຮ່ວມມືລະຫວ່າງ 2 ປະເທດ. ທ່ານຮອງນາຍົກລັດຖະມົນຕີ ໃຫ້ຮູ້ວ່າ, ຄຽງຂ້າງການພັດທະນາພະລັງງານຜະລິດຄືນໃໝ່, ຫວຽດນາມ ກໍ່ຈະພັດທະນາບັນດາແຫຼ່ງພະລັງງານຈາກອາຍແກັດທຳມະຊາດ ເພື່ອຄ່ອຍໆປ່ຽນແທນໃຫ້ບັນດາແຫຼ່ງພະລັງງານອື່ນ. ບົນພື້ນຖານນັ້ນ, ທ່ານຮອງນາຍົກລັດຖະມົນຕີ ຈິ້ງດິ່ງຢຸງ ໄດ້ສະເໜີໃຫ້ບໍລິສັດ Gen X Energy ສືບຕໍ່ເຮັດວຽກກັບຄູ່ຮ່ວມມືຫວຽດນາມ ແລະ ບັນດາອົງການທີ່ກ່ຽວຂ້ອງຢ່າງແໜ້ນແຟ້ນ ໃນການກະກຽມໂຄງການໃຫ້ຖືກຕ້ອງຕາມຂໍ້ກຳນົດທີ່ພວມປະກາດໃຊ້.

        ສ່ວນທ່ານ Scott Kicker ໄດ້ຕີລາຄາສູງບັນດາມາດຕະການແກ້ໄຂຂອງຫວຽດນາມ ໃນບັນຫາແຫຼ່ງພະລັງງານ ແລະ ຢືນຢັນວ່າ ຈະສົມທົບກັບບັນດາຄູ່ຮ່ວມມືຢູ່ຫວຽດນາມ ຢ່າງແໜ້ນແຟ້ນ ເພື່ອເຮັດວຽກກັບບັນດາກະຊວງ, ຂະແໜງການ, ທ້ອງຖິ່ນທີ່ກ່ຽວຂ້ອງ, ຜັນຂະຫຍາຍບັນດາບາດກ້າວກະກຽມໃຫ້ແກ່ໂຄງການໂດຍໄວ.