ຮອງນາຍົກລັດຖະມົນຕີຫງວຽນຊວນຟຸກຕ້ອນຮັບຜູ້ອຳນວຍການ
ບໍລິຫານຂັ້ນສູງກຸ່ມບໍລິສັດTemasek
(ພາບ: VGP/Lê Sơn) |
(vovworld) – ວັນທີ 2/3, ທ່ານຮອງນາຍົກລັດຖະມົນຕີ ຫງວຽນຊວນຟຸກ ໄດ້ຕ້ອນຮັບທ່ານນາງ Cheo Hock Kuan, ຜູ້ອຳນວຍການບໍລິຫານຂັ້ນສູງ, ຮັບຜິດຊອບຍຸດທະສາດ ແລະ ການພົວພັນຕ່າງປະເທດຂອງກຸ່ມບໍລິສັດ Temasek, ປະເທດ ສິງກາໂປ ພວມມີການຢ້ຽມຢາມ ແລະ ເຮັດວຽກຢູ່ ຫວຽດນາມ. ທີ່ການຕ້ອນຮັບ, ທ່ານຮອງນາຍົກລັດຖະມົນຕີ ຫງວຽນຊວນຟຸກ ຕີລາຄາສູງປະສິດທິຜົນແຫ່ງການລົງທຶນຂອງກຸ່ມບໍລິສັດ Temasek ຢູ່ ຫວຽດນາມ ໃນໄລຍະຜ່ານມາ, ປະກອບສ່ວນເພີ່ມທະວີການພົວພັນຮ່ວມມື, ການລົງທຶນລະຫວ່າງ 2 ປະເທດ ຫວຽດນາມ - ສິງກາໂປ. ທ່ານຮອງນາຍົກລັດຖະມົນຕີ ຫງວຽນຊວນຟຸກ ເນັ້ນໜັກວ່າ: ຫວຽດນາມ ໄດ້ ແລະ ພວມສືບຕໍ່ປັບປຸງສະພາບແວດລ້ອມແຫ່ງການລົງທຶນ, ດຳເນີນທຸລະກິດໃຫ້ດີກ່ວາອີກ ເພື່ອແນໃສ່ດຶງດູດບັນດາວິສາຫະກິດເຂົ້າມາເຄື່ອນໄຫວຢູ່ ຫວຽດນາມ, ທ່ານ ຫງວຽນຊວນຟຸກ ຢືນຢັນວ່າ: ລັດຖະບານ ຫວຽດນາມ ຍາມໃດກໍສ້າງເງື່ອນໄຂດີທີ່ສຸດເພື່ອໃຫ້ບັນດາວິສາຫະກິດຕ່າງປະເທດເຂົ້າມາລົງທຶນ, ໃນນັ້ນມີບັນດາວິສາຫະກິດຂອງສິງກາໂປ ແລະ ກຸ່ມບໍລິສັດ Temasek. ສ່ວນທ່ານນາງ Cheo Hock Kuan ເນັ້ນໜັກວ່າ: ໃນໄລຍະຈະມາເຖິງ, ກຸ່ມບໍລິສັດ Temasek ປາດຖະໜາຢາກຍູ້ແຮງການເຄື່ອນໄຫວລົງທຶນຢູ່ ຫວຽດນາມ ແລະ ຜັນຂະຫຍາຍການຮ່ວມມືລົງທຶນໃນບັນດາຂົງເຂດການເງິນ, ເຕັກນິກສູງ, ສິນຄ້າບໍລິໂພກອຸປະໂພກ, ການແພດ.