( vovworld ) - ໂດຍສືບຕໍ່ການຢ້ຽມຢາມ ສປປລາວ ຢ່າງເປັນທາງການ, ວັນທີ 19/6, ຄະນະຜູ້ແທນຂັ້ນສູງຫວຽດນາມ ໂດຍທ່ານນາງຮອງປະທານປະເທດ Nguyen Thi Doan ນຳໜ້າໄດ້ມີການພົບປະກັບທ່ານເລຂາທິການໃຫຍ່ ປະທານປະເທດລາວ ຈູມມາລີ ໄຊຍະສອນ. ທີ່ການພົບປະ, ທ່ານນາງຮອງປະທານປະເທດ Nguyen Thi Doan ໄດ້ຢືນຢັນວ່າ ຫວຽດນາມ ຖືເປັນສຳຄັນການປັບປຸງ ແລະ ເພີ່ມທະວີສາຍພົວພັນມິດຕະພາບທີ່ເປັນມູນເຊື້ອ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານລະຫວ່າງຫວຽດນາມ - ລາວ, ຖືວ່ານີ້ແມ່ນຊັບສົມບັດອັນລ້ຳຄ່າທີ່ຄວນໄດ້ຮັບການຮັກສາ ແລະ ຖ່າຍທອດໃຫ້ຄົນລຸ້ນຫຼັງ. ຫວຽດນາມ ຢືນຢັນວ່າ ຈະສະໜັບສະໜູນລາວ ເຂົ້າຮ່ວມອົງການອົງການການຄ້າໂລກ, ສືບຕໍ່ຊ່ວຍເຫຼືອລາວຈັດຕັ້ງກອງປະຊຸມຂັ້ນສູງອາຊີ - ເອີລົບຄັ້ງທີ 9 ແລະ ເວທີປາໄສຄູ່ຮ່ວມມືລັດຖະສະພາອາຊີ - ເອີລົບຄັ້ງທີ 7 ໃນທ້າຍປີ 2012 ໂດຍໄວ.
ພາຍຫຼັງສິ້ນສຸດການຢ້ຽມຢາມລາວ, ວັນທີ 20/6, ທ່ານນາງຮອງປະທານປະເທດຫວຽດນາມ Nguyen Thi Doan ໄດ້ເດີນທາງໄປນະຄອນຫຼວງບາງກອກ, ເລີ່ມຕົ້ນການຢ້າມຢາມປະເທດໄທ ຢ່າງເປັນທາງການແຕ່ວັນທີ 20 – 24/6, ຕາມຄຳເຊື້ອເຊີນຂອງທ່ານນາງນາຍົກລັດຖະມົນຕີໄທ ຍິງຮັກ ຊິນນະວັດ. ນະທີ່ນີ້, ທ່ານນາງຮອງປະທານປະເທດ Nguyen Thi Doan ຈະມີການພົບປະກັບລາຊະທິດາ ມະຫາຈັກກີ ສິຣີນພອນ, ເຈລະຈາກັບທ່ານນາງນາຍົກລັດຖະມົນຕີໄທ ຍິງຮັກ ຊິນນະວັດ ແລະ ພົບປະກັບການນຳ “ ສະມາຄົມມິດຕະພາບໄທ - ຫວຽດນາມ ”.
ທ່ານນາງຮອງປະທານປະເທດ Nguyen Thi Doan ຍັງຈະໄປຢ້ຽມຢາມບ້ານມິດຕະພາບໄທ - ຫວຽດນາມ ຢູ່ນະຄອນ ພະນົມ, ແຫ່ງທີ່ປະທານໂຮ່ຈິມິນ ເຄີຍເຄື່ອນໄຫວຂົນຂວາຍປະຕິວັດ ແລະ ດຳລົງຊີວິດໃນລະຫວ່າງປີ 1928 ແລະ 1929 ໃນໄລຍະທີ່ເພິ່ນໄປຊອກຫາເສັ້ນທາງກູ້ຊາດ. ທ່ານນາງຮອງປະທານປະເທດ Nguyen Thi Doan ກໍຈະພົບປະກັບພໍ່ແມ່ ພີ່ນ້ອງຊາວຫວຽດນາມ ອາໄສຢູ່ແຂວງ ຂອນແກ່ນ, ໄປຢ້ຽມຢາມກິດຈະກຳວັດເສົາດຽວໃນສວນສາທາລະນະມິດຕະພາບໄທ - ຫວຽດນາມ, ເຊິ່ງເປັນສັນຍາລັກແຫ່ງຄວາມສາມັກຄີຫວຽດນາມ - ໄທ, ແລະ ພົບປະກັບເຈົ້າແຂວງຂອງສອງແຂວງນີ້.
ການຢ້ຽມຢາມປະເທດໄທ ຢ່າງເປັນທາງການຂອງທ່ານນາງຮອງປະທານປະເທດ Nguyen Thi Doan ຄັ້ງນີ້ຈະເປັນການຮັດແໜ້ນສາຍພົວພັນລະຫວ່າງສອງປະເທດ ແລະ ຊຸກຍູ້ຄວາມສາມັກຄີມິດຕະພາບລະຫວ່າງປະຊາຊົນຫວຽດນາມ - ໄທ ຍິ່ງກວ່າອີກ.