ທີ່ການພົບປະເຈລະຈາ, ທ່ານນາງຮອງປະທານປະເທດ ຫວຽດນາມ ດັ້ງທິງັອກທິ້ງ  ແລະ ທ່ານຮອງປະທານປະເທດ ພັນຄຳ ວິພາວັນ ໄດ້ເຫັນດີເປັນເອກະພາບຕໍ່ເລື່ອງ ຈະເອົາໃຈໃສ່ສຶກສາອົບຮົມນ້ຳໃຈສາມັກຄີລະຫວ່າງຫວຽດນາມ-ລາວ ໃຫ້ແກ່ພະນັກງານ ແລະ ປະຊາຊົນສອງປະເທດໃຫ້ດີຍິ່ງກວ່າອີກ, ໂດຍສະເພາະແມ່ນໄວໜຸ່ມ; ສືບຕໍ່ເພີ່ມທະວີການຮ່ວມມືໃນວຽກງານປ້ອງກັນຄວາມສະຫງົບຢູ່ເຂດຊາຍແດນໃຫ້ແໜ້ນແຟ້ນ, ສະກັດກັ້ນສະພາບການຄ້າມະນຸດ, ການຄ້າຂາຍຢາເສບຕິດຢ່າງຜິດກົດໝາຍ, ການຄ້າເຖື່ອນ, ຂຸດຄົ້ນຊັບພະຍາກອນທຳມະຊາດຢ່າງຜິດກົດໝາຍຢູ່ລຽບຕາມເສັ້ນຊາຍແດນ, ກໍ່ສ້າງເສັ້ນຊາຍແດນຫວຽດນາມ- ລາວໃຫ້ມີສັນຕິພາບ, ມິດຕະພາບ ແລະ ພັດທະນາ; ກວດກາ, ຊຸກຍູ້ການຜັນຂະຫຍາຍບັນດາໂຄງການ ທີ່ວິສາຫະກິດຫວຽດນາມໄດ້ຮັບໜັງສືອະນຸຍາດໃຫ້ລົງທຶນຢູ່ລາວ ຢ່າງມີປະສິດທິຜົນ ແລະ ແທດຈິງ.

        ແລະກໍໃນຕອນບ່າຍຂອງວັນດຽວກັນ, ທ່ານນາງຮອງປະທານປະເທດ ດັ້ງທິງັອກທິ້ງ ໄດ້ເຂົ້າຢ້ຽມຂ່ຳນັບທ່ານ ບຸນຍັງ ວໍລະຈິດ ເລຂາທິການໃຫຍ່, ປະທານປະເທດແຫ່ງ ສປປ.ລາວ ແລະ ທ່ານນາຍົກລັດຖະມົນຕີ ທອງລຸນ ສີສຸລິດ. ທ່ານນາງຮອງປະທານປະເທດ ດັ້ງທິງັອກທິ້ງ ຢັ້ງຢືນວ່າ ຈະສືບຕໍ່ຮັດແໜ້ນນ້ຳໃຈມິດຕະພາບ, ຄວາມສາມັກຄີແບບພິເສດ ລະຫວ່າງ ຫວຽດນາມ - ລາວ ໃຫ້ນັບມື້ນັບພັດທະນາທັງລວງກວ້າງ ແລະ ລວງເລິກ, ນຳມາເຊິ່ງຜົນປະໂຫຍດອັນແທດຈິງໃຫ້ແກ່ປະຊາຊົນສອງປະເທດ.