ເຊີດຊູຜະລິດຕະພັນກະເສດປອດສານພິດ
(ພາບປະກອບ)
(vovworld) – ຕອນເຊົ້າວັນທີ 01/10, ສະຫະສະມາຄົມວິສາຫະກິດນະຄອນ ໂຮ່ຈີມິນ ແລະ ບໍລິສັດ ດົງນາມ ໄຂງານຕະຫລາດນັດສາກົນກະສີກຳ ແລະ ຜະລິດຕະພັນກະເສດ ຫວຽດນາມ ປີ 2015 (Vietnam Farm Expo 2015) ຢູ່ນະຄອນ ໂຮ່ຈີມິນ. ງານຕະຫລາດນັດມີຮ້ານວາງສະແດງ 200 ຮ້ານຂອງຂະແໜງກະສີກຳທີ່ມາຈາກບັນດາແຂວງ, ນະຄອນໃນທົ່ວປະເທດ ແລະ ວິສາຫະກິດຕ່າງໆທີ່ເຄື່ອນໄຫວໃນຂົງເຂດຜະລິດ, ປຸງແຕ່ງຜະລິດຕະພັນກະເສດ. ສິ່ງທີ່ເປັນໜ້າສົນໃຈແມ່ນຜະລິດຕະພັນກະເສດຢູ່ງານຕະຫລາດນັດທັງໝົດລ້ວນແຕ່ໄດ້ຮັບການຜະລິດຕາມມາດຖານ VietGap, Global Gap, ມີຂອບຂະໜາດໃຫຍ່, ຕອບສະໜອງໃຫ້ບັນດາໃບບິນສັ່ງຊື້ສົ່ງອອກໄດ້ເປັນຢ່າງດີ.
ງານຕະຫລາດນັດໃນປີນີ້ ຍັງມີການເຂົ້າຮ່ວມຂອງບັນດາບໍລິສັດທີ່ສະໜອງອຸປະກອນເຄື່ອງຈັກ ແລະ ຜະລິດຕະພັນການບໍລິການກະສີກຳພາຍໃນປະເທດ ແລະ ຕ່າງປະເທດ. ບັນດານັກຄຸ້ມຄອງກະສີກຳ ແລະ ວິສາຫະກິດຢູ່ງານຕະຫລາດນັດປາດຖະໜາວ່າ: ງານຕະຫລາດນັດຈະເຊື່ອມຕໍ່ຂັ້ນຕອນນັບແຕ່ການສະໜອງວັດຖຸດິບເຖິງການຂັ້ນຕອນການຜະລິດ ແລະ ຈຳໜ່າຍຜະລິດຕະພັນກະສີກຳ. ທ່ານ ຟານມິງເຊີນ, ຫົວໜ້າຫ້ອງການປຸງແຕ່ງ ແລະ ວິຊາຊີບຊົນນະບົດ, ກົມພັດທະນາຊົນນະບົດສາຂາ ເລີມດົ່ງ ໃຫ້ຮູ້ວ່າ:
“ກົມພັດທະນາຊົນນະບົດສາຂາ ເລີມດົ່ງ ມີຮ້ານວາງສະແດງ 5 ຮ້ານ. ພວກຂ້າພະເຈົ້າໜູນຊ່ວຍໃຫ້ບັນດາວິສາຫະກິດ, ສະຫະກອນ, ໜ່ວຍສະຫະກອນ, ໝູ່ບ້ານອາຊີບເຂົ້າຮ່ວມງານຕະຫລາດນັດ, ໄດ້ໂຄສະນາແນະນຳ ຜະລິດຕະພັນ ແລະ ຫຼຸດຜ່ອນຂອດກາງ ກໍ່ຄື ຄ່າໃຊ້ຈ່າຍໃນການຈຳໜ່າຍຜະລິດຕະພັນກະເສດ”.
ງານຕະຫລາດນັດຈະດຳເນີນແຕ່ ວັນທີ 01/10 ເຖິງ ວັນທີ 05/10.