(vovworld) - ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 3 ສະມາຄົມຜູ້ປະສົບເຄາະຮ້າຍຈາກທາດພິດສີສົ້ມດິີໂອຊີນຫວຽດນາມ ໄດ້ດຳເນີນໃນວັນທີ 24/12, ຢູ່ຮ່າໂນ້ຍ. ກ່າວຄຳເຫັນທີ່ກອງປະຊຸມ, ທ່ານຮອງນາຍົກລັດຖະມົນຕີ ຫວູດຶກດາມ ຖືວ່າ: ເລື່ອງແກ້ໄຂຜົນຮ້າຍຍ້ອນຫຼັງຈາກທາດພິດເຄມີດີໂອຊີນ; ວຽກງານເບິ່ງແຍງດູແລ, ຊ່ວຍເຫຼືອຜູ້ປະສົບເຄາະຮ້າຍຈາກທາດພິດສີສົ້ມດີໂອຊີນ ແມ່ນຍາວນານ, ສຳຄັນ ແລະ ຮີບດ່ວນ. ໃນນັ້ນ, ສະມາຄົມຜູ້ປະສົບເຄາະຮ້າຍຈາກທາດພິດສີສົ້ມດີໂດຊີນຫວຽດນາມ ມີບົດບາດທີ່ຕັ້ງ ສຳຄັນ. ທ່ານຮອງນາຍົກລັດຖະມົນຕີ ຫວູດຶກດາມ ສະເໜີໃຫ້ສະມາຄົມຜູ້ປະສົບເຄາະຮ້າຍຈາກທາດພິດສີສົ້ມດີໂດຊີນ ຫວຽດນາມ (VAVA) ຕ້ອງປ່ຽນໃໝ່, ຍົກສູງປະສິດທິຜົນການເຄື່ອນໄຫວ, ປະຕິບັດບົດບາດເປັນຂົວເຊື່ອມຕໍ່ລະຫວ່າງຜູ້ປະສົບເຄາະຮ້າຍກັບປະຊາຄົມເປັນຢ່າງດີ; ປະກອບສ່ວນພ້ອມກັບພັກ, ລັດ, ລະບົບການເມືອງ ແລະ ປະຊາຊົນເບິ່ງແຍງດູແລ, ຊ່ວຍເຫຼືອຜູ້ປະສົບເຄາະຮ້າຍ. VAVA ສົມທົບການເຄື່ອນໄຫວກັບທຸກຂັ້ນ, ທຸກຂະແໜງການ, ເພີ່ມທະວີຄວາມສາມັກຄີກັບສາກົນ; ຢືດໝັ້ນຕໍ່ສູ້ຍາດເອົາຄວາມຍຸຕິທຳມາໃຫ້ຜູ້ປະສົບເຄາະຮ້າຍຈາກທາດພິດສີສົ້ມດີໂອຊີນຫວຽດນາມ.
ກ່ອນໜ້ານັ້ນ,ຕອນບ່າຍວັນທີ 23/12, ຢູ່ສຳນັກງານລັດຖະບານ, ທ່ານນາຍົກລັດຖະມົນຕີ ຫວຽດນາມ ຫງວຽນເຕີນຢູ້ງ ໃຫ້ການຕ້ອນຮັບບັນດາຜູ້ທີ່ປຶກສາ, ຜູ້ຕາງໜ້າການຄ້າ ຫວຽດນາມ ຢູ່ຕ່າງປະເທດເນື່ອງໃນໂອກາດກອງປະຊຸມຜູ້ທີ່ປຶກສາດ້ານການຄ້າ ຫວຽດນາມ 2013. ກ່າວຄຳເຫັນທີ່ການພົບປະ, ທ່ານນາຍົກລັດຖະມົນຕີ ຫງວຽນເຕີນຢູ້ງ ເນັ້ນໜັກວ່າໜ້າທີ່ທຳອິດ ແລະ ສຳຄັນທີ່ສຸດຂອງບັນດາຜູ້ທີ່ປຶກສາ, ຜູ້ຕາງໜ້າດ້ານການຄ້າ, ຫົວໜ້າສາຂາອົງການການຄ້າ ຫວຽດນາມ ຢູ່ຕ່າງປະເທດແມ່ນສືບຕໍ່ມານະພະຍາຍາມປະຕິບັດໜ້າທີ່ໄດ້ຮັບມອບໝາຍ, ພິເສດແມ່ນໜ້າທີ່ເປີດກ້ວາງຕະຫຼາດ, ເພີ່ມທະວີການສົ່ງອອກຂຶ້ນລະດັບ 2 ຕົວເລກໃນປີ 2014 ເພື່ອປະກອບສ່ວນໃຫ້ແກ່ການເຕີບໂຕ GDP, ພັດທະນາການຜະລິດ, ດຳເນີນທຸລະກິດຢູ່ບັນດາເຂດອຸດສາຫະກຳ, ກະສິກຳ, ບໍລິການ. ພ້ອມກັນນັ້ນ, ບັນດາຜູ້ທີ່ປຶກສາຄວນປະກອບສ່ວນຢ່າງຕັ້ງໜ້າເຂົ້າໃນການເຈລະຈາບັນດາສັນຍາການຄ້າ 2 ຝ່າຍ, ພາກພື້ນ ແລະ ຫຼາຍຝ່າຍ, ສະເໜີນະໂຍບາຍກ່ຽວກັບປະເພດສິນຄ້າລະອຽດເພື່ອແກ້ໄຂຄວາມຫຍຸ້ງຍາກ, ຂໍ້ຄົງຄ້າງສຳລັບແຕ່ລະປະເພດສິນຄ້າ ແລະ ມີມາດຕະການຕໍ່ສູ້ຢ່າງທັນການກັບບັນດາມາດຕະການອາລັກຂາການຄ້າຂອງບັນດາປະເທດ, ຈາກນັ້ນປະກອບສ່ວນເຂົ້າໃນການພັດທະນາການຜະລິດພາຍໃນປະເທດ.