ເປີດສະຫຼອງຫ້ອງຮຽນທີ່ ໃສ່ຊື່ປະທານໂຮ່ຈິມິນ ຢູ່ສະຫະພັນລັດເຊຍ
(ຫ້ອງຮຽນແມ່ນແຫ່ງວາງສະແດງຮູບພາບ, ປື້ມ, ໜັງສືພິມ,
ວິດີໂອ ແລະ ບັນອາວັດຖຸພັນກ່ຽວກັບປະທານໂຮ່ຈິມິນ)
(vovworld) - ຕອນບ່າຍວັນທີ 26/11, ຢູ່ສະຖາບັນແຮງງານ ແລະ ການພົວພັນສັງຄົມຢູ່ນະຄອນຫຼວງມົດສກູ (ສະຫະພັນລັດເຊຍ), ໄດ້ດຳເນີນພິທີເປີດສະຫຼອງຫ້ອງຮຽນທີ່ໃສ່ຊື່ປະທານໂຮ່ຈິມິນ, ເຊິ່ງແມ່ນແຫ່ງວາງສະແດງຮູບພາບ, ປື້ມ, ໜັງສືພິມ, ວິດີໂອ ແລະ ບັນດາວັດຖຸພັນກ່ຽວກັບເພີ່ນ. ທີ່ພິທີ, ບັນດາຜູ້ແທນໄດ້ຫວນຄືນຊີວິດແຫ່ງການເຄື່ອນໄຫວຂອງປະທານໂຮ່ຈິມິນ ແລະ ທົບທວນຄືນບັນດາຂີດໝາຍສຳຄັນໃນໄລຍະມໍ່ໆມານີ້ຂອງການພົວພັນມິດຕະພາບທີ່ເປັນມູນເຊື້ອລະຫວ່າງຫວຽດນາມ - ສະຫະພັນລັດເຊຍ. ທ່ານເອກອັກຄະລັດຖະທູດຫວຽດນາມ ປະຈຳສະຫະພັນລັດເຊຍ ຟ້າມຊວນເຊີນ ເນັ້ນໜັກວ່າ: ເລື່ອງເປີດຫ້ອງຮຽນໂຮ່ຈິມິນ ຢູ່ສະຖາບັນແຮງງານ ແລະ ການພົວພັນສັງຄົມ ແມ່ນການປະກອບສ່ວນສຳຄັນເຂົ້າໃນກິດຈະການປັບປຸງ ແລະ ພັດທະນາຄວາມສາມັກຄີມິດຕະພາບທີ່ເປັນມູນເຊື້ອຢ່າງບໍ່ຢຸດຢັ້ງ, ການພົວພັນຄູ່ຮ່ວມມືຍຸດທະສາດ, ກໍ່ຄືຄວາມເຂົ້າໃຈເຊິ່ງກັນ ແລະ ກັນລະຫວ່າງຫວຽດນາມ - ສະຫະພັນລັດເຊຍ. ສ່ວນທ່ານ ຫົວໜ້າສະຖາບັນແຮງງານ ແລະ ການພົວພັນສັງຄົມ, ສາດສະດາຈານ Kodzkin E.M ໃຫ້ຮູ້ວ່າ.
“ພວກຂ້າພະເຈົ້າເປີດຫ້ອງຮຽນທີ່ໃສ່ຊື່ການນຳຜູ້ຍິ່ງໃຫຍ່ຂອງຫວຽດນາມ ໂຮ່ຈິມິນ, ແມ່ນຜູ້ທີ່ໄດ້ສ້າງຕັ້ງພື້ນຖານ ແລະ ມີການປະກອບສ່ວນຫຼາຍຢ່າງໃຫ້ແກ່ການພົວພັນລະຫວ່າງຫວຽດນາມ - ສະຫະພັນລັດເຊຍ, ເພື່ອແນໃສ່ພັດທະນາໜຶ່ງໃນບັນດາທິດໃຫ້ບຸລິມະສິດຍຸດທະສາດຂອງສະຖາບັນໃນການຮ່ວມມືກັບຫວຽດນາມ. ນີ້ບໍ່ແມ່ນຫໍພິພິດຕະພັນ ເຖິງວ່າມີວັດຖຸພັນຫຼາຍຢ່າງກ່ຽວກັບຫວຽດນາມ ແລະ ການພົວພັນລະຫວ່າງຫວຽດນາມ - ສະຫະພັນລັດເຊຍ, ນີ້ແມ່ນຫ້ອງຮຽນໃຫ້ແກ່ບັນດານັກສຶກສາຂອງພວກຂ້າພະເຈົ້າ. ຢູ່ທີ່ນີ້, ບັນດາພວກນ້ອງທັງຮໍ່າຮຽນ, ທັງມີເງື່ອນໄຂເພື່ອຊົມບັນດາວັດຖຸພັນ, ຮູບພາບ ແລະ ຊອກຮູ້ກ່ຽວກັບການນຳຜູ້ທີ່ຍິ່ງໃຫຍ່ຂອງຫວຽດນາມ”.