ເລຂາທິການໃຫຍ່ຫງວຽນຟູ໋ຈ້ອງຮຽກຮ້ອງແຂວງນີງບິ່ງສຸມໃສ່ພັດທະນາການທ່ອງທ່ຽວ
ເລຂາທິການໃຫຍ່ຫງວຽນຟູ໋ຈ້ອງ ລົງຢ້ຽມຢາມ ແລະ ເຮັດວຽກກັບແຂວງ ນິງບີ່ງ
(ພາບ: nhandan.com.vn)
(vovworld) – ວັນທີ 20/1, ທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດ ຫວຽດນາມ ຫງວຽນຟູ໋ຈ້ອງ ໄດ້ລົງຢ້ຽມຢາມ ແລະ ເຮັດວຽກກັບແຂວງ ນີງບິ່ງ ກ່ຽວກັບສະພາບການປະຕິບັດມະຕິກອງປະຊຸມໃຫຍ່ຄັ້ງທີ 11 ຂອງພັກກອມມູນິດຫວຽດນາມ ແລະ ບັນດາໜ້າທີ່ພັດທະນາເສດຖະກິດ - ສັງຄົມ ແລະ ວຽກງານກໍ່ສ້າງພັກ. ເມື່ອເຮັດວຽກກັບຄະນະປະຈຳອົງຄະນະພັກແຂວງ ແລະ ບັນດາພະນັກງານຫຼັກແຫຼ່ງຂອງແຂວງ ນີງບິ່ງ, ທ່ານເລຂາທິການໃຫຍ່ ຫງວຽນຟູ໋ຈ້ອງ ຕີລາຄາວ່າ: ນີງບິ່ງແມ່ນແຂວງມີທັງເຂດທົ່ງພຽງ, ເຂດພູດອຍ ແລະ ເຂດແຄມທະເລ, ມີເງື່ອນໄຂພຽງພໍເພື່ອພັດທະນາກະສິກຳ, ການບໍລິການ, ອຸດສາຫະກຳ ໃນນັ້ນແຂວງກໍ່ມີຄວາມສະດວກຫຼາຍຢ່າງເພື່ອພັດທະນາການທ່ອງທ່ຽວ. ນີງບິ່ງ ກາຍເປັນຈຸດນັດພົບຂອງແຂກທ່ອງທ່ຽວທັງພາຍໃນ ແລະ ຕ່າງປະເທດ. ທ່ານເລຂາທິການໃຫຍ່ ຫງວຽນຟູ໋ຈ້ອງ ເນັ້ນໜັກວ່າການທ່ອງທ່ຽວແມ່ນທິດພັດທະນາສຳຄັນຂອງແຂວງນີງບິ່ງ.
“ພວກເຮົາຕ້ອງເຮັດແນວໃດເພື່ອໃຫ້ອຸດສາຫະກຳ ແລະ ການບໍລິການມີຄວາມດຸ່ນດຽງ. ຈິດໃຈລວມແມ່ນຕ້ອງພັດທະນາຮອບດ້ານ, ວ່ອງໄວ ແລະ ຍືນຍົງ ແຕ່ມີຈຸດສຸມ. ສຸມໃສ່ພັດທະນາການທ່ອງທ່ຽວ, ການບໍລິການ, ພ້ອມທັງຖືເປັນສຳຄັນກະສິກຳ, ເອົາໃຈໃສ່ເປັນພິເສດເຖິງອຸດສາຫະກຳ. ແຕ່ແມ່ນອຸດສາຫະກຳສະອາດ, ເຕັກໂນໂລຢີສູງ, ມີສົ້ນອອກ, ຮັບປະກັນສະພາບແວດລ້ອມຊີວະພາບ. ມາດຕະການແກ້ໄຂແມ່ນຕ້ອງມີພື້ນຖານໂຄງລ່າງ, ກົນໄກນະໂຍບາຍ ແລະ ແຫຼ່ງຊັບພະຍາກອນມະນຸດ”