(vovworld) –  ​ເຫດ​ວາງ​ລະ​ເບີດ​ເກີດ​ຂຶ້ນ​ໃນ​ວັນ​ທີ 25/10, ຢູ່​ໂບດ​ອິດສະ​ລາມແຫ່ງ​ໜຶ່ງ​​ໃກ້​ກັບ​ນະຄອນຫຼວງ ດາ​ມາ​ກຸດ ຂອງ ຊີຣີ, ​ເຮັດ​​ໃຫ້​ຢ່າງ​ໜ້ອຍ​ສຸດ​ມີ 40 ຄົນ​ເສຍ​ຊີວິດ, ​ໃນ​ນັ້ນ​ມີ​ເດັກ​ນ້ອຍ 7 ຄົນ. ຈຳນວນ​ຜູ້​ເສຍ​ຊີວິດ ​ແລະ ຮັບ​ບາດ​ເຈັບ​ອາດ​ຈະ​ສືບ​ຕໍ່​ເພີ່ມ​ຂຶ້ນ​ຍ້ອນ​ມີ​ຫຼາຍ​ຄົນ​ຮັບ​ບາດ​ເຈັບ​ໜັກ. ສຳນັກ​ຂ່າວສານ​ແຫ່ງ​ຊາດ SANA ຂອງ ຊີຣີ ​ກ່າວ​ຫາ “ບັນດາ​ພາກສ່ວນ​ກໍ່​ການ​ຮ້າຍ” ຢືນ​ຢູ່​ເບື້ອງ​ຫຼັງ​ເຫດການ​ດັ່ງກ່າວ, ​ໃນ​ຂະນະ​ນັ້ນພັນທະ​ມິດ​ຊົນ​ຊາດຝ່າຍ​ຄ້ານ ​ພັດ​ຖີ້ມ​​ໂທດ​ໃຫ້​ກອງທັບຂອງ​ອຳນາດ​ການ​ປົກຄອງ​ປະທານາທິບໍດີ Assad ​ໄດ້​ປະຕິບັດ​ເຫດ​ວາງ​ລະ​ເບີດ​ດັ່ງ​ກ່າວ.

        ​ໃນ​ຂະນະ​ນັ້ນ, ຊ່ອງ​ໂທລະພາບ​ແຫ່ງ​ຊາດ ຊີຣີ ​ໄດ້​ໃຫ້​ຂ່າວ​ເມື່ອ​ວັນ​ທີ 25/10 ວ່າ: Abu Mohammed al – Jawlani, ຫົວໜ້າ​ແນວ​​ໂຮມ Al – Nusra ຢູ່ ຊີຣີ - ກຳ​ລັງ​ທີ່​ກ່ຽວຂ້ອງ​ເຖິງ​ເຄືອ​ຂ່າຍ​ກໍ່​ການ​ຮ້າຍ​ສາກົນ Al – Qaeda - ​ໄດ້​ຖືກ​ດັບ​ສູນ​ຢູ່​ນະຄອນ Latakia. ​ເຖິງ​ຢ່າງ​ໃດ​ກໍ່ຕາມ, ​ໃນ​ແຈ້ງ​ການ​ເມື່ອ​ວັນ​ທີ 26/10, ແນວ​​ໂຮມ Al – Nusra  ​ໃຫ້​ຮູ້​ວ່າ: ຫົວໜ້າ​ຂອງ​ກຳລັງ​ນີ້​ພວມ​ແຂງ​ແຮງ​ຢູ່ ​ແລະ ຢືນຢັນ​ວ່າ:​ແຫຼ່ງຂ່າວ​ດັ່ງກ່າວ​ແມ່ນ​ຜິດ​ເຂ​ວ.

        ​ແລະ​ກໍ່​ໃນ​ວັນ​ດຽວ​ກັນ, ທ່ານ​ນາງ Valerie Amos, ຮອງ​ເລຂາທິການ​ໃຫຍ່ ສປຊ ຮັບຜິດຊອບ​ບັນດາ​ບັນຫາ​ມະນຸດສະທຳ ​ໃຫ້​ຮູ້​ວ່າ: ບັນດາ​ການ​ປະ​ທະ​ກັນ​ລະ​ຫວ່າງ​ປະມານ 2.000 ກຸ່ມ​ຝ່າຍ​ຄ້ານຢູ່ ຊີຣີ ​ໄດ້​ເຮັດ​ໃຫ້​ວຽກ​ງານ​ໜູນ​ຊ່ວຍ​ມະນຸດ​ສະທຳ​ຢູ່​ປະ​ເທດ​ຕາ​ເວັນ​ອອກ​ກາງ​ນີ້​ປະສົບ​ກັບ​ຄວາມ​ຫຍຸ້ງຍາກ​ຫຼາຍ​ຢ່າງ.