(vovworld) – ວັນທີ 02/06, ຢູ່ສຳນັກງານຂອງສະຫະປະຊາຊາດທີ່ ນິວຢອກ, ປະເທດອາມລິກາ, ທ່ານເອກອັກຄະລັດຖະທູດ ເລຮ່ວາຍຈູງ, ຫົວໜ້າຄະນະຜູ້ຕາງໜ້າຫວຽດນາມ ປະຈຳສະຫະປະຊາຊາດ ໄດ້ມີການພົບປະກັບທ່ານ Jeffrey Feltmam, ຮອງເລຂາທິການໃຫຍ່ສະຫະປະຊາຊາດ ຜູ້ຮັບຜິດຊອບບັນດາບັນຫາການເມືອງ, ເພື່ອສືບຕໍ່ແຈ້ງໃຫ້ສະຫະປະຊາຊາດຊາບກ່ຽວກັບບັນດາການຜັນແປຫລ້າສຸດທີ່ກ່ຽວຂ້ອງເຖິງເລື່ອງຈີນ ຕັ້ງຮ້ານເຈາະນ້ຳມັນໄຮຢາງ 981 ພຽງລຳພັງຝ່າຍດຽວຢ່າງຜິດກົດໝາຍໃນເຂດເສດຖະກິດຈຳເພາະ ແລະ ໄຫຼ່ທະວີບຂອງຫວຽດນາມ. ທ່ານເອກອັກຄະລັດຖະທູດ ເລຮວ່າຍຈູງ ຄັດຄ້ານການກະທຳດັ່ງກ່າວຂອງຈີນ, ກໍ່ຄືເລື່ອງປັກກິງ ສືບຕໍ່ສົ່ງກຳປັ່ນປ້ອງກັນຫຼາຍລຳ, ໃນນັ້ນມີທັງກຳປັ່ນທະຫານ ແລະ ເຮືອບິນເຂົ້າເຄື່ອນໄຫວຢູ່ສະຖານທີ່ຕັ້ງຮ້ານເຈາະນ້ຳມັນ ໄຮຢາງ 981 ຢ່າງຜິດກົດໝາຍ. ທ່ານເອກອັກຄະລັດຖະທູດກໍ່ແຈ້ງໃຫ້ທ່ານຮອງເລຂາທິການໃຫຍ່ສະຫະປະຊາຊາດຊາບກ່ຽວກັບເລື່ອງ ບັນດາກຳປັ່ນຂອງຈີນ ຕັ້ງໃຈຕຳ, ນາບຂູ່, ໃຊ້ທໍ່ສີດນ້ຳທີ່ມີຄວາມແຮງສູງໃສ່ບັນດາກຳປັ່ນຂອງພົນລະເຮືອນຫວຽດນາມ ເຮັດໃຫ້ກຳປັ່ນຫຼາຍລຳຖືກເປ່ເພ ແລະ ຫຼາຍຄົນຖືກບາດເຈັບ. ທ່ານເອກອັກຄະລັດຖະທູດ ເລຮ່ວາຍຈູງ ສະເໜີໃຫ້ສະຫະປະຊາຊາດ ພ້ອມກັບວົງຄະນະຍາດສາກົນສືບຕໍ່ເອົາໃຈໃສ່, ສະໜັບສະໜູນບັນດາຂໍ້ສະເໜີເຈດຕະນາດີຂອງຫວຽດນາມ, ຮຽກຮ້ອງບໍ່ມີການກະທຳພຽງລຳພັງຝ່າຍດຽວເຮັດໃຫ້ສະພາບເຄັ່ງຕຶງຂຶ້ນຕື່ມ, ບໍ່ນຳໃຊ້ ແລະ ນາບຂູ່ນຳໃຊ້ຄວາມຮຸນແຮງ.
ທ່ານ Jeffrey Feltmam, ຮອງເລຂາທິການໃຫຍ່ສະຫະປະຊາຊາດ ສະແດງຄວາມວິຕົກກັງວົນຕໍ່ສະພາບການເຄັ່ງຕຶງຢູ່ທະເລຕາເວັນອອກ ແລະ ຮຽກຮ້ອງບັນດາຝ່າຍຕ້ອງລະງັບໃຈ, ແກ້ໄຂການຂັດແຍ້ງກັນຜ່ານການເຈລະຈາ ແລະ ບັນດາມາດຕະການສັນຕິພາບທີ່ເໝາະສົມກັບກົດບັດສະຫະປະຊາຊາດ ແລະ ກົດໝາຍສາກົນ.