ທີມບານເຕະ ຝລັ່ງ

ພາຍຫຼັງການແຂ່ງຂັນເປັນເວລາເດືອນໜຶ່ງດ້ວຍ 64 ນັດໂດຍການເຂົ້າຮ່ວມຂອງ 32 ທີມບານເຕະແຖວໜ້າຂອງໂລກ, ຕອນຄ່ຳວັນທີ 15 ກໍລະກົດ, ໃນນັດແຂ່ງຂັນຊິງຊະນະເລີດທີ່ສະໜາມກິລາ Luzhniki, ຢູ່ນະຄອນຫຼວງ ມົດສະກູ, ປະເທດ ລັດເຊຍ, ແຟນບານໃນໂລກ ໄດ້ເຫັນປະຈັກຕາທີມບານເຕະ ຝລັ່ງ ຕາງໜ້າໃຫ້ເອີລົບ ຄ້ວາໄດ້ຂັນຄຳ World Cup. ທີມບານເຕະ ກາໄກ່ຜູ້ Gaulois ໄດ້ເອົາໄຊຊະນະທີມບານເຕະ ໂຄຣເອເຊຍ ດ້ວຍ 4 ປະຕູຕໍ່ 2 ແລະ ເປັນຂີດໝາຍເປັນຄັ້ງທີສອງຄ້ວາໄດ້ຂັນຄຳໃນງານແຂ່ງຂັນບານເຕະໃຫຍ່ທີ່ສຸດໃນໂລກນີ້.

        ພາຍຫຼັງນັດແຂ່ງຂັນບານເຕະຊິງຊະນະເລີດ World Cup 2018, ຄະນະຈັດຕັ້ງໄດ້ດຳເນີນການມອບບັນດານາມມະຍົດສຳລັບສ່ວນບຸກຄົນກ່ອນທີ່ຈະມອບຂັນຄຳໃຫ້ທີມບານເຕະ ຝລັ່ງ. ໃນນັ້ນ, ກອງກາງ Luka Modric ຂອງທີມບານເຕະ ໂຄຣເອເຊຍ ຍາດໄດ້ລາງວັນໝາກບານຄຳ. ນາມມະຍົດຖົງມືຄຳໄດ້ມອບໃຫ້ຜູ້ຮັກສາປະຕູ Thibout Courtois ຂອງທີມບານເຕະ ແບນຊິກ. ນັກກິລາບານເຕະ Kylian Mbappe ໄດ້ຮັບນາມມະຍົດ ນັກກິລາບານເຕະໜຸ່ມຍອດຢ້ຽມ. ໃນຂະນະນັ້ນ, ນາມມະຍົດເກີບຄຳ ໄດ້ມອບໃຫ້ກອງໜ້າ Harry Kane ຂອງທີມບານເຕະ ອັງກິດ ດ້ວຍຜົນງານຍິງໄດ້ 6 ປະຕູໃນນັດຕ່າງໆທີ່ງານແຂ່ງຂັນບານເຕະໂລກ World Cup 2018.