ພິທີລົງນາມໃນຂໍ້ຕົກລົງຮ່ວມມືກ່ຽວກັບບັນດາຂົງເຂດເສດຖະກິດ - ສັງຄົມ (ພາບ: ອິນເຕີແນັດ)

ວັນທີ 04 ເມສາ, ຄະນະປະຕິບັດງານຂອງແຂວງ Chungcheongnam – Do (ສ.ເກົາຫຼີ) ໂດຍທ່ານ Yoo Byung Kook, ປະທານສະພາແຂວງນຳໜ້າມາຢ້ຽມຢາມ ແລະ ເຮັດວຽກກັບການນຳແຂວງ ລອງອານ ຂອງ ຫວຽດນາມ. ເນື່ອງໃນໂອກາດນີ້ 2 ທ້ອງຖິ່ນໄດ້ລົງນາມໃນຂໍ້ຕົກລົງຮ່ວມມືກ່ຽວກັບບັນດາຂົງເຂດເສດຖະກິດ - ສັງຄົມ. ຕາມນັ້ນແລ້ວ, ແຂວງ ລອງອານ ແລະ ແຂວງ Chungcheongnam – Do ສ້າງຕັ້ງການພົວພັນຮ່ວມມືອີງໃສ່ການເຄົາລົບນັບຖືເຊິ່ງກັນ ແລະ ກັນ, ສະເໝີພາບ ແລະ ຕ່າງຝ່າຍຕ່າງມີຜົນປະໂຫຍດ; ພ້ອມກັນມານະພະຍາຍາມເພີ່ມທະວີຄວາມເຂົ້າອົກເຂົ້າໃຈເຊິ່ງກັນ ແລະ ກັນຂອງປະຊາຊົນ 2 ແຂວງ ແລະ ເພີ່ມທະວີການແບ່ງປັນບົດຮຽນ, ຊຸກຍູ້ການຮ່ວມມື, ພົບປະແລກປ່ຽນໃນບັນດາຂົງເຂດຄື: ເສດຖະກິດ, ວັດທະນະທຳ, ວິທະຍາສາດ ແລະ ເຕັກນິກ, ການສຶກສາ, ການທ່ອງທ່ຽວ, ການປົກປັກຮັກສາສິ່ງແວດລ້ອມ.

        ແຂວງ Chungcheongnam – Do ແມ່ນແຂວງທ້ອງຖິ່ນຂອງ ສ.ເກົາຫຼີ ມີທ່າແຮງກ່ຽວກັບວິທະຍາສາດເຕັກໂນໂລຊີ ແລະ ປະສົບຜົນສຳເລັດທີ່ສຸດໃນການນຳວິທະຍາສາດເຕັກໂນໂລຊີເຂົ້າໃນການຫັນກະສິກຳ, ການຜະລິດ, ປະກອບລົດໂອໂຕເປັນເຄື່ອງຈັກ…ນີ້ກໍ່ແມ່ນທ້ອງຖິ່ນນຳໜ້າ, ເອົາໃຈໃສ່ໝູນໃຊ້, ພັດທະນາອຳນາດການປົກຄອງເອເລັກໂຕນິກ, ນຳໃຊ້ເຕັກໂນໂລຊີສູງເຂົ້າໃນດ້ານສາທາລະນະສຸກ, ການສຶກສາ.