ຕອນເຊົ້າວັນທີ 17 ກໍລະກົດ, ຢູ່ນະຄອນຫຼວງ ວຽງຈັນ, ໂດຍໄດ້ຮັບການມອບສິດຈາກການນຳພັກ, ລັດ, ລັດຖະບານ ແລະ ສະພາແຫ່ງຊາດ ຫວຽດນາມ, ທ່ານ ຫງວຽນບ໋າຮູ່ງ, ເອກອັກຄະລັດຖະທູດ ຫວຽດນາມ ປະຈຳລາວ ໄດ້ສົ່ງໂທລະເລກອວຍພອນຂອງທ່ານເລຂາທິການໃຫຍ່ ຫງວຽນຟູ໋ຈ້ອງ, ທ່ານປະທານປະເທດ ເຈີ່ນດ້າຍກວາງ, ທ່ານນາຍົກລັດຖະມົນຕີ ຫງວຽນຊວນຟຸກ ແລະ ທ່ານນາງປະທານສະພາແຫ່ງຊາດ ຫງວຽນທິກິມເງິນ ເຖິງທ່ານເລຂາທິການໃຫຍ່, ປະທານປະເທດ ລາວ ບຸນຍັງ ວໍລະຈິດ, ທ່ານນາຍົກລັດຖະມົນຕີ ທອງລຸນ ສີສຸລິດ ແລະ ທ່ານນາງປະທານສະພາແຫ່ງຊາດ ປານີ ຢາທໍ່ຕູ້ ເນື່ອງໃນໂອກາດສະເຫຼີມສະຫລອງ 55 ປີແຫ່ງວັນສ້າງຕັ້ງການພົວພັນທາງການທູດ (5/9/1962 -5/9/2017) ແລະ 40 ປີແຫ່ງວັນເຊັນສົນທິສັນຍາມິດຕະພາບ ແລະ ການຮ່ວມມືລະຫວ່າງ 2 ປະເທດ (18/7/1977 – 18/7/2017).

        ໂດຍຕາງໜ້າໃຫ້ກະຊວງການຕ່າງປະເທດລາວ, ທ່ານ ສະເຫລີມໄຊ ກົມມະສິດ, ລັດຖະມົນຕີການຕ່າງປະເທດລາວ ເນັ້ນໜັກວ່າ: ປີ 2017, ແມ່ນປີມີບັນດາການເຄື່ອນໄຫວສະເຫຼີມສະຫລອງທີ່ສຳຄັນຍິ່ງລະຫວ່າງ 2 ປະເທດ. ກະຊວງການຕ່າງປະເທດລາວ ໃຫ້ຄຳໝັ້ນສັນຍາສືບຕໍ່ພ້ອມກັບກະຊວງການຕ່າງປະເທດ ຫວຽດນາມ ແລະ ສະຖານທູດ ຫວຽດນາມ ປະຈຳ ລາວ ເຮັດຈົນສຸດຄວາມສາມາດຂອງຕົນ ເພື່ອຮັກສາ ແລະ ເພີ່ມພູນຄູນສ້າງສາຍພົວພັນແບບພິເສດລະຫວ່າງ 2 ປະເທດ.

        ທ່ານເອກອັກຄະລັດຖະທູດ ຫງວຽນບ໋າຮູ່ງ ໃຫ້ຮູ້ວ່າ: ໃນສະພາບການໂລກ ແລະ ພາກພື້ນມີການຜັນແປຢ່າງສົບສົນ ແລະ ຍາກທີ່ຄາດຄະເນລ່ວງໜ້າໄດ້, 2 ປະເທດສືບຕໍ່ເພີ່ມທະວີການຮ່ວມມືຫຼາຍກ່ວາອີກ ເພື່ອນຳການພົວພັນ ຫວຽດນາມ - ລາວຂຶ້ນສູ່ລະດັບສູງໃໝ່, ຕອບສະໜອງບັນດາຄວາມຄອງຄອຍ ແລະ ຜົນປະໂຫຍດຂອງປະຊາຊົນ 2 ປະເທດ.