(ພາບປະກອບ)
(vovworld) - ຕອນເຊົ້າວັນທີ 18/03, ຢູ່ຮ່າໂນ້ຍ, ຄະນະປະຈຳສະພາແຫ່ງຊາດຫວຽດນາມ ໄດ້ໄຂກອງປະຊຸມຄັ້ງທີ 16 ດ້ວຍບັນດາເນື້ອໃນທີ່ສຳຄັນເພື່ອກະກຽມໃຫ້ແກ່ກອງປະຊຸມສະໄໝສາມັນເທື່ອທີ 5 ສະພາແຫ່ງຊາດຫວຽດນາມຊຸດທີ 13. ກອງປະຊຸມໄດ້ດຳເນີນໄປໃນລະຫວ່າງວັນທີ 18 – 22/03. ກ່າວຄຳເຫັນໄຂກອງປະຊຸມ, ທ່ານປະທານສະພາແຫ່ງຊາດ ຫງວຽນຊິງຮຸ່ງ ໃຫ້ຮູ້ວ່າ, ທີ່ກອງປະຊຸມຄັ້ງນີ້, ຄະນະປະຈຳສະພາແຫ່ງຊາດຈະໃຫ້ຄຳຄິດຄຳເຫັນກ່ຽວກັບ 8 ຮ່າງກົດໝາຍ ແລະ ລັດຖະບັນຍັດເຊິ່ງລວມມີ; ກົດໝາຍວ່າດ້ວຍການປັບປຸງ, ເພີ່ມເຕີ່ມບາງຂໍ້ມາດຕາຂອງບັນດາກົດໝາຍຄື; ກົດໝາຍວ່າດ້ວຍມູນຄ່າເພີ່ມ, ກົດໝາຍວ່າດ້ວຍພາສີລາຍຮັບວິສາຫະກິດ, ກົດໝາຍວ່າດ້ວຍການປ້ອງກັນ, ຕ້ານໄຟໄໝ້, ກົດໝາຍວ່າດ້ວຍການແຂ່ງຂັນ, ຍໍ້ອງຍໍ, ກົດໝາຍວ່າດ້ວຍການຢູ່ອາໄສ, ຮ່າງກົດໝາຍວ່າດ້ວຍປະຕິບັດການປະຢັດ, ຕ້ານການຟຸມເຟືອຍ (ສະບັບປັບປຸງ); ຮ່າງກົດໝາຍວ່າດ້ວຍການຕ້ອນຮັບພົນລະເມືອງ ແລະ ພິຈາລະນາ, ຮັບຮອງເອົາລັດຖະບັນຍັດສະບັບປັບປຸງ, ເພີ່ມເຕີ່ມບາງຂໍ້ມາດຕາຂອງລັດຖະບັນຍັດກ່ຽວກັບເງິນຕາຕ່າງປະເທດຟາກມາ. ຄະນະປະຈຳສະພາແຫ່ງຊາດ ກໍຈະປຶກສາຫາລືກ່ຽວກັບແຜນຮ່າງສືບຕໍ່ປ່ຽນໃໝ່ໂຄງປະກອບການຈັດຕັ້ງບັນດາອົງການຂອງສະພາແຫ່ງຊາດ ແລະ ວຽກງານກະກຽມລົງມະຕິໄວ້ວາງໃຈສຳລັບຜູ້ດຳລົງຕຳແໜ່ງໂດຍສະພາແຫ່ງຊາດໃຫ້ສັດຕະຍາບັນຢູ່ທີ່ກອງປະຊຸມຄັ້ງທີ 5 ຈະມາເຖິງ. ກ່ຽວກັບບັນດານີ້, ທ່ານປະທານສະພາແຫ່ງຊາດ ຫງວຽນຊິງຮຸ່ງ ໄດ້ເອົາໃຈໃສ່ວ່າ.
“ເພື່ອໃຫ້ວຽກງານລົງມະຕິໄວ້ວາງໃຈທີ່ກອງປະຊຸມຄັ້ງທີ 5 ສຳລັບບັນດາຜູ້ດຳລົງຕຳແໜ່ງໂດຍສະພາແຫ່ງຊາດເລືອກຕັ້ງ ຫຼື ໃຫ້ສັດຕະຍາບັນປະສົບຜົນສຳເລັດ ພວກເຮົາຈະຕ້ອງປຶກສາຫາລືແຜນການຜັນຂະຫຍາຍເນືອໃນນີ້ຢ່າງລະອຽດກວ່າ. ນີ້ແມ່ນຄັ້ງທຳອິດທີ່ພວກເຮົາເຮັດ ເພາະສະນັ້ນຕ້ອງປະຕິບັດຢ່າງລະມັດລະວັງ, ກະກຽມຢ່າງລອບຄອບທີ່ຖ້ວນໃຫ້ເພື່ອວຽກງານລົງມະຕິໄວ້ວາງໃຈມີລັກສະນະແທດຈິງ ແລະ ມີຜົນປະໂຫຍດຖືກກັບເນື້ອໃນຈິດໃຈມະຕິເຊິ່ງສະພາແຫ່ງຊາດໄດ້ປະກາດໃຊ້”.
ແລະກໍໃນຕອນເຊົ້າວັນດຽວກັນ, ຄະນະປະຈຳສະພາແຫ່ງຊາດ ກໍຮັບຮອງເອົາ ລັດຖະບັນຍັດສະບັບປັບປຸງ, ເພີ່ມເຕີມບາງຂໍ້ມາດຕາຂອງລັດຖະບັນຍັດກ່ຽວກັບເງິນຕາຕ່າງປະເທດຟາກມາ. ຄາດວ່າ, ວັນທີ 22/03, ຄະນະປະຈຳສະພາແຫ່ງຊາດ ຈະຊັກຖາມໂດຍກົງປະທານສານປະຊາຊົນສູງສຸດ ແລະ ລັດຖະມົນຕີກະຊວງສຶກສາ ແລະ ບຳລຸງສ້າງ ກ່ຽວກັບບັນດາບັນຫາທີ່ຂຶ້ນກັບຄວາມຮັບຜິດຊອບຄຸມຄອງຂອງ 2 ກະຊວງ, ຂະແໜງການດັ່ງກ່າວ.