ໄຂກອງປະຊຸມສະໄຫມສາມັນເທື່ອທີ 4 ສະພາແຫ່ງຊາດ ຫວຽດນາມ ຊຸດທີ 13

ວັນຈັນ ທີ 22 ຕຸລາ ຄ.ສ. 2012 | 15:30:14

ທ່ານປະທານສະພາແຫ່ງຊາດ Nguyen Sinh Hung ກ່າວປາໄສໄຂກອງປະຊຸມ
ພາບ: baodientu.chinhphu.vn

(vovworld) - ປະຊຸມສະໄຫມສາມັນເທື່ອທີ 4 ສະພາແຫ່ງຊາດຫວຽດນາມ ຊຸດທີ 13 ຖືກໄຂຂຶ້ນໃນຕອນເຊົ້າວັນທີ 22/10 ຢູ່ ຮ່າໂນ້ຍ ໂດຍມີການເຂົ້າຮ່ວມຂອງບັນດາການນຳພັກ, ລັດ, ສະພາແຫ່ງຊາດ, ລັດຖະບານ ແລະ ສະມາຊິກສະພາແຫ່ງຊາດ (ສສຊ) ເກືອບ 500 ທ່ານ. ກ່າວປາໄສໄຂກອງປະຊຸມ, ທ່ານປະທານສະພາແຫ່ງຊາດ Nguyen Sinh Hung ໃຫ້ຮູ້ວ່າ: ກອງປະຊຸມຄັ້ງນີ້ຄາດວ່າຈະເຮັດວຽກມາເປັນເວລາ 26 ວັນ, ແລະ ຈະພິຈາລະນາບົດລາຍງານຂອງລັດຖະບານກ່ຽວກັບການປະຕິບັດແຜນການພັດທະນາເສດຖະກິດ ສັງຄົມ, ງົບປະມານແຫ່ງລັດປີ 2012, ຮັບຮອງເອົາແຜນການພັດທະນາເສດຖະກິດ ສັງຄົມ, ແຜນງົບປະມານແຫ່ງລັດ ແລະ ວິທີຈັດແບ່ງງົບປະມານສູນກາງປີ 2013. ກ່ຽວກັບວຽກງານນິຕິບັນຍັດ, ທ່ານປະທານສະພາແຫ່ງຊາດ Nguyen Sinh Hung ຊີ້ແຈງວ່າ:

“ທີ່ກອງປະຊຸມເທື່ອນີ້, ສະພາແຫ່ງຊາດຈະໃຫ້ຄຳເຫັນກ່ຽວກັບຮ່າງປັບປຸງລັດຖະທຳມະນູນປີ 1992, ບົນພື້ນຖານພິຈາລະນາ, ຕັດສິນການຈັດຕັ້ງຮັບເອົາຄວາມເຫັນຈາກປະຊາຊົນກ່ຽວກັບຮ່າງປັບປຸງລັດຖະທຳມະນູນ, ຮັບຮອງເອົາມະຕິຮັບເອົາບັດໄວ້ວາງໃຈສຳລັບຜູ້ດຳລົງຕຳແຫນ່ງໂດຍສະພາແຫ່ງຊາດ, ສະພາປະຊາຊົນ ເລືອກຕັ້ງຫລືໃຫ້ສັດຕະຍາບັນ, ພິຈາລະນາຮັບຮອງເອົາຮ່າງກົດໝາຍ 9 ສະບັບ.”

ກ່ຽວກັບວຽກງານຕິດຕາມກວດກາ, ທ່ານ ປະທານສະພາແຫ່ງຊາດ Nguyen Sinh Hung ຢືນຢັນວ່າ: ກອງປະຊຸມເທື່ອນີ້, ສະພາແຫ່ງຊາດຈະດຳເນີນການຕິດຕາມກວດກາຫົວເລື່ອງສະເພາະກ່ຽວກັບການປະຕິບັດນະໂຍບາຍ, ກົດໝາຍໃນການແກ້ໄຂຄຳຮ້ອງທຸກ, ກ່າວຟ້ອງຂອງພົນລະເມືອງສຳລັບບັນດາຂໍ້ຕົກລົງບໍລິຫານກ່ຽວກັບທີ່ດິນ, ພິຈາລະນາບົດລາຍງານໝາກຜົນແຫ່ງການຕິດຕາມກວດກາເພື່ອໃຫ້ສະພາຊົນເຜົ່າ, ບັນດາກຳມາທິການຂອງສະພາແຫ່ງຊາດປະຕິບັດ, ຮັບຟັງບົດລາຍງານໝາກຜົນແຫ່ງການແກ້ໄຂຂໍ້ສະເຫນີຂອງຜູ້ມີສິດເລືອກຕັ້ງ, ດຳເນີນການຊັກຖາມ ແລະ ຕອບຄຳຊັກຖາມ ແລະ ຮັບຮອງເອົາມະຕິກ່ຽວກັບໂຄງການເຄື່ອນໄຫວຕິດຕາມກວດກາຂອງສະພາແຫ່ງຊາດປີ 2013.

ທີ່ວາລະໄຂກອງປະຊຸມ, ບັນດາ ສສຊ ໄດ້ຮັບຟັງບົດລວບລວມຄຳເຫັນຂອງຜູ້ມີສິດເລືອກຕັ້ງ, ບົດລາຍງານກວດກາກ່ຽວກັບສະພາບການປະຕິບັດແຜນການພັດທະນາເສດຖະກິດສັງຄົມປີ 2012, ແຜນການພັດທະນາເສດຖະກິດສັງຄົມປີ 2013, ບົດລາຍງານກ່ຽວກັບວຽກງານປ້ອງກັນ ແລະ ຕ້ານການສໍ້ລາດບັງຫລວງປີ 2012, ບົດລາຍງານການກວດກາ ວຽກງານປ້ອງກັນ ແລະ ຕ້ານການສໍ້ລາດບັງຫລວງປີ 2012. ພິເສດ ທ່ານນາຍົກລັດຖະມົນຕີ Nguyen Tan Dung ສະເຫນີບົດລາຍງານຂອງລັດຖະບານກ່ຽວກັບສະພາບການເສດຖະກິດສັງຄົມປີ 2012 ແລະ ຫນ້າທີ່ເສດຖະກິດສັງຄົມປີ 2013.

ກອງປະຊຸມສະໄໝສາມັນເທື່ອທີ່ 4 ສະພາແຫ່ງຊາດຫວຽດນາມຊຸດ ທີ່ 13 ໄດ້ດຶງດູດຄວາມສົນໃຈຈາກຜູ້ມີສິດ ເລືອກຕັ້ງໃນທົ່ວປະເທດ. ຜູ້ມີສິດເລືອກຕັ້ງໄດ້ຝາກຄວາມມຸ່ງມາດປາຖະໜາ ຫຼາຍຢ່າງຕໍ່ບັນດາ ສ.ສ.ຊ ດ້ວຍຄວາມຫວັງວ່າ ຜ່ານກອງປະຊຸມເທືອ່ນີ້, ເສດຖະກິດ-ສັງຄົມຂອງປະເທດຊາດຈະນັບມື້ນັບພັດທະນາແບບຍື່ນຍົງ, ຊີວິດການເປັນຢູ່ຂອງປະຊາຊົນນັບມື້ໄດ້ຮັບການຍົກສູງຂຶ້ນ, ສະຖຽນລະພາບທາງດ້ານການເມືອງໄດ້ຮັບການຮັກສາໄວ້ຢ່າງໝັ້ນຄົງ. ຜູ້ມີສິດ ເລືອກຕັ້ງ Trinh Thi Nga ຢູ່ເມືອງ ຈຶກນິງ ແຂວງ ນາມດິ້ງ ມີຂໍ້ສະເໜີວ່າ : (ເທບ)

“ ຮາກຖານພວມສຸມໃສ່ບັນດາບາດກ້າວໃຫ້ແກ່ການກໍ່ສ້າງຊົນນະບົດໃໝ່. ໃນຂະບວນວິວັດຜັນຂະຫຍາຍປະຕິບັດ, ພໍ່ແມ່ປະຊາຊົນມີຄວາມເຊື່ອໝັ້ນຕໍ່ແຜນນະໂຍບາຍ, ນະໂຍບາຍຂອງ ພັກ ແລະ ລັດ, ແຕ່ເພື່ອສູ້ຊົນບັນລຸໃຫ້ໄດ້ບັນດາຄາດໝາຍນີ້, ພັດປະສົບກັບຄວາມຫຍຸ້ງຍາກດ້ານງົບປະມານ. ຜ່ານກອງປະຊຸມຄັ້ງນີ້, ຜູ້ມີສິດ ເລືອກຕັ້ງກໍຫວັງວ່າ ສະພາແຫ່ງຊາດຈະເອົາໃຈໃສ່ເຖິງນະໂຍບາຍໜູນຊ່ວຍກໍ່ສ້າງຊົນນະບົດໃໝ່, ຈະມີງົບປະມານໂດຍໄວ ແລະ ເງິນທຶນໜູນຊ່ວຍທ້ອງຖິ່ນກໍ່ສ້າງພື້ໜຖານໂຄງລ່າງ ແລະ ກິດຈະກຳສະຫວັດດິການສັງຄົມຢ່າງຖືກຕາມຄວາມໄວຂອງແຜນການ ”

ສ່ວນທ່ານ Nguyen Duc Noi ປະທານຄະນະກຳມະການແນວໂຮມປະເທດຊາດຫວຽດນາມ ຕາແສງ ຢີເຕີນ, ນະຄອນກອນຕຸມ, ແຂວງກອນຕຸມໃຫ້ຮູ້ວ່າ :

“ ຜ່ານການຕິດຕາມວາລະປະຊຸມເມື່ອຕອນເຊົ້າມື້ນີ້, ຂ້າພະເຈົ້າເຫັນດີເຫັນພ້ອມກັບເນື້ອໃນ 2 ປະການ. ທີ່ 1 ແມ່ນການຕ້ານສໍ້ລາດບັງຫຼວງ; ທີ່ 2 ແມ່ນຂ້າພະເຈົ້າເຫັນວ່າເລື່ອງປ່ອນບັດໄວ້ວາງໃຈສຳລັບບັນດາຕຳແໜ່ງໂດຍປະຊາຊົນເລືອກຕັ້ງນັ້ນ, ພວກເຮົາຄວນຫັນເປັນລະອຽດກ່ຽວກັບເລື່ອງທີ່ວ່າ ຜູ້ໃດບໍ່ສົມກັບອັດຕາບັດໄວ້ວາງໃຈນັ້ນ, ແມ່ນຄ່ອຍໆໃຫ້ເຊົາດຳລົງຕຳແໜ່ງ ຫຼືສັບຊ້ອນໄປຮັບໜ້າທີ່ວຽກງານອື່ນໃຫ້ເຫມາະສົມກ່ວາ ”