ວັນທີ 15 ມີນາ, ຢູ່ຫໍພິພິທະພັນຮ່າໂນ້ຍ ຂອງຫວຽດນາມ ໄດ້ດໍາເນີນພິທີໄຂງານບຸນໜັງສືພິມທົ່ວປະເທດ 2019 ຂຶ້ນຢ່າງເປັນທາງການ. ງານບຸນນມີຫົວຂໍ້ວ່າ “ສື່ມວນຊົນຫວຽດນາມ ປ່ຽນແປງໃໝ່, ປະດິດຄິດສ້າງ, ມີຄວາມຮັບຜິດຊອບ ເພື່ອຜົນປະໂຫຍດຂອງປະເທດຊາດ ແລະ ປະຊາຊົນ”. ເຂົ້າຮ່ວມເຫດການດັ່ງກ່າວ ມີທ່ານນາຍົກລັດຖະມົນຕີຫວຽດນາມ ຫງວຽນຊວນຟຸກ, ທ່ານອະດີດເລຂາທິການໃຫຍ່ ນົງດຶກແມ້ງ , ທ່ານ ຫວໍວັນເຖື໋ອງ ຫົວໜ້າຄະນະໂຄສະນາສຶກສາສູນກາງ ພ້ອມດ້ວຍຜູ້ຕາງໜ້າບັນດາກະຊວງ, ຂະແໜງການ, ຫົວໜ່ວຍ, ບັນດາຜູ້ທີ່ເຮັດວຽກງານສື່ມວນຊົນ ຢ່າງຫຼວງຫຼາຍ.

ທ່ານນາຍົກລັດຖະມົນຕີ ຫງວຽນຊວນຟຸກ ລັ່ນຄ້ອງໄຂງານບຸນໜັງສືພິມທົ່ວປະເທດປີ 2019

        ກ່າວຄໍາເຫັນທີ່ພິທີໄຂງານບຸນ, ທ່ານນາຍົກລັດຖະມົນຕີ ຫງວຽນຊວນຟຸກ ຢັ້ງຢືນວ່າ ພັກ, ລັດ ແລະ ປະຊາຊົນຫວຽດນາມ ຍາມໃດກໍຕີລາຄາສູງບົດບາດຂອງສື່ມວນຊົນ, ຖືສື່ມວນຊົນແມ່ນພາຫະນະສື່ຂ່າວຕົ້ນຕໍ, ແມ່ນກໍາລັງປະຈັນບານດ້ານແນວຄິດ, ວັດທະນະທໍາ, ແມ່ນເວທີປາໄສທີ່ກວ້າງໃຫຍ່ຂອງປະຊາຊົນ. ງານບຸນໜັງສືພິມທົ່ວປະເທດ ຖືກຈັດຂຶ້ນໃນແຕ່ລະປີນັ້ນ ເປັນໂອກາດເພື່ອໃຫ້ສື່ມວນຊົນໄດ້ຮັບຟັງຄໍາເຫັນປະກອບ, ການຕີລາຄາ, ການຕໍາໜິຂອງເພື່ອນຜູ້ອ່ານໜັງສືພິມ, ຜູ້ຟັງວິທະຍຸ, ຜູ້ຊົມໂທລະພາບ; ແມ່ນໂອກາດເພື່ອແລກປ່ຽນບົດຮຽນ, ຮຽນຮູ້ເຊິ່ງກັນແລະກັນລະຫວ່າງຜູ້ທີ່ເຮັດວຽກງານສື່ມວນຊົນ. ທ່ານນາຍົກລັດຖະມົນຕີ ສະເໜີວ່າ:

        “ເອົາໃຈໃສ່ເຖິງການບໍາລຸງສ້າງຖັນແຖວຜູ້ທີ່ເຮັດວຽກງານສື່ມວນຊົນໃຫ້ມີຄຸນທາດການເມືອງທີ່ໜັກແໜ້ນ, ມີວິຊາສະເພາະສູງ ແລະ ຈັນຍາບັນຢ່າງບໍລິສຸດຜຸດຜ່ອງ, ພ້ອມທັງສໍາຜັດກັບເຕັກໂນໂລຢີໃນການສື່ຂ່າວແບບໃໝ່, ວິທີການຂຽນຂ່າວ, ບົດແບບໃໝ່ໄດ້ຢ່າງວ່ອງໄວ. ນັກຂ່າວແຕ່ລະຄົນ ຄວນສະແດງໃຫ້ເຫັນຄຸນທາດການເມືອງຢ່າງແຮງ, ມີລັກສະນະປະຕິວັດ ແລະ ເປັນມືອາຊີບ, ທັງມີຄວາມຢຶດໝັ້ນຕໍ່ຫຼັກໝັ້ນຂອງການປະຕິວັດ, ມີຈິດໃຈເຊື່ອມໂຍງເຂົ້າກັບສາກົນ, ຝຶກຝົນຫຼໍ່ຫຼອມຄຸນສົມບັດຢ່າງບໍ່ຢຸດຢັ້ງ, ປະຕິບັດກົດລະບຽບ 10 ຂໍ້ກ່ຽວກັບຈັນຍາບັນຂອງຜູ້ປະກອບອາຊີບນັກຂ່າວຫວຽດນາມ ຢ່າງເຂັ້ມງວດ”.

        ນະທີນີ້, ທ່ານນາຍົກລັດຖະມົນຕີ ຫງວຽນຊວນຟຸກ ໄດ້ລັ່ນຄ້ອງ ແລະ ຕັດແຖບຜ້າໄຂງານບຸນໜັງສືພິມທົ່ວປະເທດປີ 2019 ແລະ ໄປຢ້ຽມຊົມບັນດາຮ້ານວາງສະແດງ, ຟັງການແນະນໍາຂອງບັນດາອົງການສື່ມວນຊົນທີ່ເຂົ້າຮ່ວມງານບຸນ.

        ງານບຸນໜັງສືພິມທົ່ວປະເທດ 2019 ເປີດປະຕູຕ້ອນຮັບຜູ້ມາຢ້ຽມຊົມ ແລະ ເຂ້ົາຮ່ວມບັນດາການເຄື່ອນໄຫວໃນທຸກໆວັນ ແຕ່ເວລາ 8 ໂມງ 00 ນາທີ ຫາ 21 ໂມງ 00 ນາທີ ແລະ ຈະດໍາເນີນໄປຮອດວັນທີ 17 ມີນາຈຶ່ງອັດລົງ.