(vovworld) - ວັນ​ທີ 19/5, ​ໄທ ​ແລະ ລາວ ຕົກລົງ​ແກ້​ໄຂ​ບັນດາ​ບັນຫາ​​ຍັງ​ຄົ​ງຄ້າງ​ທີ່​ກ່ຽວຂ້ອງ​ເຖິງ​ຊາຍ​ແດນ, ພ້ອມທັງ​ເພີ່ມ​ທະວີ​ການ​ຮ່ວມ​ມື 2 ຝ່າຍ​ໃນ​ບັນດາ​ຂົງ​ເຂດ​ການ​ຄ້າ, ການທ່ອງທ່ຽວ ​ແລະ ກະສິກຳ. ບັນດາ​ຂໍ້​ຕົກລົງ​ດັ່ງກ່າວ​ໄດ້​ຮັບ​ຄວາມ​ເຫັນ​ດີ​ຈາກທ່ານ​ນາງ​ນາຍົກລັດຖະມົນຕີ ​ໄທ ຍິງ​ຣັກ ຊິນ​ນະ​ວັດ ​ແລະ ທ່ານ​ນາຍົກລັດຖະມົນຕີ ລາວ ທອງ​ສິງ ທຳມະ​ວົງ ​​ທີ່​ກອງ​ປະຊຸມຄະນະ​ລັດຖະບານ​ຮ່ວມ​ລະຫວ່າງ 2 ປະ​ເທດ​ຢູ່​ແຂວງ ຊຽງ​ໄໝ່ ຂອງ ​ໄທ. 2 ຝ່າຍ​ເຫັນ​ດີ​ເປັນ​ເອກະ​ພາບ​ນຳ​ກັນ​ຊຸກຍູ້​ການ​ຮ່ວມ​ມື​ຂ້າມ​ຊາຍ​ແດນ, ປະຕິ​ຮູບ​ລະບຽບ​ການ​ບໍລິຫານ ​ແລະ ມຸ້ງ​ໄປ​ເຖິງ​ການ​ປະຕິບັດ​ລະບຽບ​ການ​ພາສີ​ເອ​ເລກ​ໂຕ​ນິກ, ຮັບ​ມື​ກັບ​ບັນດາ​ບັນ​ຫາ​ກ່ຽວ​ຂ້ອງ​ເຖິງ​ຢາ​ເສບ​ຕິດ ​ແລະ ການ​ຄ້າ​ມະນຸດ. 2 ຝ່າຍ​ກໍ່​ເຫັນ​ດີ​ເປັນ​ເອກະ​ພາບ​ນຳ​ກັນ​ຈະ​ກ້າວ​ໄປ​ເຖິງ​ການ​ປະຕິບັດ​ການ​ອອກວີ​ຊາ​​ເທື່ອ​ດຽວລະ​ຫວ່າງ 2 ປະ​ເທດ​ໃນ​ຂອບ​ເຂດ​ຍຸດ​ທະ​ສາດ​ການ​ຮ່ວມ​ມື​ເສດ​ຖະກິດ​ແມ່​ນ້ຳ 3 ສາຍ (ຫຼື ACMECS).