ໄທ:ບໍ່ທັນມີສັນຍານຜ່ອນສັ້ນຜ່ອນຍາວຈາກ2ຝ່າຍ
ຜູ້ແຫ່ຂະບວນປະທ້ວງຖືທຸງຊາດໄທ ເຕົ້າໂຮມຢູ່ສຳນັກງານຕຳຫຼວດແຫ່ງຊາດ
(ພາບ: AFP/TTXVN)
(vovworld) – ວັນທີ 6/12, ທ່ານຮອງນາຍົກລັດຖະມົນຕີ, ລັດຖະມົນຕີການຕ່າງປະເທດ ໄທ ສຸຣາພົງ ວິຈັກໄຈກຸນ ໃຫ້ຮູ້ວ່າ: ທ່ານນາງນາຍົກລັດຖະມົນຕີ ໄທ ຍິງຣັກ ຊິນນະວັດ ໄດ້ຢັ້ງຢືນອີກເທື່ອໜຶ່ງວ່າ: ທ່ານຈະບໍ່ລາອອກຈາກຕຳແໜ່ງ ແລະ ບໍ່ມີເລື່ອງຍຸບເລີກສະພາແຫ່ງຊາດ. ຄຳຖະແຫຼງດັ່ງກ່າວໂດຍທ່ານ ສຸຣາພົງ ຍົກອອກມາພາຍຫຼັງກອງປະຊຸມຂອງສູນປະຕິບັດຄວາມເປັນລະບຽບຮ້ຽບຮ້ອຍ ແລະ ສັນຕິພາບ (CAPO), ເຊິ່ງແມ່ນແຫ່ງທີ່ທ່ານນາງນາຍົກລັດຖະມົນຕີ ຍິງຣັກ ຊິນນະວັດ ແຕ່ງຕັ້ງໃຫ້ທ່ານເປັນຜູ້ອຳນວຍການເພື່ອຮັບມືກັບຜູ້ແຫ່ຂະບວນປະທ້ວງ. ຕາມທ່ານ ສຸຣາພົງ ແລ້ວ, ທ່ານນາງນາຍົກລັດຖະມົນຕີ ໄທ ຈະຈັດຕັ້ງເວທີປາໄສດ້ວຍການເຂົ້າຮ່ວມຂອງທຸກຝ່າຍ, ນັບທັງຫົວໜ້າຜູ້ແຫ່ຂະບວນປະທ້ວງ ສຸເທບ ເທືອກສຸບັນ, ເພື່ອແນໃສ່ແກ້ໄຂສະພາບການເມືອງບໍ່ມີທາງອອກ.
ແລະກໍ່ໃນຕອນຄຳ່ວັນທີ 6/12, ທ່ານ ສຸເທບ ເທືອກສຸບັນ ໄດ້ຖະແຫຼງວ່າ: ວັນຈັນ (9/12) ຈະມາເຖິງ, ຈະແມ່ນວັນຕັດສິນສຳລັບຜູ້ຕໍ່ສູ້ຕ້ານລະບອບ ທັກສິນ ແລະ ລັດຖະບານຂອງທ່ານນາງ ຍິງຣັກ ຊິນນະວັດ. ທ່ານຢັ້ງຢືນຈະຮັບຮູ້ທຸກໆໝາກຜົນໃນການຕໍ່ສູ້ໃນວັນຈັນຈະມາເຖິງ ແລະ ຖ້າຫາກຖືກປະລາໄຊ ທ່ານຈະອອກສະເໜີຕົວຕໍ່ຕຳຫຼວດເພື່ອປະເຊີນໜ້າກັບໂທດທີ່ຖືກກ່າວຫາ.