ໝາກຜົນແຫ່ງການເຄື່ອນໄຫວຂອງທະນາຄານໃນປີ 2016
( vovworld) - ຕອນເຊົ້າວັນທີ 4/1 ຢູ່ຮ່າໂນ້ຍ, ທະນາຄານແຫ່ງລັດໄດ້ຈັດຕັ້ງການປະຊຸມຂ່າວກ່ຽວກັບໝາກຜົນແຫ່ງການເຄື່ອນໄຫວຂອງທະນາຄານໃນປີ 2016 ແລະ ຜັນຂະຫຍາຍການປະຕິບັດໜ້າທີ່ປີ 2017. ປີ 2016 ທະນາຄານແຫ່ງລັດໄດ້ບໍລິຫານສະໜອງເງິນທຶນຢ່າງເໝາະສົມສ້າງເງື່ອນໄຂ ເພື່ອໃຫ້ບັນດາອົງການສິນເຊື່ອມີອັດຕາດອກເບ້ຍເປັນປົກກະຕິ. ໄພເງິນເຟີ້ໄດ້ຮັບການຄວບຄຸມເປັນປົກກະຕິໂດຍພື້ນຖານ, ອັນໄດ້ປະກອບສ່ວນສຳຄັນໃນການປະຕິບັດການຄວບຄຸມໄພເງິນເຟີ້ CPI ທັງປີ ບັນລຸຄາດໝາຍຕ່ຳກວ່າ 5 % ເຊິ່ງສະພາແຫ່ງຊາດໄດ້ວາງອອກ. ໂຄງປະກອບສິນເຊື່ອໄດ້ຜັນແປຢ່າງຕັ້ງໜ້າຕາມທິດເປີດກວ້າງສິນເຊື່ອໄປຄຽງຄູ່ກັບຄວາມປອດໄພ, ມີຄຸນນະພາບ, ສຸມໃສ່ຕົ້ນຕໍໃນຂົງເຂດຜະລິດດຳເນີນທຸລະກິດ. ກ່ຽວກັບການກຳນົດທິດບໍລິຫານນະໂຍບາຍເງິນຕາ ແລະ ການເຄື່ອນໄຫວຂອງທະນາຄານໃນປີ 2017. ທະນາຄານແຫ່ງລັດ ໄດ້ສືບຕໍ່ບໍລິຫານນະໂຍບາຍເງິນຕາຢ່າງເປັນເຈົ້າການ, ມີໄຫວພິບໃນການນຳໃຊ້ບັນດາເຄື່ອງມືນະໂຍບາຍເງິນຕາໃຫ້ສອດຄ່ອງກັບການຜັນແປຂອງຕະຫຼາດໂລກ. ພ້ອມທັງສືບຕໍ່ຍົກສູງຄຸນນະພາບວຽກງານສະຖິຕິ, ການຄາດຄະເນ, ການຕິດຕາມການຜັນແປຂອງຕະຫຼາດພາຍໃນ ແລະ ຕ່າງປະເທດຢ່າງໃກ້ຊິດ ເພື່ອເປັນເຈົ້າການໄຈ້ແຍກ, ຕີລາຄາສະພາບການ, ການຄາດຄະເນເສດຖະກິດມະຫາພາກ, ເງິນຕາ. ຜ່ານນັ້ນຜັນຂະຫຍາຍຢ່າງມີໄຫວພິບ ແລະ ຄົບຊຸດ. ເພື່ອແນໃສ່ຮັບປະກັນຕະຫຼາດເງິນຕາໃຫ້ມີສະຖຽນລະພາບ, ຮັບປະກັນການຊຳລະເງິນຢ່າງເປັນລະບົບ, ຮັບປະກັນໃຫ້ອັດຕາແລກປ່ຽນ ແລະ ຕະຫຼາດເງິນຕາສາກົນໃຫ້ເປັນປົກກະຕິ ເໝາະສົມກັບຄວາມດຸ່ນດ່ຽງມະຫາພາກ ແລະ ເປົ້າໝາຍນະໂຍບາຍເງິນຕາ, ສູ້ຊົນໃຫ້ອັດຕາດອກເບ້ຍເປັນປົກກະຕິຄືປີ 2016.