ສວນອຸທິຍານແຫ່ງຊາດ ກົນດ໋າວ (ພາບ: TTXVN)

ກົນດ໋າວ ໄດ້ເປັນທີ່ຮູ້ຈັກກັນດີວ່າ ເປັນສະຫວັນແຫ່ງການທ່ອງທ່ຽວ ໄດ້ເລີ່ມຈາກ “ນາຮົກເມືອງຄົນ", ເຊິ່ງເປັນບ່ອນທີ່ເຄີຍກັກຂັງນັກຮົບປະຕິວັດ ຫວຽດນາມ ໃນປາງສົງຄາມຕ້ານແອກປົກຄອງຂອງລ່າເມືອງຂຶ້ນ ແລະ ຈັກກະພັດ ໃນສະໄໝແຕ່ກີ້. ປັດຈຸບັນ, ກົນດ໋າວ ໄດ້ຮັບການຈັດສັນກາຍເປັນເຂດທ່ອງທ່ຽວຊີວະພາບທະເລໝູ່ເກາະ ແລະ ວັດທະນະທຳປະຫວັດສາດທາງຈິດວິນຍານທີ່ມີຄຸນນະພາບສູງ, ເປັນເອກະລັກສະເພາະສົມກັບລະດັບພາກພື້ນ ແລະ ສາກົນ.

ບໍ່ພຽງແຕ່ໄດ້ດຶງດູດແຂກທ່ອງທ່ຽວດ້ວຍທັດສະນີຍະພາບທີ່ສວຍສົດງົດງາມທີ່ມີບັນດາຫາດຊາຍທະເລ ປາກະລັງ ຫຼາຍແຫ່ງ ພ້ອມດ້ວຍເຂດພູຜາປ່າໄມ້ທີ່ຂຽວອຸ່ມທຸ່ມ ເຊິ່ງໄດ້ປົກຄຸມໄປດ້ວຍຄື້ນ ແລະ ລົມທະເລນັ້ນ, ກົນດ໋າວ ຍັງດຶງດູດຄວາມສົນໃຈຈາກແຂກທ່ອງທ່ຽວ ຍ້ອນບັນດາອະນຸສອນສະຖານອີກດ້ວຍ. ໜຶ່ງໃນນັ້ນ ແມ່ນສະຖານທີ່ທີ່ບໍ່ອາດພາດເມື່ອມາຢາມດິນແດນແຫ່ງນີ້ ແມ່ນອະນຸສອນສະຖານ ຄ້າຍກັກຂັງ ກົນດ໋າວ.

“ຂ້າພະເຈົ້າມາ ກົນດ໋າວຫຼາຍເທື່ອແລ້ວ, ແຕ່ລະຄັ້ງລ້ວນແຕ່ມີຄວາມຮູ້ສຶກວ່າຈັບໃຈຫຼາຍ, ພິເສດແມ່ນທະເລຢູ່ນີ້ງາມຫຼາຍ, ທັດສະນີຍະພາບປະຖົມປະຖານລຽບງ່າຍ ແລະ ອາກາດກໍສົດໃສປອດໂປ່ງຫຼາຍ”.

“ຂ້າພະເຈົ້າເຫັນວ່າ ພວກເຮົາມີຊີວິດໃນທຸກວັນນີ້ ກໍຍ້ອນວ່າທະຫານຫຼາຍໆຄົນໄດ້ເສຍສະຫຼະຊີວິດເພື່ອປົກປັກຮັກສາສັນຕິພາບໃຫ້ແກ່ປະເທດຊາດ. ຂ້າພະເຈົ້າມາ ກົນດ໋າວ ກໍເພື່ອຈູດທູບໃຕ້ທຽນອາໄລຫາບັນດານັກຮົບວິລະຊົນທີ່ໄດ້ເສຍສະຫຼະຊີວິດເພື່ອຊາດຢູ່ດິນແດນແຫ່ງນີ້”.

“ຂ້າພະເຈົ້າຮູ້ສຶກຕື້ນຕັນໃຈຫຼາຍ ເມື່ອໄດ້ຮັບຟັງບັນດາເລື່ອງລາວຂອງນັກຮົບວິລະຊົນທີ່ໄດ້ຕໍ່ສູ້ກູ້ຊາດ ເພື່ອໃຫ້ມີໃນວັນນີ້. ໂດຍແມ່ນຊາວໜຸ່ມຜູ້ໜຶ່ງ, ເມື່ອມາແຫ່ງນີ້ໄດ້ຊອກຮູ້ກ່ຽວກັບປະຫວັດສາດ, ຂ້າພະເຈົ້າເຫັນວ່າ ການເດີນທາງຄັ້ງນີ້ແມ່ນມີຄ່າທີ່ສຸດ”.

ນອກຈາກນັ້ນແລ້ວ, ກົນດ໋າວ ຍັງມີອີກສະຖານທີ່ 2 ແຫ່ງທີ່ໄດ້ຮັບຖືວ່າແມ່ນບ່ອນສັກສິດ. ນັ້ນແມ່ນ, ຂຸມຝັງສົບຂອງນັກຮົບວິລະຊົນກຳລັງປະກອບອາວຸດ ຫວໍທິເຊົ໋າ ແລະ ຫໍບູຊາທ່ານນາງ ຟີອຽນ.

ໄລ່ມາຮອດເດືອນພະຈິກ 2023, ເມືອງກົນດ໋າວ ໄດ້ຕ້ອນຮັບແຂກທ່ອງທ່ຽວຫຼາຍກວ່າ 555.000 ເທື່ອຄົນ, ເພີ່ມຂຶ້ນກວ່າ 23% ເມື່ອທຽບໃສ່ໄລຍະດຽວກັນຂອງປີກາຍ, ໃນນັ້ນ ແຂກທ່ອງທ່ຽວຕ່າງປະເທດມີຈຳນວນກວ່າ 13.000 ເທື່ອຄົນ, ເພີ່ມຂຶ້ນເຖິງ 84% ເມື່ອທຽບໃສ່ໄລຍະດຽວກັນຂອງປີກາຍ. ມີຫຼາຍຜະລິດຕະພັນທ່ອງທ່ຽວໃໝ່ໄດ້ຮັບການຜັນຂະຫຍາຍ, ຄື: ການຕັ້ງຄ້າຍຢູ່ເກາະຕ່າງໆທີ່ນອນໃນລະບົບຊີວະພາບຂອງສວນສາທາລະນະອຸທິຍານ ກົນດ໋າວ, ເປັນຕົ້ນແມ່ນ ດອນ ເບີຍແກ້ງ, ດອນ ແຈ, ດອນ ຈຶ໋ງ, ດອນ ຕ່າຍ... ແລ້ວໄປດຳນ້ຳຊົມປາກະລັງ, ຢ້ຽມຊົມພືດພັນ ແລະ ບັນດາວັດຖຸພັນທີ່ຫາຍາກຄື ຮັງນົກແອ່ນ, ເຕົ່າກະ, ເຕົ່າຫຍ້າ (ເຕົ່າທະເລ), ປີງທະເລ...ອີກດ້ວຍ.

ຢູ່ສວນອຸທິຍານແຫ່ງຊາດ ກົນດ໋າວ, ມີບັນດາວັດຖຸພັນຂອງຍຸກຫີນໃໝ່, ຍຸກກະທະທອງເຫຼືອງ (ກ່ອນນີ້ປະມານ 3000 ປີ) ພ້ອມດ້ວຍບັນດາຮ່ອງຮອຍຂອງວັດທະນະທຳ ຊາຮວິ່ງ ຂອງໄລຍະກ່ອນນີ້ເກືອບ 2000 ປີ, ກໍໄດ້ສ້າງຄວາມສົນໃຈເປັນພິເສດສະເພາະສຳລັບການເດີນທາງຄົ້ນຫາ ກົນດ໋າວ. ນອກຈາກນັ້ນ, ກົນດ໋າວ ຍັງມີຄວາມບົ່ມຊ້ອນດ້ານເສດຖະກິດທະເລທີ່ເປັນເອກະລັກ, ເຊິ່ງແມ່ນສະຖານທີ່ຫາປາທີ່ກວ້າງໃຫຍ່, ສະດວກແກ່ການບໍລິການພະລາທິການ, ສ້າງຮາກຖານປຸງແຕ່ງສິນໃນນ້ຳສົ່ງອອກ.  ທ່ານ ເລວັນຟອງ, ເລຂາພັກເມືອງ, ປະທານຄະນະກຳມະການປະຊາຊົນເມືອງ ກົນດ໋າວ ໃຫ້ຮູ້ວ່າ:

“ທັດສະນະຂອງທ້ອງຖິ່ນແມ່ນປົກປັກຮັກສາ ແລະ ເສີມຂະຫຍາຍ, ປັບປຸງບັນດາຄຸນຄ່າເຊິ່ງລຸ້ນພໍ່ລຸ້ນອ້າຍໄດ້ປະໄວ້ໃຫ້ຈົນເຖິງປັດຈຸບັນນີ້. ພ້ອມດຽວກັນນັ້ນ,  ກໍຜັນຂະຫຍາຍການພັດທະນາເສດຖະກິດ - ສັງຄົມ, ຫັນປ່ຽນໂຄງປະກອບສັງຄົມ ຈາກການເຮັດກະສິກຳ ໄປເຮັດການທ່ອງທ່ຽວ ແລະ ການບໍລິການ ເພື່ອຈຸດປະສົງ ເສີມຂະຫຍາຍ, ປົກປັກຮັກສາ ແລະ ຮັບປະກັນສິ່ງແວດລ້ອມ”.

ໂດຍແມ່ນ 1 ໃນ 21 ເຂດທ່ອງທ່ຽວລະດັບຊາດຂອງ ຫວຽດນາມ, ປັດຈຸບັນ ກົນດ໋າວ ໄດ້ຖືກຖືວ່າ ສະຫວັນແຫ່ງການພັກຜ່ອນຢ່ອນອາລົມ ແລະ ຄົ້ນຫາທຳມະຊາດສຳລັບແຂກທ່ອງທ່ຽວທັງຢູ່ພາຍໃນ ແລະ ຕ່າງປະເທດ. ປີ 2011, ວາລະສານທ່ອງທ່ຽວຊື່ດັ່ງຂອງ ອັງກິດ  Lonely Planet ໄດ້ຄັດເລືອກ ກົນດ໋າວ ແມ່ນ 1 ໃນ 10 ໝູ່ເກາະທີ່ລຶກລັບມະຫັດສະຈັນ ແລະ ດີທີ່ສຸດໃນໂລກ. ໂດຍປະຕິບັດ ແຜນຜັງລວມກ່ຽວກັບການສ້າງ ກົນດ໋າວ ຮອດປີ 2030, ລັດຖະບານ ແລະ ແຂວງ ບ່າເຣ້ຍ ຫວູງເຕົ່າ ພວມມານະພະຍາຍາມສ້າງ ກົນດ໋າວ ເປັນເມືອງພັດທະນາຢ່າງກົມກຽວ ລະຫວ່າງການພັດທະນາເສດຖະກິດ ກັບການປົກປັກຮັກສາຮ່ອງຮອຍປະຫວັດສາດທາງດ້ານວັດທະນະທຳ, ປົກປັກຮັກສາລະບົບນິເວດ ປ່າ - ທະເລ, ຮັບປະກັນຄວາມສະຫງົບ - ປອດໄພຕາມທິດທັນສະໄໝ ແລະ ຍືນຍົງ./.