(vovworld) - ກົນດາວ ແມ່ນເກາະແຫ່ງໜຶ່ງທີ່ຂຶ້ນກັບ ແຂວງບ່າເຮ້ຍ-ວຸ້ງເຕົ່າ. ກ່ອນນີ້, ໃນໄລຍະຕໍ່ຕ້ານຕ້ານລ່າເມືອງຂຶ້ນຝລັ່ງ ແລະ ຈັກກະພັດອາເມລິກາ, ກົນດາວ ເຄີຍແມ່ນແຫ່ງຄຸມຂັງບັນດານັກຮົບປະຕິວັດ ແລະ ໄດ້ຮັບການເລືອກເຟັ້ນຈາກວາລະສານທ່ອງທ່ຽວອັນດັບໜຶ່ງຂອງອາເມລິກາ ວ່າ ແມ່ນໜຶ່ງໃນຈຳນວນເກາະ 20 ແຫ່ງທີ່ຊ້ອນແຝງຫຼາຍສິ່ງທີ່ເລິກລັບກວ່າໝູ່ຢູ່ໂລກ. ກົນດາວ ໄດ້ສ້າງຄວາມປະທັບໃຈໃຫ້ແກ່ນັກທ່ອງທ່ຽວດ້ວຍພູຜາປ່າໄມ້ທີ່ໃຫຍ່ໂຕມະໂຫຖານ, ທັດສະນີຍະພາບທີ່ຮົກເຮື້ອ ແລະ ຄວາມງາມຂອງທະເລ. ເຊີນທ່ານຄົ້ນຫາເກາະທີ່ສວຍງາມແຫ່ງນີ້ ຜ່ານບົດສາລະຄະດີ “ກົດດາວ, ແດນສະຫວັນແຫ່ງການທ່ອງທ່ຽວ” ຂອງນັກຂ່າວ ລານແອງ.
ເກາະກົນດາວ
(ພາບ: ອິນເຕີແນດ)
ໂດຍຫຼີກຄວາມຮ້ອນເອົ້າ ແລະ ແສງແດດກ້າຂອງລະດູຮ້ອນ, ນັກທ່ອງທ່ຽວໄດ້ມາກົນດາວ ເພື່ອສູບອາກາດທີ່ປອດໂປ່ງ, ພຽງແຕ່ມາຮອດສະໜາມບີນກົນດາວ, ນັກທ່ອງທ່ຽວກໍ່ຮູ້ສຶກສະຫວາດສະເຫວີຍ. ສຽງຄື້ນທະເລປະສານພ້ອມກັບສຽງລົມພັດສ້າງເປັນສຽງດົນຕີທີ່ອ່ອນຊອນຄືດັ່ງສະແດງຄວາມຍິນດີຕ້ອນຮັບນັກທ່ອງທ່ຽວມາຢ້ຽມຢາມ. ນັ່ງເທິງລົດ, ຜູ້ນຳທ່ຽວໄດ້ແນະນຳໂດຍສັງເຂບກ່ຽວກັບກົນດາວ ວ່າ:
“ພວກເຮົາຫາກໍ່ມາຮອດສະໜາມບິນກົນດາວ, ເນື້ອທີ່ທັງໝົດຂອງໝູ່ເກາະແມ່ນ 76 ຕາລາງກິໂລແມດ, ເຊິ່ງລວມມີເກາະໃຫຍ່ນ້ອຍ 16 ແຫ່ງ. ກົນດາວແມ່ນເກາະແຫ່ງໜຶ່ງໃນໝູ່ເກາະດັ່ງກ່າວ, ດ້ວຍເນື້ອທີ່ 12 ຕາລາງກິໂລແມດ. ຢືນຢູ່ບ່ອນສູງຫຼຽວລົງມາກໍ່ເຫັນວ່າກົນດາວ ຄ້າຍຄືຮູບໂຕໝີ, ສັນຫຼັງມຸ່ງໄປສູ່ດິນຕໍ່ແຜ່ນ, ຕີນມຸ່ງໄປສູ່ທະເລຕາເວັນອອກ ແລະ ພວກເຮົາພວມໄປບົນເສັ້ນທາງໜຶ່ງດຽວຂອງກົນດາວ ຢູ່ລຽບຕາມແຄມຝັ່ງທະເລ, ຈາກສະໜາມບິນໄປຍັງໃຈກາງກົນດາວ ແມ່ນ 15 ກມ ແລະ ຈາກສູນກາງໄປຍັງທ່າກ່ຳປັ່ນແມ່ນ 13 ກມ .”
ເສັ້ນທາງຢູ່ແຄມຝັ່ງທະເລກົນດາວ
(ພາບ: ອິນເຕີແນດ)
ມາຢ້ຽມຢາມກົນດາວ ໃນປະຈຸບັນ, ນັກທ່ອງທ່ຽວສາມາດເຂົ້າຮ່ວມ 2 ຮູບການທ່ອງທ່ຽວຄື: ທ່ອງທ່ຽວເຂດປູຊະນີຍະສະຖານຄຸກກົນດາວ ແລະ ທ່ອງທ່ຽວປ່າສະຫງວນແຫ່ງຊາດກົນດາວ. ບ່ອນທຳອິດທີ່ນັກທ່ອງທ່ຽວຈະມາຢ້ຽມຢາມໃນເຂດປູຊະນີຍະສະຖານຄຸກກົນດາວ, ນັ້ນແມ່ນບ່ອນຄຸມຂັງບັນດານັກຮົບປະຕິວັດຫວຽດນາມ ໃນໄລຍະຕໍ່ຕ້ານຕ້ານລ່າເມືອງຂຶ້ນຝລັ່ງ ແລະ ຈັກກະພັດອາເມລິກາ. ເອື້ອຍ ຫງວຽນທິເຕິມ, ຜູ້ນຳທ່ຽວແນະນຳວ່າ:
“ຄຸກກົນດາວ ໂດຍຝລັ່ງ ກໍ່ສ້າງແບບຖາວອນ. ເມື່ອຜ່ານປະຕູໂຂງເຂົ້າບໍລິເວນຄຸກ, ນັກທ່ອງທ່ຽວຈະເຫັນກິດຈະກຳມະນຸດສະທຳ 2 ແຫ່ງ, ນີ້ແມ່ນສາງບັນຈຸທັນຍາຫານ 2 ແຫ່ງ, ນີ້ແມ່ນເຮືອນຄົວ, ຢູ່ພຸ້ນແມ່ນສຸກສາລາ, ສ່ວນຢູ່ເບື້ອງຫຼັງບັນດາກິດຈະກຳນັ້ນແມ່ນເຂດຄຸມຂັງລວມມີ 384 ຫ້ອງຕິດກັນ. ຢູ່ທີ່ນີ້ເຖິງວ່າບໍ່ຖືກທໍລະມານ, ກໍ່ພາໃຫ້ນັກໂທດເສຍຊີວິດຍ້ອນການປະພຶດຢ່າງເຄັ່ງຄັດ ແລະ ຄວາມຫຍຸ້ງຍາກຂາດເຂີນຈົນອົດທົນບໍ່ໄດ້“.
ຄຸກກົນດາວ
(ພາບ: ອິນເຕີແນດ)
ປະຈຸບັນ, ເຂດປູຊະນີຍະສະຖານກົນດາວ ຍັງຄົງຮັກສາລະບົບຄຸກ, ເຂດຄຸມຂັງພິເສດໄວ້ຄືເກົ່າຄື: ເຮືອນຂອງເຈົ້າຖິ່ນ, ຂົວກ່ຳປັ່ນ, ລະບົບຄຸກຂອງລ່າເມືອງຂຶ້ນຝລັ່ງ ແລະ ອາເມລິກາ, ເຂດຄຸມຂັງພິເສດຄື: ຄອກເສືອ, ຄອກງົວ…ຫ່າງຈາກນີ້ບໍ່ໄກປານໃດແມ່ນເຂດສຸສານຮ່າງເຢືອງ ລວມເນື້ອທີ 19 ເຮັກຕາ. ອ້າຍ ຫງວຽນບິ່ງ, ຜູ້ເບິ່ງແຍງສຸສານ, ໃຫ້ຮູ້ວ່າ, ປະຈຸບັນ, ສຸສານຮ່າງເຢືອງ ເຄີຍຕ້ອນຮັບບັນດານັກທ່ອງທ່ຽວທີ່ມາຈາກທຸກສາລະທິດມາຈູດທູບທຽນອາໄລຫາບັນດາວິລະຊົນ, ນັກຮົບທີ່ເສຍສະຫຼະຊີວິດເພື່ອພາລະກິດເອກະລາດແຫ່ງຊາດ.
“ແຂກມາຫຼາຍທີ່ສຸດແມ່ນໃນວັນສຸກ ແລະ ວັນເສົາ, ບາງເທື່ອເຂົາເຈົ້າມາເວລາ 12 ໂມງ, ແຕ່ຈູດທູບທຽນອາໄລຫາບັນດານັກຮົບປະຕິວັດທີ່ເສຍສະຫຼະຊີວິດຈົນຮອດເວລາ 3 ໂມງ - 4 ໂມງຈຶ່ງແລ້ວ. ພວກຂ້າພະເຈົ້າເຮັດວຽກຢູ່ທີ່ນີ້ ດ້ວຍຄວາມເຄົາລົບນັບຖືຜູ້ທີ່ມີຄຸນງາມຄວາມດີຕໍ່ປະເທດຊາດ ແລະ ຢາກປະກອບສ່ວນຮັກສາເຂດສຸສານນີ້ໃຫ້ສະອາດ, ສວຍງາມເພື່ອຮັບໃຊ້ນັກທ່ອງທ່ຽວມາຢ້ຽມຢາມ“.
ສຸສານຮ່າງເຢືອງ
(ພາບ: ອິນເຕີແນດ) ມາກົນດາວ, ນັກທ່ອງທ່ຽວຍັງມີໂອກາດໄດ້ໄປຢ້ຽມຢາມປ່າສະຫງວນແຫ່ງຊາດກົນດາວ, ນີ້ແມ່ນປ່າສະຫງວນທັງມີລະບົບຊີວະພາບປ່າ ແລະ ຊີວະພາບທະເລ. ເນື້ອທີປ່າເຊິ່ງໄດ້ຮັບການປົກຄອງທັງໝົດແມ່ນ 20.000 ເຮັກຕາ, ໃນນັ້ນ 14.000 ເຮັກຕາແມ່ນທະເລ, ສ່ວນຍັງເຫຼືອແມ່ນປ່າ. ຢູ່ທີ່ນີ້ສິ່ງແວດລ້ອມ, ຊັບພະຍາກອນປ່າ, ທະເລຍັງຄົງຮັກສາຄວາມງາມແບບທຳມະຊາດໄວ້, ຊີວະນາໆພັນ, ທັດສະນີຍະພາບບໍ່ຖືກກະທົບຫຼາຍປານໃດ.
ອ້າຍ ເລຮົ່ງຢວານ, ພະນັກງານຄຸ້ມຄອງປ່າສະຫງວນແຫ່ງຊາດກົນດາວ, ແນະນຳວ່າ:
“ໃນປ່າສະຫງວນແຫ່ງຊາດກົນດາວ ມີນົກອັນລ້ຳຄ່າຫາຍາກ 2 ປະເພດ. ນັ້ນແມ່ນນົກ Gam Gi ຂາວ ພຽງແຕ່ມີຢູ່ກົນດາວ, ຫວຽດນາມ ເທົ່ານັ້ນ ແລະ ນົກສັນຕິພາບ Nicoba ເພາະວ່ານົກປະເພດນີ້ຖືກຄົ້ນພົບເປັນເທື່ອທຳອິດຢູ່ເກາະ Nicoba, ສ່ວນຢູ່ຫວຽດນາມ ພຽງແຕ່ຄົ້ນພົບຢູ່ກົນດາວ ເທົ່ານັ້ນ ”.
ປ່າສະຫງວນແຫ່ງຊາດກົນດາວ
(ພາບ: ອິນເຕີແນດ) ກົນດາວ ຍັງດຶງດູດນັກທ່ອງທ່ຽວຍ້ອນຄວາມຮົກເຮື້ອອີກດ້ວຍ. ນ້ຳທະເລກົນດາວຂຽວສະອາດ. ກົນດາວມີຝັ່ງທະເລຍາວເຖິງ 200 ກມ, ດ້ວຍຫາດຊາຍທະເລທີ່ສວຍງາມນັບສິບແຫ່ງຄື: ອານຫາຍ, ເດິ່ມເຈົາ, ລໍ່ໂວຍ, ສ໋ວຍເອີດ, ຫ່ອນບ່າ… ທັງໝົດເຫຼົ່ານັ້ນ ໄດ້ສ້າງຄວາມນິຍົມ, ຄວາມໃໝ່ອ່ຽມໃຫ້ແກ່ນັກທ່ອງທ່ຽວ.